ဒေါ်စောမြရာဇာလင်း ဦးဆောင်သည့် ရခိုင်ပြည် လွတ်မြောက်ရေးပါတီ ALPနှင့် ပြည်နယ် စစ်ကောင်စီတို့ အဖွဲ့သည့် စစ်တွေမြို့နယ်တွင် အရပ်သားများကို စစ်သားစုဆောင်းရေးများ ထပ်မံ လုပ်ဆောင်နေကြောင်း သိရသည်။

စစ်သားစုဆောင်းရေးများကို ရခိုင်ပြည် လွတ်မြောက်ရေးပါတီ ALPနှင့် စစ်တွေမြို့အတွင်း ရပ်ကွက်များတွင် လုပ်ဆောင်နေခြင်းဖြစ်ပြီး စစ်ကောင်စီကမူ စစ်တွေမြို့နယ်က ကျေးရွာများ ကို လုပ်ဆောင်နေခြင်း ဖြစ်ကြောင်း မြို့ခံများက ပြောသည်။

စစ်တွေမြို့နယ်၊ ဘုမေ၊ သက္ကယ်ပြင်၊ ဓားပိုင်၊ ဆေးသမား၊ ခေါင်းဒုက္ကာနှင့် အောင်မင်္ဂလာရပ်ကွက်တို့က မွတ်ဆလင်များကို စစ်ကောင်စီက ကျေးရွာ ရပ်ကွက် အုပ်ချုပ်ရေးမှူးများမှ တစ်ဆင့် စစ်မှုထမ်းရန်အတွက် စာရင်း ကောက်ခံခဲ့ကြောင်း သိရသည်။

စစ်တွေမြို့ ရပ်ကွက် အုပ်ချုပ်ရေးမှူးတစ်ဦးက “စာရင်းတွေ ကောက်နေတာတွေက ကြာပါပြီ၊ ဒီလထဲမှာတော့ နှစ်ခါ ရှိပါပြီ။ မြို့နယ်က ရပ်ကွက် အုပ်ချုပ်ရေးမှူးတွေကို ခေါ်တယ်။ စစ်မှူးထမ်းအတွက် ရပ်ကွက်တစ်ခုကနေ ဘယ်နှစ်လောက် ပေးနိုင်မလဲပေါ့နော်။ အဲ့လိုမေးတယ်။ ပြီးတော့ လက်ရှိ ရပ်ကွက်မှာ ရှိတဲ့ လူဦးရေ စာရင်းကို မေးတယ်။ အဓိကတော့ အသက် ၁၈ ကနေ ၃၅ နှစ်အတွင်း မှာရှိတဲ့ လူဦးရေ စာရင်း ပေးရပါတယ်”ဟုပြောသည်။

ထို့အပြင် စစ်တွေမြို့ပေါ် ရပ်ကွက် အချို့နှင့် စစ်ရှောင်များ နေထိုင်သည့် ဘုန်းတော်ကြီးများကိုလည်း စစ်ကောင်စီနှင့် ALP တပ်ဖွဲ့ဝင်များက ဝင်ရောက်ပြီး စစ်မှုထမ်းရန် စာရင်းကောက်ယူမှုများ ရှိကြောင်း ပြောသည်။

“ဦးဇင်းကျောင်းကို မကြာခဏဆိုသလို စစ်ကောင်စီနဲ့ ALP တပ်ဖွဲ့ဝင်တွေ ဝင်ပြီးတော့ စစ်တာတွေ ရှိပါတယ်။ လူစာရင်းတွေကောက်တယ်။ ပြီးတော့ လူငယ်လူလတ်ပိုင်းတွေ အရေအတွက်နဲ့ အသက်အပိုင်းအခြားတွေကို ကောက်ပါတယ်။ ဒီလူငယ်တွေကို ဘယ်မှ မသွားဖို့ မလာဖို့ ပြောပါတယ်။ သူတို့ စာရင်းတွေ အကုန် ယူသွားပါတယ် “ဟုပြောသည်။

စစ်တွေမြို့က ဘုန်းတော်ကြီးကျောင်း ၅၃ ကျောင်းတွင် စစ်ရှောင်စခန်းများ ဖွင့်လှစ်ထားပြီး စစ်ရှောင်ဒုက္ခသည် အရေအတွက် ၁ သောင်းခန့်ရှိကြောင်း ကူညီစောင့်ရှောက်ပေးနေသူများက Western News ကို ပြောသည်။

စစ်တွေမြို့အနီးက ပလ္လင်ပြင်၊ အောင်ဒိုင်၊ ကျက်တောပြင်၊ ကြွီတဲပိုက်ဆိပ်ကြီး၊ ကြွီတဲပိုက်ဆိပ်ချေ၊ ကြွီတဲကျေး၊ အုန်းရေဖော်၊ ရေချမ်းပြင်၊ ပျားလယ်ချောင်း (ရွာသစ်)/(ရွာဟောင်း) စသည့် ကျေးရွာတို့ကို စစ်ကောင်စီတပ်က နှင်ထုတ်ထားသည်။

သင်းပုန်းတန်း၊ မောင်နီပြင်၊ ပါဒလိတ်၊ အမြင့်ကျွန်း၊ ကျေးတော၊ ရွှေပြည်သာ စသည့် ကျေးရွာများအပါအဝင် ရွာပေါင်း ၂၀ ကျော်မှာ စစ်ကောင်စီတပ်၏ နှင်ထုတ်ခြင်းကို ခံထားရပြီး စစ်တွေတွင် စစ်ရှောင်အဖြစ် နေထိုင်နေကြရသည်။

ယခုနှစ် ဇန်နရီ လဆန်ပိုင်းမှစ၍ မတ်လအတွင်း စစ်တွေမြို့နယ်ရှိ ဘုမေ၊ ဘာဆာ၊ သဲချောင်း၊ သက္ကယ်ပြင်၊ ဘောဒူဖ၊ အုန်းတောကြီးစသည့်ကျေးရွာ အပါအဝင် ဒုက္ခသည်စခန်းတို့မှ စစ်မှုထမ်းဖို့အတွက် လာရောက်ပြီး စာရင်းကောက်ယူခဲ့သည်။

ဖေဖော်ဝါရီလ ပထမ အပတ်ကစ၍ စစ်ကောင်စီ၏ စစ်တပ်နှင့် ရဲတပ်ဖွဲ့ဝင်တို့သည် ဧည့်စာရင်း စစ်ဆေးသည့် အဆင့်ထက် ကျော်လွန်ပြီး အသက် ၁၄ နှစ်မှ ၄၅ နှစ်အတွင်းရှိ အမျိုးသားများအား စာရင်းပြုစုကာ သီးသန့်ခေါ်ယူ တွေ့ဆုံခဲ့သည်။

ရခိုင်ပြည်နယ် ပြည်နယ်ဝန်ကြီးချုပ် ထိန်လင်း ဦးဆောင်ပြီး ပြည်သူ့စစ်မှုထမ်း ဆင့်ခေါ်ရေးအဖွဲ့ကို ပြီးခဲ့သည့် ၂၀၂၄ ခုနှစ် မတ်လ ၈ ရက်နေ့ကလည်း ပြည်နယ်အစိုးရ ရုံးတွင် အစည်းအဝေးတစ်ရပ် ပြုလုပ်ခဲ့သည်။

ခရိုင်၊ မြို့နယ်အဆင့် ပြည်သူ့စစ်မှုထမ်း ဆင့်ခေါ်ရေးအဖွဲ့ကို ဖွဲ့စည်းတာဝန်ပေးအပ်ခဲ့ပြီး လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန (လဝက) ရုံးမှာရှိသော စာရင်းများ ကိုအခြေခံပြီး စာရင်းကောက်ယူခြင်း ဖြစ်သည်။

စစ်တွေမြို့နယ်မှာ မွတ်ဆလင်များအား စစ်သင်တန်းဆင်း ၁၀၀၀ ကျော်ဖြင့် စစ်တွေမြို့အတွင်း တပ်ရင်းများကို ပို့ဆောင်ထားပြီး ထိုးစစ်ကို ခုခံရင် ပြင်ဆင်နေကြောင်း သတင်းရင်းမြစ်က ပြောသည်။

စစ်တွေမြို့နယ်ရှိ ဘုမေ၊ ဘာဆာ၊ သဲချောင်း၊ သက္ကယ်ပြင်၊ ဘောဒူဖ၊ အုန်းတောကြီးစသည့်ကျေးရွာ အပါအဝင် ဒုက္ခသည်စခန်းတို့မှ မွတ်ဆလင်များကို ပြီးခဲ့သည့် ၂၀၂၄ ခုနှစ်က စစ်သင်တန်း တက်ရောက်စေရန် စစ်ကောင်စီက ခေါ်ယူခဲ့သည်။

ပြီးခဲ့သည့် ရသေ့တောင်၊ ဘူးသီးတောင်၊ မောင်တော တိုက်ပွဲများတွင် စစ်ကောင်စီဖက်က စစ်မှုထမ်း မွတ်ဆလင် အများအပြားကို စစ်မြေပြင်သို့ ပို့ဆောင်ခဲ့ပြီး တိုက်ပွဲအတွင်း သေဆုံးသူ အများရှိခဲ့ကာ လက်နက်ချ အလင်းဝင်ရောက်သူများလည်း ရှိခဲ့သည်။

စစ်တွေတွင် ဒေသကွပ်ကွဲမှု စစ်ဌာနချုပ် ဒကစ စစ်တွေ ခလရ ၂၀၊ ခလရ ၂၃၂၊ ခလရ ၂၇၀၊ ခမရ ၃၄၄၊ ခမရ ၃၅၄ အပါအဝင် အမြောက်တပ်၊ တပ်ရင်း၊ ရဲတပ်ရင်း ၁၀ ခုနီးပါးရှိနေပြီး AA ၏ ထိုးစစ်ကို ခုခံရန်အတွက် အဆင့်သင့်အနေ ရှိနေသည်။

စစ်တွေမြို့အနီး စစ်ကောင်စီ၏ အမြင့်ကျွန်းက တပ်စခန်းများ၊ ဒကစ ဌာနချုပ်အနီးက တပ်ရင်းများ၊ ပါဒလိပ်က တပ်ရင်းများ၊ ရေချမ်းပြင်က တပ်စခန်းများနှင့် ရွှေမင်းဂံရေတပ်စခန်းမှာ AA ၏ တိုက်ခိုက်မှုကို ခံနေရသည်။