ပဲခူးတိုင်းဒေသ ဥသျှစ်ပင်မြို့အနီးမှာ အာရက္ခတပ်တော် AA ပူးပေါင်းတပ်ဖွဲ့နှင့် စစ်ကောင်စီတပ်တို့ကြား တိုက်ပွဲပြင်းထန် ဖြစ်ပွားနေကြောင်း သိရသည်။
ပန်းတောင်းမြို့နယ် ညောင်ကျိုးတပ်စခန်းအား AA က တိုက်ခိုက်ပြီးနောက် ဥသျှစ်ပင်မြို့အနီးသို့ ရောက်ရှိလာခြင်းဖြစ်ပြီး တိုက်ပွဲမှာ ပြင်းထန်နေဆဲဖြစ်ကြောင်း ဒေသခံများထံမှ သိရသည်။
ဥသျှစ်ပင် ဒေသခံတစ်ဦးက “ဒီမနက်ဆိုရင်လည်း ဥသျှစ်ပင်မြို့ပေါ်မှာ လက်နက်ကြီးသံတွေ ကြားနေရတယ်။ အခု တိုက်ပွဲဖြစ်နေတာက ညောင်ကျိုးနဲ့ ညောင်ခြေထောက်အကြားမှာ ဖြစ်နေတာ။ ဥသျှစ်ပင်မြို့ပေါ်ကနေလည်း လက်နက်ကြီးတွေ တောက်လျှောက်ပစ်ကူ ပေးနေတယ်။ ညောင်ခြေထောက်ဆိုတာက ဥသျှစ်ပင်နဲ့ ကပ်လျက်ဆိုတော့ တိုက်ပွဲတွေက တဖြည်းဖြည်းကို အရမ်းနီးလာနေပြီ” ဟု ပြောသည်။
ဥသျှစ်ပင်မြို့အနီး ညောင်ခြေထောက်က စစ်ကောင်စီတပ်စခန်းများကို အာရက္ခတပ်တော် AA ပူးပေါင်းတပ်က ထိုးစစ်ဆင်တိုက်ခိုက်နေပြီး ညောင်ကျိုးတပ်စခန်းက စစ်ကောင်စီတပ်များမှာလည်း ဥသျှစ်ပင်မြို့သို့ ဆုတ်ခွာနေကြောင်း သိရသည်။
ညောင်ကျိုးတပ်စခန်းက စစ်ကောင်စီ ကာကင်းစခန်းများကို သိမ်းပိုက်ထားပြီဟု အာရက္ခတပ်တော် AA ပြောခွင့်ရက အတည်ပြုပြောကြားထားသော်လည်း ညောင်ကျိုးတပ်စခန်းအား အပြီးတိုင်သိမ်းပိုက် ရရှိခြင်း ရှိမရှိကိုမူ AA ပြောခွင့်ရက ထုတ်ဖော်ပြောဆိုခြင်းမရှိသေးပေ။
ဥသျှစ်ပင်မြို့အနီးက တိုက်ပွဲက ပိုပြင်းထန်လာနိုင်ပြီး တက္ကသိုလ်ဝင် စာမေးပွဲ ဖြေဆိုပြီးပါက ဥသျှစ်ပင်မြို့ထဲက စာသင်ကျောင်းများတွင် စစ်ကောင်စီတပ်က နေရာယူတပ်စွဲလာနိုင်ကြောင်းလည်း ဒေသခံများက ပြောဆိုကြသည်။
“လောလောဆယ်တော့ ဥသျှစ်ပင်မြို့မှာ တက္ကသိုလ်ဝင် စာမေးပွဲတွေ ပြုလုပ်နေပါတယ်။ အဲဒီ စာမေးပွဲပြီးရင်တော့ စာသင်ကျောင်းတွေမှာ စစ်တပ်က နေရာယူတပ်စွဲဖို့ ပြင်ထားတယ်လို့ သိရတယ်။ ဥသျှစ်ပင်မြို့ထဲကနေ ခုခံစစ် ပြင်ဆင်မယ်။ ရဲစခန်းနဲ့ တခြားရုံးတွေမှာလည်း လုံခြုံရေး အကာအကွယ် အတားအဆီးတွေ အကြီးအကျယ် ချထားတယ်” ဟု ဒေသခံတစ်ဦးက ပြောသည်။
ဥသျှစ်ပင်မြို့အနီးက တိုက်ပွဲနှင့် မဝေးသည့် ညောင်ကျိုးတိုက်ပွဲတွင် စစ်ကောင်စီဖက်က တပ်သား ၁၂၀ ကျော်အထိ သေဆုံးသွားကြောင်းနှင့် ကျန်တပ်သားများမှာလည်း တပ်ပျက်၍ ထွက်ပြေးနေကြသည်ဟု ညောင်ကျိုးတိုက်ပွဲတွင် ပါဝင်ခဲ့သော အလင်းဝင် စစ်မှုထမ်းတပ်သားသစ် ကိုနန်းလင်းသူက ထုတ်ဖော်ပြောဆိုထားသည်။
လက်ရှိတွင် ညောင်ကျိုး၊ ညောင်ခြေထောက်နှင့် ဥသျှစ်ပင်မြို့အနီးတို့တွင် စစ်ကောင်စီတပ်နှင့် AA ပူးပေါင်းတပ်တို့မှာ တိုက်ပွဲများ ပြင်းထန်လျှက်ရှိကြောင်း သိရသည်။
(ခေတ်သစ်မီဒီယာသည် Western News ၏ မိတ်ဖက်အဖွဲ့အစည်းဖြစ်သည်)
