ရခိုင်ပြည်၊ တောင်ကုတ်နှင့် သံတွဲမြို့နယ်တို့မှာ စစ်ကျန်မြေမြှုပ်မိုင်း နင်းမိပြီး အရပ်သားနှစ်ဦး ပြင်းထန် ထိခိုက် ဒဏ်ရာ ရရှိသွားပြီး အရေးပေါ် ဆေးကုသမှုများ ခံယူနေရကြောင်း ဒေသခံများက ပြောသည်။

မတ် ၂၁ ရက်နေ့ ညနေ ၅ နာရီအချိန်လောက်က တောင်ကုတ်မြို့နယ်၊ ရန်ခိုရွာက အသက် ၇၃ နှစ်အရွယ်ရှိ ဦးကျော်မြင့် မှာ ရွာရှိ စာသင်ကျောင်းအနီးကို အလုပ်ကိစ္စတစ်ခုကြောင့် သွားလာရာမှာ မြေမြှုပ်မိုင်း နင်းမိခြင်း ဖြစ်သည်။

ဦးကျော်မြင့်မှာ ညာဖက်ခြေထောက်နှင့် ညာဖက်ဆီးအိမ်မှာ ပြင်းထန် ဒဏ်ရာ ရရှိခဲ့ပြီး ဆေးကုသမှု ခံယူနေရကြောင်း သိရသည်။

ထို့အပြင် မတ် ၂၀ ရက်နေ့ နံနက်ပိုင်းကလည်း ‌သံတွဲမြို့နယ်၊ ရီဖြူအိုင်ကျေးရွာက ကိုမောင်ဆန်းဝင်း ဆိုသူမှာလည်း စစ်ကျန်မြေမြှုပ်မိုင်း နင်းမိပြီး ခြေထောက်တစ်ဖက် ပြတ်သွားကြောင်း သိရသည်။

မောင်ဆန်းဝင်းသည် သူနေထိုင် ရီဖြူအိုင်ကျေးရွာ အနီးမှာ ထင်းခုတ်သွားရာကနေ စစ်ကျန်မြေမြှုပ်မိုင်း နင်းမိပြီး ညာဖက် ခြေမျက်စီအောက် ပြတ်သွားကာ အရေးပေါ် ဆေးကုသမှု ခံယူနေရကြောင်း ဒေသခံများက ပြောသည်။

ပြီးခဲ့သည့် မတ်လ ၁၉ ရက်နေ့ကလည်း မင်းပြားမြို့ သပြေညိုရပ်ကွက်မှ အသက် ၄၂ ကျော်အရွယ်ရှိ ဒေါ်စံဝင်းမေမှာ မင်းပြားမြို့ ကျိန်းတောင် တောင်ခြေရင်းသို့ ဟင်းရှာသွားရာကနေ မိုင်းနင်းမိ၍ ပြင်းထန် ဒဏ်ရာ ရရှိသွားခဲ့သည်။

ထို့အပြင် မောင်တောမြို့ လသာရပ်ကွက်မှ အသက် ၄၄ နှစ်အရွယ်ရှိ လသာရပ်ကွက်မှ အဒူဟာလေ့ခ် မှာ မတ် ၁၈ ရက်နေ့က ငါးရှာသွားစဥ် မိုင်းနင်းမိ၍ ခြေတစ်ဖက် ပြတ်ထွက်သွားခဲ့ပြီး စိုးရိမ်ရသည့် အခြေအနေ ရှိခဲ့သည်။

ပြီးခဲ့သည့် မတ် ၁၇ ရက်နေ့ ကလည်း နေအိမ်အတွင်း သန့်ရှင်းရေ လုပ်နေစဉ်မှာ စစ်ကျန်မိုင်းတလုံး ပေါက်ကွဲမှုကြောင့် တောက်ကုတ်မြို့၊ ကံပိုင်ရပ်ကွက်က အမျိုးသမီးတယောက် ဒဏ်ရာ ရ ရှိခဲ့သည်။

စစ်ကောင်စီတပ်စွဲခဲ့သည့် တောတောင် နေရာများနှင့် မြို့အတွင်း နေထိုင်ခဲ့သော အဆောက်အအုံများတွင် မြေမြှုပ်မိုင်း အများအပြား တွေ့ရှိခဲ့ပြီး နှစ်ဖက် တိုက်ပွဲ ဖြစ်ပွားခဲ့သည့် နေရာများ၌ မြေမြှုပ်မိုင်း များစွာရှိနေသည်။

တစ်ဖက်တွင် အာရက္ခတပ်တော် AA က စစ်ကျန်လက်နက် အန္တရာယ်နှင့် ပတ်သက်၍ မိုင်း အသိပညာပေး ဟောပြောပွဲများ၊ မိုင်းအန္တရာယ်ဆိုင်ရာ သတိပေးချက် လုပ်ဆောင်နေသော်လည်း ထိခိုက် သေဆုံးမှုများ ယခင်ကထက် မြင့်တက်လာနေသည်။

အာရက္ခတပ်တော် AA အနေဖြင့် မိုင်းရှင်းလင်းရေးနှင့် မိုင်း အသိပညာပေး ဟောပြောပွဲများ၊ မိုင်းအန္တရာယ်ဆိုင်ရာ သတိပေးချက်များကို ယခုထက် ပိုမို့ လုပ်ဆောင်ရန် လိုအပ်နေကြောင်း ပြည်သူများက ပြောဆိုသည်။