ချင်းညီနောင်အဖွဲ့ဝင် ဇိုမီးတော်လှန်ရေးတပ် (ဇိုမီးဖက်ဒရယ်အစည်းအရုံး) ZFU/PDF ZOLAND တည်ထောင့် ၄ နှစ်ပြည့်အခမ်းအနားကို ချင်းပြည်နယ် ထိန်းချုပ်နယ်မြေတစ်ခုတွင် ကျင်းပ ပြုလုပ်ခဲ့သည်။

ဇိုမီးဖက်ဒရယ်အစည်းအရုံး (ဇိုမီးတပ်) သည် ၂၀၂၅ ခုနှစ် မတ်လ ၃၀ ရက်တွင် တပ်ထောင်နေ့ ၄ နှစ်ပြည့်မြောက်ခဲ့ပြီး ချင်းပြည်နှင့် ချင်းအမျိုးသားများ လွတ်မြောက်ရေးအတွက် တိုက်ပွဲဝင်နေသော ချင်းညီနောင်တပ်ဖွဲ့တစ်ခုဖြစ်သည်။

ဇိုမီးဖက်ဒရယ်အစည်းအရုံး ZFU/ PDF ZOLAND သည် ယနေ့ မတ်လ ၃၁ ရက်တွင် တပ်တည်ထောင်နေ့ အခမ်းအနားပုံများအား ထုတ်ပြန်ထားပြီး စစ်အာဏာရှင်တော်လှန်ရေး ၄ နှစ်တာအတွင်းမှာ ရဲဘော်များ အသက်ပေးဆပ်ခြင်းနှင့် ကိုယ်လက်အင်္ဂါဆုံးရှုံးခဲ့ရသည်ဟု ဆိုသည်။

ရဲဘော်များ၏ ပေးဆပ်မှုများကြောင့် ဇိုမီးဖက်ဒရယ်အစည်းအရုံးအနေဖြင့် ထိုက်တန်သော အောင်မြင်မှု များစွာ ရရှိခဲ့ပြီး အဆိုပါ အောင်မြင်မှုများမှာ ဇိုမီးတပ်တစ်ခုတည်း၏ ခွန်အားကြောင့် မဟုတ်ဘဲ ပြည်သူလူထုများ၏ ထောက်ခံတွန်းအားကြောင့်လည်း ပါသည်ဟု ပြောသည်။

ချင်းညီနောင်အဖွဲ့များကလည်း ဇိုမီးဖက်ဒရယ်အစည်းအရုံး ZFU ၏ ၄ နှစ်ပြည့်အခမ်းအနားကို ဂုဏ်ပြုသဝဏ်လွှာ မတ်လ ၃၀ ရက်နေ့က ပေးပို့ထားသည်။

ဇိုမီးလူမျိုးများအပါအဝင် ချင်းပြည်သူတစ်ရပ်လုံး ဘေးကင်းလုံခြုံရေးနှင့် လွတ်မြောက်ရေးအတွက် ZFU ၏ အနာဂတ် ရည်မှန်းချက် ပန်းတိုင်မှန်သမျှ ပြီးမြောက်အောင်မြင်နိုင်ပါစေကြောင်း ချင်းညီနောင်အဖွဲ့က ဆုတောင်းထားသည်။

စစ်အာဏာရှင် စနစ်အမြစ်ဖြတ်ရေး၊ ဖက်ဒရယ်ဒီမိုကရေစီစ နစ်ပေါ်ပေါက်လာရေး၊ ချင်းပြည်လွတ်မြောက်ရေး၊ ကိုယ့်ကြမ္မာကိုယ်ဖန်တီးနိုင်ရေး၊ တရားမျှတရေးနှင့် တန်းတူညီမျှရေးကို အခြေခံသော ချင်းပြည်တည်ဆောက်ရေးတို့အတွက် တိုက်ပွဲဝင်နေသည်။

ချင်းညီနောင်အဖွဲ့သည် ZFU/PDF Zoland နှင့်အတူ တော်လှန်ရေးပန်းတိုင် ရောက်သည်အထိ ခိုင်ခိုင်မာမာ ရပ်တည်သွားမည်ဖြစ်ပြီး အသက်စွန့်ခဲ့ကြသော အာဇာနည်သူရဲကောင်းများနှင့် ပြည်သူလူထု၏ မျှော်လင့်ချက်များကို မလျှော့သောဇွဲဖြင့် ဆက်လက်အကောင်ထည်ဖော်သွားမည်ဟု ဆိုသည်။

၄ နှစ်တာ တော်လှန်ရေးခရီးတွင် ZFU/PDF Zoland အနေဖြင့် ရရှိခဲ့သော နိုင်ငံရေး၊ စစ်ရေး အောင်မြင်မှုများ၊ အတွေ့အကြုံများနှင့် သင်ခန်းစာများကို အသုံးချပြီး ထိန်းချုပ်နယ်မြေများဖြစ်သည့် တီးတိန်နှင့် တွန်းဇံမြို့နယ်များအတွင်း စစ်ကောင်စီနှင့် အာဏာရှင်စနစ်ဆိုး ပပျောက်အောင် စွမ်းဆောင်နိုင်ရန် ချင်းညီနောင်အဖွဲ့က ထုတ်ပြန်ထားသည်။