နိုင်ငံတော်၏ အဓိက ကာကွယ်ရေး အင်အားစုဖြစ်သည့် မြန်မာ့တပ်မတော်အား ပြိုကွဲရန် တော်လှန်ရေးအဖွဲ့အစည်းအပါအဝင် ပြည်တွင်းပြည်ပအဖွဲ့အစည်းများက ပြုလုပ်နေသည်ဟု အာဏာသိမ်း ဒုစစ်ခေါင်းဆောင် ဒုတိယဗိုလ်ချုပ်မှူးကြီး စိုးဝင်းက ပြောသည်။
ရှမ်းပြည်နယ် တောင်ပိုင်းရှိ ကလော တပ်နယ်က တပ်ဖွဲ့ဝင်များဖြင့် မတ်လ ၂၀ ရက်နေ့က တွေ့ဆုံရာတွင် ဒုတိယဗိုလ်ချုပ်မှူးကြီး စိုးဝင်းက ပြောဆိုခဲ့ခြင်းဖြစ်သည်။
“နိုင်ငံတော် တည်ငြိမ်ရေးကို မလိုလားတဲ့ ပြည်တွင်းပြည်ပက အဖွဲ့အစည်းတွေ၊ လူပုဂ္ဂိုလ်တွေက တပ်မတော် ပြိုကွဲအောင်၊ တပ်နဲ့ ပြည်သူ သွေးကွဲအောင် နည်းလမ်းမျိုးစုံနဲ့ ဆောင်ရွက်လျက်ရှိတယ်။ ဒါ့ကြောင့် တပ်မတော်အနေနဲ့ နိုင်ငံတော်ရဲ့ အချုပ်အခြာ အာဏာ တည်တံ့ခိုင်မြဲရေးအတွက် ဒို့တာဝန် အရေး သုံးပါးကို ဦးထိပ်ထားပြီး ဆောင်ရွက်နေတယ်” ဟု စိုးဝင်းက ပြောဆိုခဲ့သည်။
NCA လက်မှတ် ရေးထိုးထားသည့် လက်နက်ကိုင်အဖွဲ့အချို့နှင့် အခြားသော တိုင်းရင်းသားလက်နက်ကိုင် တပ်ဖွဲ့တို့ ပူးပေါင်းပြီး တပ်မတော်အား နှောက်ယှက်တိုက်ခိုက်နေသည်ဟုလည်း ဒုစစ်ခေါင်းဆောင် စိုးဝင်းက ဆိုသည်။
“ပြည်ပက သွေးထိုးမြှောက်ပင့်မှုတွေကြောင့်လည်း အကြမ်းဖက်အဖွဲ့အစည်းတွေ ပေါ်ပေါက်လာပြီး နိုင်ငံအတွင်း လုံခြုံရေးနဲ့ တည်ငြိမ်အေးချမ်းမှု မရှိစေဖို့ နည်းလမ်းပေါင်းစုံနဲ့ လုပ်ဆောင်နေကြတယ်” ဟုလည်း ပြောဆိုခဲ့သည်။
နိုင်ငံတော် တည်ငြိမ်ရေးနှင့် ဖွံ့ဖြိုးတိုးတက်ရေးအတွက် လွတ်လပ်ပြီး တရားမျှတသော ရွေးကောက်ပွဲကို ၂၀၂၅ နှစ်ကုန်ပိုင်း သို့မဟုတ် ၂၀၂၆ ဇန်နဝါရီလတွင် ကျင်းပပေးသွားမည်ဟု စိုးဝင်းက ပြောသည်။
“ဆန္ဒမဲပေးပိုင်ခွင့် ရှိသူ အားလုံးရဲ့ အခွင့်အရေးတွေ နစ်နာမှု မရှိစေဖို့နဲ့ နည်းလမ်းမှန်တဲ့ ရွေးကောက်ပွဲဖြစ်ဖို့ အရေးပေါ်ကာလ ပြဌာန်းချက်တွေနဲ့အညီ ဆောင်ရွက်ပြီးစီးပါက လွတ်လပ်ပြီး တရားမျှတဲ့ ပါတီစုံ ဒီမိုကရေစီ အထွေထွေရွေးကောက်ပွဲကြီးကို ကျင်းပကာ ပေါ်ထွက်လာတဲ့ အစိုးရကို နိုင်ငံတော်တာဝန် လွှဲပြောင်းပေးသွားမယ်” ဟု ပြောဆိုခဲ့ခြင်းဖြစ်သည်။
သို့သော်လည်း မြန်မာစစ်တပ်သည် နိုင်ငံတော်အာဏာအား မတရားရယူထားသည့်အတွက် လက်ရှိ စစ်ကောင်စီအဖွဲ့သည် တရားဝင်မှုမရှိကြောင်းနှင့် စစ်ကောင်စီက ကျင်းပမည့် ရွေးကောက်ပွဲမှာလည်း အတုအယောင် ရွေးကောက်ပွဲသာ ဖြစ်ကြောင်း တိုင်းရင်းသားတော်လှန်ရေး လက်နက်ကိုင်များနှင့် ဒီမိုကရေစီအင်အားစုများက ပြောဆိုထားကြသည်။
လက်ရှိတွင် အာဏာသိမ်း စစ်ကောင်စီနှင့် စစ်အာဏာရှင် အမြစ်ပြတ်ရေးအတွက် တိုင်းရင်းသား တော်လှန်ရေးလက်နက်ကိုင်များနှင့် ၂၀၂၁ ခုနှစ်နောက်ပိုင်း ပေါ်ပေါက်လာသော ပြည်သူ့ကာကွယ်ရေးတပ်ဖွဲ့များက တိုက်ခိုက်နေကြသည်။
