ဘင်္ဂလားဒေ့ရှ်နှင့် ရခိုင်ပြည် နယ်စပ် မောင်တောဒေသတွင် လက်နက်ကိုင် ARSA အဖွဲ့က မတ်လ ၂၉ ရက်နေ့က တိုက်ခိုက်ခဲ့၍ အာရက္ခတပ်တော် AA တပ်သား ၂ ဦး သေဆုံးသွားကြောင်း သိရသည်။
မောင်တောဒေသ တောင်ပြို-ကြိမ်ချောင်း ကားလမ်းတွင် ဆိုင်ကယ်နှင့် ကင်းလှည့်သွားလာနေသော AA တပ်ဖွဲ့နှစ်ဦးကို အင်အား ၂၀ ခန့်ပါသော ARSA တပ်ဖွဲ့ဝင်များက ခြုံခိုတိုက်ခိုက်ခဲ့ခြင်းဖြစ်သည်။
၁မိနစ် ၂၅ စက္ကန့်ရှိ အဆိုပါဖိုင်တွင် ARSA တပ်ဖွဲ့ဝင်များက ခြုံကြားကနေ ထွက်လာပြီး ပစ်ခတ်မှု စတင်လုပ်ဆောင်ကာ AA တပ်ဖွဲ့ဝင်များ ဆိုင်ကယ် စီးနင်းလာသည်ကို တရပ်စက် ပစ်ခတ်ခဲ့သည်။
အာရက္ခတပ်တော် AA တပ်ဖွဲ့ဝင်များအား ခြုံတိုက်ခိုက်သည့် ရုပ်သံဖိုင်ကို ARSA တပ်ဖွဲ့ဝင်များက ယနေ့ မတတ် ၃၁ ရက်နေ့တွင် လူမှုကွန်ရက်စာမျက်နှာတွင် ထုတ်ပြန်ထားသည်။
“ရုပ်သံဖိုင်ကို ကြည့်ရတာ AA တပ်ဖွဲ့ဝင်နှစ်ဦးက ဆိုင်ကယ်နဲ့ ကင်းလှည့်နေတာကို တွေ့ရတယ်။ အဲဒါကို ကားလမ်းဘေးကနေ ARSA တပ်ဖွဲ့ဝင် ၂၀ လောက်က ခြုံခိုတိုက်ခိုက်တာ တွေ့ရတယ်။ AA တပ်ဖွဲ့ ၂ ယောက်မှာ ဦးခေါင်းတွေနဲ့ ခန္ဓာကိုယ်မှာ ထိခိုက်လို့ သေဆုံးသွားခဲ့ရပါတယ်။ သေနတ်တွေကို ARSA တပ်ဖွဲ့ဝင်တွေက ယူသွားပါတယ်” ဟု ရခိုင်ဒေသခံတစ်ဦးက ပြောသည်။
ARSA ၏ ဆိုပါ ခြုံတိုက်ခိုက်မှု အပါအဝင် AA တပ်သား ၂ ဦး သေဆုံးသွားသည်ကို အာရက္ခတပ်တော် AA ဖက်က တစ်စုံတစ်ရာ ထုတ်ပြန်ထားခြင်းမရှိသေးသလို ပြောရေးဆိုခွင့် ရှိသူ ဦးခိုင်သုခကို မေးမြန်းနေဆဲ ဖြစ်သည်။
ရခိုင်ပြည် ဘူးသီးတောင်၊ မောင်တော ဒေသတွင် လက်နက်ကိုင် ARSA အဖွဲ့သည် ဒေသခံပြည်သူများအား မတရားဖမ်းဆီးခြင်း၊ သတ်ဖြတ်ခြင်း အပြင် AA တပ်ဖွဲ့ဝင်များကိုလည်း မကြာခဏ တိုက်ခိုက်မှု ပြုလုပ်လျက်ရှိသည်။
၂၀၂၄ ခုနှစ် အောက်တိုဘာလ ၇ ရက်နေ့ကလည်း လူပျောက်သွားရှာသော AA ၏ လုံခြုံရေးတပ်ဖွဲ့ဝင် ၃ ဦးကို ARSA အဖွဲ့က ဘူးသီးတောင်မြို့နယ် ဂုံးနားကျေးရွာအနီးတွင် ခြုံခိုတိုက်ခိုက်ခဲ့၍ AA လုံခြုံရေးတပ်ဖွဲ့ဝင် ၁ သေဆုံးခဲ့ပြီး ၂ ဦးဒဏ်ရာ ရရှိခဲ့သည်။
ရခိုင်ပြည်စပ်ဒေသတွင် လုံခြုံရေးသတိကို ပေါ့လျော့၍ လုံးဝမရကြောင်းနှင့် ခေါင်းဆောင်တစ်ဦး ပြောင်းသွားရုံ၊ အဖမ်းခံရရုံးဖြင့် ARSA ၏ ရည်မှန်းချက်များမှာ ပြောင်းချင်မှ ပြောင်းမည်ဟု ရခိုင်နိုင်ငံရေးအကျဉ်းသားဟောင်း ဦးဝေဟင်အောင်က Western News ကို ပြောသည်။
“လုံခြုံရေးသတိဆိုတာ လုံးဝ ပေါ့လျော့လို့ မရဘူး။ လုံခြုံရေးသတိဟာ အချိန်ပြည့်ရှိနေဖို့ လိုအပ်တယ်။ လူတိုင်းလူတိုင်းဟာ လုံခြုံရေးသတိဟာ ပေါ့လျော့လို့ မရဘူး။ ခေါင်းဆောင်တစ်ယောက် ပြောင်းသွားရုံလောက်နဲ့တော့ သူတို့ရည်မှန်းချက်တွေ ပြောင်းချင်မှ ပြောင်းမယ်ပေါ့” ဟု ပြောသည်။
မွတ်ဆလင်စစ်သွေးကြွ လက်နက်ကိုင် ARSA ၏ ခေါင်းဆောင်ကြီး အာတာအူလာ နှင့် ထိပ်တန်းခေါင်းဆောင်များကို ဘင်္ဂလားဒေ့ရှ်အစိုးရက မတ်လ ၁၇ ရက်တွင် ဖမ်းဆီးလိုက်သည်။
အာတာအူလာ ဖမ်းဆီးခံရသော်လည်း ARSA အဖွဲ့ဝင်တွင် နောက်ထပ် ခေါင်းဆောင်တစ်ဦး အသစ်တင်မြှောက်ထားကြောင်း ပြီးခဲ့သည့်အပတ်က သတင်းထွက်ပေါ်ခဲ့သည်။
ARSA အဖွဲ့ကို အကြမ်းဖက်အဖွဲ့အဖြစ် နိုင်ငံတကာ လူ့အခွင့်အရေးအဖွဲ့များနှင့် AA က ထုတ်ပြန်ကြေညာထားပြီး ARSA အဖွဲ့သည် ဘင်္ဂလားဒေ့ရှ်နှင့် ရခိုင်ပြည်အတွင်း အရပ်သားပြည်သူများအပေါ် မတရားဖမ်းဆီးခြင်း၊ သတ်ဖြတ်ခြင်း၊ စစ်သားစုဆောင်းခြင်းနှင့် ငွေညစ်လုယက်ခြင်းများ စသည့် စစ်ရာဇဝတ်မှုကျူးလွန်နေသော အဖွဲ့ဖြစ်သည်ဟုလည်း သတ်မှတ်ထားကြသည်။
