Western News| မတ် ၂၂
ကရင်နီတော်လှန်ရေး ပူးပေါင်းတပ်ဖွဲ့များ ထိုးစစ်ဆင် တိုက်ခိုက်နေသော ဘောလခဲမြို့သိမ်းတိုက်ပွဲ အတွင်း စစ်ကောင်စီဖက်က ဗိုလ်မှူး မျိုးမင်းသူအပါအဝင် တပ်သား အများအပြား သေဆုံးသွားကြောင်း သိရသည်။
ကရင်နီပြည်နယ် ဘောလခဲမြို့ကို အပြီးသတ်သိမ်းပိုက်နိုင်ရန် ကရင်နီတော်လှန်ရေးတပ်ဖွဲ့များသည် မတ်လ ၁၉ ရက်နေ့က စ၍ စစ်ကြောင်း ၃ ခုဖြင့် ထိုးစစ်ဆင် တိုက်ခိုက်နေခြင်းဖြစ်ကြောင်း KA စစ်ရေးချုပ် ဗိုလ်မှူးကြီး ဘုန်းနိုင်က ပြောသည်။
ဘောလခဲမြို့သိမ်းတိုက်ပွဲမှာ နှစ်ဖက် အပြန်အလှန် ပြင်းပြင်းထန်ထန် တိုက်ခိုက်မှုကြောင့် တိုက်ပွဲမှာ ပြင်းထန်နေပြီး စစ်ကောင်စီဖက်မှ ဗိုလ်မှူး မျိုးမင်းသူ အပါအဝင် စစ်သားအများအပြား သေဆုံးကာ၊ စစ်သုံ့ပန်းများ၊ လက်နက်ခဲယမ်းများအား သိမ်းပိုက်ရရှိထားသည်ဟု ဗိုလ်မှူးကြီး ဘုန်းနိုင်က ဆိုသည်။
“စတာကတော့ တစ်ပတ်လောက်ရှိတယ်။ စာရင်းဇယားတော့ မပို့လားသေးဘူး။ ဒါပေမယ့် သေဆုံး ၊ ဒဏ်ရာရထားတာ၊ လက်နက်ခဲယမ်းတစ်ချို့လည်း သိမ်းဆည်းရရှိထားတယ်၊ အတိအကျတော့ မရ သေးဘူး။ ဆက်သွယ်ရေးအခက်အခဲဖြစ်လို့၊ သူသူငါငါချနေကြတော့ ပို့ဖို့ကလည်း အချိန်မရသေး ဘူး။ တိုက်ပွဲကဆက်ဖြစ်နေတယ်၊ ရအောင်လုပ်မယ်လေ။ အပြီးသိမ်းလိုက်မယ်၊ မဟုတ်ရင်ရှုပ်တယ်၊ ကျနော်တို့က အကိုင်းလိုက်ဖြတ်တော့ စစ်ရေးကြာတယ်လေ၊ အခုက ပင်ရင်းဖြတ်လိုက်မလို့” ဟု ပြောသည်။
ဘောလခဲဗျူဟာတွင် စစ်ကောင်စီတပ်က တပ်ရင်း ၃ ရင်းအထိုင်ချထားပြီး ရဟတ်ယာဉ်ဖြင့် စစ်အင်အားများလည်း ထပ်မံဖြည့်တင်းနေ၍ စစ်ကြောင်း ၃ ကြောင်းဖြင့် ထိုးစစ်ဆင် တိုက်ခိုက်နေသည်ဟု ကရင်နီတော်လှန်ရေးတပ်ဖွဲ့များက ပြောသည်။
“ကျနော်တို့ဖက်ကလည်း ထိခိုက်ဒဏ်ရာရတာရှိတယ်။ တချို့ကျတာလည်းရှိမယ်၊ ဒါပေမယ့် အ သေး စိတ်ကတော့ မရသေးဘူး။ ကျနော်တို့က စစ်ကြောင်း ၃ ကြောင်းနဲ့ တက်နေတယ်။ ဝိုင်းပြီးတော့ ဖြတ်ဖို့ အလုပ်လုပ်နေပါတယ်။ အဲဒါကတော့ ဘယ်အချိန်ပြီးမလဲ မသိဘူး။ ရှားတော ကျတော့ တစ်လ နီးပါးလောက်ကြမှ ပြီးတယ်လေ။ ရှားတောဗျူဟာက၊ အခု ဘောလခဲဗျူဟာ ကတော့ တပ်ရင်း ၃ ရင်း ထိုင်ထားတာကိုး။ တပ်ရင်း ၃ ရင်းဆိုတော့ လူများမလား၊ လူတော့ သိပ်မရှိတော့ဘူး ထင်တယ်။ ဒါပေမယ့် ဟတ်စကီးနဲ့ လာချတာတော့ ရှိတယ်ပေါ့၊ ဒါပေမယ့် ဒီနောက်ပိုင်းတော့ မလာနိုင်တော့ ဘူးထင်တယ်” ဟု KA စစ်ရေးချုပ် ဗိုလ်မှူးကြီးဘုန်းနိုင်က ပြောသည်။
စစ်ကောင်စီတပ် ဗျူဟာစခန်းမှ ပြည်သူလူထုနေထိုင်ရာရပ်ကွက်များအတွင်း လက်နက်ကြီးများဖြင့် ရမ်းသမ်းခတ်မှုရှိသောကြောင့် ဘောခဲမြို့နေ ပြည်သူများမှာ ဘေးလွတ်ရာထွက်ပြေးတိမ်းရှောင်နေ ကြရကြောင်း သိရသည်။
(ခေတ်သစ်မီဒီယာ သည် Western News ၏ မိတ်ဖက်မီဒီယာဖြစ်သည်)
