အာဏာသိမ်း စစ်ကောင်စီက မြောက်ဦးမြို့ကို လေကြောင်းဗုံးကြဲတိုက်ခိုက်ပြီး ကျောက်ဖြူမြို့နယ် ဇင်ချောင်းရွာကို နေဗီက လက်နက်ကြီးနှင့် ပစ်ခတ်၍ သံဃာတော်အပါအဝင် အရပ်သား ၃ ဦးသေဆုံးပြီး ကိုရင်အပါအဝင် အရပ်သား ၇ ဦး ဒဏ်ရာရရှိသွားသည်။

မြောက်ဦးမြို့ အလယ်ဈေးရပ်ကွက်ကို မတ်လ ၃၁ ရက် ည ၈ နာရီကျော်အချိန်တွင် စစ်ကောင်စီက လေကြောင်းဗုံးကြဲတိုက်ခိုက်ခဲ့၍ အသက် ၆၆ နှစ်အရွယ် ဦးအောင်ကျော်ဇံ သေဆုံးသွားကြောင်း ဒေသခံများက ပြောသည်။

“မနေ့က ည ၈ နာရီကျော်လောက်မှာ Cluster (ပဒေသာဗုံး) တစ်လုံးနဲ့ အလယ်ဈေးရပ်ကွက်ကို ဗုံးကြဲခဲ့တယ်။ အသက် ၆၀ ကျော်အရွယ် အမျိုးသားတစ်ဦး သေဆုံးသွားပါတယ်။ ဒီလောက်ဗျာ ငလျင်ကြောင့် တစ်နိုင်ငံလုံး ပူဆွေးဒုက္ခရောက်နေတဲ့အချိန်မှာ အရပ်သားတွေကို ဗုံးကြဲတိုက်ခိုက်နေတယ်။ တော်တော်လေးကို ရက်စက်တာဗျာ” ဟု မြောက်ဦးဒေသခံတစ်ဦးက ပြောသည်။

ကျောက်ဖြူမြို့နယ် ဇင်ချောင်းရွာကြီးကိုလည်း မတ်လ ၃၁ ရက်နေ့ နံနက် ၉ နာရီကျော်အချိန်တွင် နေဗီက လက်နက်ကြီးနှင့် ပစ်ခတ်၍ သံဃာတော် တစ်ပါး အပါအဝင် အရပ်သား ၂ ဦးသေဆုံးပြီး ဆရာတော်ကြီးတစ်ပါးနှင့် ကိုရင်အပါအဝင် အရပ်သား ၇ ဦး ဒဏ်ရာ ပြင်းထန်စွာ ရရှိသွားသည်။

မင်းရပ်တိုက်နယ် ဝါးနက်ချွိန်ကျေးရွာအနီး ပင်လယ်ပြင်တွင် ရပ်နားထားသော စစ်ကောင်စီ နေဗီက လက်နက်ကြီး ၃ လုံးဖြင့် ဇင်ချောင်းကျေးရွာကို ပစ်ခတ် တိုက်ခိုက်ခဲ့သည်။

“ဆရာတော် တစ်ပါး ပျံလွန်တော်မူသွားတယ်။ အရပ်သား ၁ ဦးသေတယ်။ နောက် ဆရာတော်ကြီး တစ်ပါးနဲ့ ကိုရင်တွေ ဒဏ်ရာရတယ်။ စုစုပေါင်း အရပ်သား ၇ ဦး ဒဏ်ရာ ရသွားပါတယ်။ အခု ဆေးကုသမှု ခံယူနေရရပါတယ်။ စစ်ကောင်စီရဲ့ စစ်ရာဇဝတ်မှုတွေကို နိုင်ငံတကာက ထိထိရောက်ရောက် အရေးယူပေးစေချင်ပါတယ်” ဟု ကျောက်ဖြူဒေသခံတစ်ဦးက တောင်းဆိုထားသည်။

ပျံလွန်တော်မူသွားသော သံဃာမှာ ကျောက်ဖြူမြို့နယ် ဇင်ချောင်း ကုန်ဘွေရွာက အသက် ၃၂ နှစ်အရွယ် အသျှင်အာဒိစ္စ ဖြစ်ပြီး သေဆုံးသွားသော အရပ်သားက အသက် ၃၀ အရွယ် ဦးဘဂျမ်းဖြစ်ပြီး ကုန်ဘွေကျေးရွာကပဲ ဖြစ်သည်။

ဒဏ်ရာရသူများမှာ အသက် ၇၄ နှစ်အရွယ် ဆရာတော်ကြီး အသျှင်ဇနိတ၊ အသက် ၁၂ နှစ်အရွယ် ကိုရင် သျှင်ဓမ္မာနန္ဒ၊ အသက် ၄၅ နှစ်အရွယ် ဦးမောင်ထွန်းမြ၊ အသက် ၅၀ အရွယ် ဒေါ်သန်းသန်းအေးတို့ဖြစ်ပြီး ဇင်ချောင်းကုန်ဘွေရွာက ဖြစ်သည်။

ယင်းအပြင် အုန်းတောကျေးရွာမှ ဇင်ချောင်းတွင် စစ်ရှောင်နေသော အသက် ၃၁ နှစ်အရွယ် ဒေါ်ဖြိုးဖြိုးဝင်း၊ ကင်းပင်လယ်ရွာက စစ်ရှောင်လာသော အသက် ၅၅ နှစ်အရွယ် ဒေါ်သိန်းဟန်နု၊ ဆင်တက်မော်ရွာက စစ်ရှောင်လာသော အသက် ၁၆ နှစ်အရွယ် မခင်မြအေး တို့မှာလည်း ဒဏ်ရာ ရရှိသွားကြသည်။

စစ်ကောင်စီ၏ နေဗီက လက်နက်ကြီး ပစ်ခတ်မှုကြောင့် ကျောက်ဖြူ ဇင်ချောင်းက ဘုန်းတော်ကြီးကျောင်း၊ နေအိမ်အချို့လည်း ပျက်စီးသွားကြောင်း သိရသည်။

မတ်လ ၂၈ ရက်နေ့က လှုပ်ခတ်ခဲ့သော ငလျင်ကြောင့် မန္တလေး၊ စစ်ကိုင်း၊ နေပြည်တော်၊ ရှမ်း၊ မကွေး၊ ပဲခူးတိုင်းတို့တွင် ထိခိုက်သေဆုံး၊ ဒဏ်ရာရ၊ အိုးအိမ်များပျက်စီးပြီး တစ်နိုင်ငံလုံး ဝမ်းနည်းပူဆွေးသောက ရောက်နေချိန်တွင် စစ်ကောင်စီက ရခိုင်ပြည်ကို ဆက်တိုက် ဗုံးကြဲတိုက်ခိုက်နေသည်။

မတ်လ ၃၀ ရက် ညနေ ၇ နာရီကျော်အချိန်ကလည်း ကျောက်ဖြူမြို့နယ် ကုလဘာကျေးရွာကို ဓညဝတီရေတပ်က ဒရုန်းတစ်စီးဖြင့် ဗုံးကြဲတိုက်ခဲ့ကြောင်း ဒေသခံများထံမှ သိရသည်။

ကုလဘာကျေးရွာ အနောက်ဘက်ခြမ်းကို ဗုံးသီးများ ကျရောက်ပေါက်ကွဲခဲ့ပြီး နေအိမ်အချို့နှင့် ဆိုင်ခန်းတစ်ခု ပျက်စီးသွားသည်။

မတ်လ ၂၈ ရက်နေ့ ငလျင်လှုပ်ခတ်ချိန်နှင့် လှုပ်ခတ်ပြီးနောက် တိုင်းနှင့်ပြည်နယ်မှ နေရာ ၅ ခုကိုလည်း စစ်ကောင်စီက လေကြောင်းဗုံးကြဲတိုက်ခိုက်ခဲ့သည်။

နောင်ချိုမြို့နယ် ကံကြီးကျေးရွာ၊ နောင်လင်ကျေးရွာ၊ ကရင်ပြည်နယ် KNU တပ်မဟာ ၇ နယ်မြေရှိ လေးဝါးကျေးရွာ၊ စစ်ကိုင်းတိုင်း ချောင်းဦးမြို့နယ် နွယ်ခွေးကျေးရွာနှင့် စစ်တောင်းမြစ် အရှေ့ဘက်ကမ်း ဖြူးမြို့နယ် ကျေးရွာများကို စစ်ကောင်စီက ဗုံးကြဲတိုက်ခိုက်ခဲ့ခြင်းဖြစ်သည်။

အဆိုပါ ဗုံးကြဲတိုက်ခိုက်မှုအားလုံးသည် ငလျင်လှုပ်ခတ်ချိန်နှင့် လှုပ်ခတ်ပြီး နာရီပိုင်းအကြာတွင် စစ်ကောင်စီက အရပ်သားပြည်သူများရှိရာ နေရာများသို့ အကြမ်းဖက် ဗုံးကြဲတိုက်ခိုက်ခဲ့ခြင်းဖြစ်သည်။

ငလျင်ကြောင့် မြန်မာပြည်သူများ သေဆုံးမှုအရေအတွက် တိုးလာချိန်တွင် စစ်ကောင်စီက နိုင်ငံအနှံ့ လေကြောင်းဗုံးကြဲတိုက်ခိုက်နေခြင်းသည် လုံးဝ လက်ခံနိုင်စရာ မရှိကြောင်း မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးကိုယ်စားလှယ် တွမ်အန်ဒရူးစ်က ပြောသည်။

“စစ်ကောင်စီတပ်က နိုင်ငံအနှံ့ လေကြောင်းကနေ ဗုံးဆက်ကြဲနေတာဟာ လုံးဝ တရားလွန်တဲ့ကိစ္စ၊ လက်ခံနိုင်စရာမရှိတဲ့ကိစ္စ ဖြစ်တယ်။ စစ်တပ်အပေါ် ဩဇာရှိတဲ့ ဘယ်သူမဆို ဖိအားပေးပြီး ဒါဟာ လက်ခံနိုင်စရာမရှိကြောင်း ရှင်းအောင်ပြောဖို့ လိုတယ်။ စစ်ကောင်စီအနေနဲ့ စစ်ဆင်ရေးအားလုံး ရပ်လိုက်ဖို့ ကျနော်တောင်းဆိုပါတယ်” ဟု ပြောသည်။

ငလျင်ကြောင့် ထိခိုက်နေသည့် ပြည်သူများကို ကယ်ဆယ်ရန် ကြိုးပမ်းရမည့်အချိန်တွင် မြန်မာစစ်တပ်က ဗုံးကြဲနေခြင်းသည် အလွန်အံ့အားသင့်ရကြောင်း တွမ်အန်ဒရူးစ်က ဆိုသည်။

အာဏာသိမ်း စစ်ကောင်စီသည် ရခိုင်ပြည်အပါအဝင် နိုင်ငံတစ်ဝန်းက လက်လွှတ်ဆုံးရှုံးထားရသော နေရာဒေသများကို လေကြောင်း ဗုံးကြဲတိုက်ခိုက်ခြင်း၊ လက်နက်ကြီးပစ်ခတ်ခြင်းနှင့် ဒရုန်းတိုက်ခိုက်မှုများကို ဆက်တိုက်ပြုလုပ်နေခြင်းဖြစ်သည်။