လက်လွှတ်ဆုံးခဲ့ရသော ရခိုင်ပြည် မြောက်ဦးမြို့ပြင်က စစ်ကောင်စီ၏ အမှတ် ၃၁ ရဲတပ်ရင်းကို ယမန်နေ့ မတ်လ ၁၈ ရက်နေ့ နံနက် ၁ နာရီ ၅၀ မိနစ်တွင် စစ်ကောင်စီမှ လေကြောင်း ဗုံးကြဲတိုက်ခိုက်ခဲ့သည်။
အာရက္ခတပ်တော် AA တပ်ဖွဲ့ဝင်များ အဆိုပါနေရာတွင် နေထိုင်သည်ဟု အထင်ဖြင့် အမှတ် ၃၁ ရဲတပ်ရင်းကို စစ်ကောင်စီက ဗုံးကြဲတိုက်ခိုက်ဒေသခံများက ပြောဆိုကြသည်။
စစ်ကောင်စီ လေကြောင်းဗုံးကြဲတိုက်ခိုက်မှုမှာ ရဲတပ်ရင်းကို မကျဘဲ အနီးက ပန်းဈီးမြောင်း (ပန်းဈေးမြောင်း) ခေါ်သည့် ကျွဲ/နွားများ ရေသောက်ရာနေရာ မြောင်းကို ကျရောက်ပေါက်ကွဲခဲ့ကြောင်း မြောက်ဦး ဒေသခံတစ်ဦးက ပြောသည်။
“မနေ့က ည ၁ နာရီ ၅၀ မိနစ်မှာ စစ်ကောင်စီက ဗုံး ၄ လုံးထက်မနည်း ကြဲချခဲ့တယ်။ အမှန်တော့ အမှတ် ၃၁ ရဲတပ်ရင်းကို ကြဲတာ။ ဒါပေမယ့် ရဲတပ်ရင်းကို မကျဘဲ သိပ်မဝေးတဲ့ အနီးက ပန်းဈီးမြောင်းလို့ခေါ်တဲ့ နတ်ဒုံဘက်ကို ကျသွားတယ်။ ကျွဲ/နွားတွေ သေသွားတယ်လို့ သိရတယ်။ ဘယ်နှစ်ကောင် သေသွားလဲတော့ မသိရဘူး။ အဲဘက်သွားလို့ မရဘူးဆိုတော့လေ” ဟု ပြောသည်။
အမှတ် ၃၁ ရဲတပ်ရင်းကို လေကြောင်းတိုက်ခိုက်မှု မပြုလုပ်မီ စစ်ကောင်စီ၏ လေယာဉ်သည် မြောက်ဦးမြို့ကို နှစ်ကြိမ်ထက်မနည်း လှည့်ပတ်ဝဲပျံခဲ့ကြောင်း နောက်ထပ် မြောက်ဦးဒေသခံတစ်ဦးက ပြောသည်။
“ညဆိုတော့ လေယာဉ် အမျိုးအစားတော့ မသိရဘူး။ မြင်လည်းမမြင်ရတော့လေ။ ဂျက်လား၊ Y အများအစားတွေလား မသိဘူး။ ဗုံးမကြဲခင်တော့ မြို့ကို နှစ်ပတ်လောက်တော့ ဝဲပျံခဲ့တယ်။ ပြီးမှ ဗုံးကြဲသွားတာ။ ကျနော်တို့က အရမ်းစိုးရိမ်တာပေါ့ဗျာ။ မြို့ထဲကို ဗုံးမကြဲပါစေနဲ့လိုပဲ ဆုတောင်းနေတာပါ။ အရင်လည်း မြောက်ဦးဟိုတယ်ရှေ့ကို ဗုံးကြဲခဲ့လို့ ပြည်သူတွေ သေခဲ့ရပြီ။ တိုက်ပွဲလည်း ရှိတာ မဟုတ်ဘူး။ လေကြောင်းတိုက်ခိုက်မှု မလုပ်စေချင်တော့ဘူး။ စစ်ကောင်စီက အပြစ်မဲ့ အရပ်သားတွေကို ငဲ့ညှာစေချင်ပါတယ်” ဟု ပြောသည်။
စစ်ကောင်စီတပ်၏ လေကြောင်း ဗုံးကြဲပစ်ခတ်မှုကြောင့် လူများ ထိခိုက်မှု ရှိ မရှိ ဆိုသည်ကို Western News က သီးခြား အတည်ပြု၍ မရဘဲ ကျွဲ/နွားများ တစ်ချို့ သေဆုံးသွားကြောင်း ဒေသခံများက ပြောဆိုထားသည်။
အမှတ် ၃၁ ရဲတပ်ရင်းသည် မြောက်ဦးမြို့ပြင်တွင်ရှိပြီး ရှေးဟောင်း ကိုးသောင်းဘုရားနှင့်လည်း နီးကပ်သော စစ်ကောင်စီ၏ ရဲတပ်စခန်းတစ်ခုဖြစ်ခဲ့သည်။
မြေပုံ၊ မင်းပြား၊ မြောက်ဦး၊ ကျောက်တော် ပါဝင်သော မြောက်ဦးခရိုင်ကို ဖွဲ့စည်းခဲ့ပြီးနောက် ခရိုင်ရဲတပ်ရင်းတစ်ခုအဖြစ် အမှတ် ၃၁ ရဲတပ်ကို စစ်ကောင်စီက တည်ဆောက်ခဲ့ခြင်းဖြစ်သည်။
လက်ရှိတွင် မြောက်ဦးမြို့သည် အာရက္ခတပ်တော် AA ထိန်းချုပ်သော နယ်မြေတစ်ခုဖြစ်သည့်အတွက် အမှတ် ၃၁ ရဲတပ်ရင်းမှာလည်း စစ်ကောင်စီ လက်လွှတ်ဆုံးခဲ့ရသော ရဲတပ်ရင်းတစ်ခုဖြစ်သည်။
မြောက်ဦးမြို့ကို အာရက္ခတပ်တော် AA ဝင်သိမ်းချိန် အဆိုပါ အမှတ် ၃၁ ရဲတပ်ကနေ စစ်ကောင်စီတပ်ဖွဲ့ဝင် အများအပြားဖြင့် ခုခံခဲ့သော တပ်စခန်းတစ်ခုလည်းဖြစ်သည်။
မြောက်ဦးမြို့တွင် စစ်ကောင်စီမှာ မြို့နယ်ရဲတပ်ဖွဲ့၊ အမှတ် ၃၁ ရဲတပ်ရင်း၊ ခမရ ၅၄၀၊ ခမရ ၃၇၇ နှင့် ခမရ ၃၇၈ တို့ရှိသည့်အပြင် မြောက်ဦးမြို့နှင့် ၁၅ မိုင်ခန့်ဝေးသော ရဟတ်ယာဉ်များ ဆင်းသက်နိုင်သော လင်းမွေတောင် တပ်စခန်းကြီးတစ်ခု ရှိခဲ့ပြီး လက်ရှိတွင် အာရက္ခတပ်တော် AA က သိမ်းပိုက်ထားသည်။
သို့သော်လည်း အဆိုပါ တပ်ရင်းတပ်စခန်းများနေရာတွင် ဒေသခံများပြောဆိုချက်အရ မြေမြှုပ်မိုင်းများ ထောင်ပေါင်းများစွာ ရှိသောကြောင့် အာရက္ခတပ်တော် AA တပ်ဖွဲ့ဝင်များ နေထိုင်ခြင်းမရှိကြောင်းလည်း သိရသည်။
