Western News| ဧပြီ
တိုက်ပွဲ ဖြစ်ပွားလျက်ရှိသော နေရာများတွင် ထိုးစစ်များကို ပြုလုပ်မည်မဟုတ်ဘဲ တစ်လတာ အပစ်ရပ်ကြောင်း ညီနောင်မဟာမိတ် ၃ ဖွဲ့က ထုတ်ပြန် ကြေညာသည်။
မဟာမိတ် သုံးဖွဲ့မှ စတင်ထိုးစစ်ဆင်တိုက်ခိုက်မှု ပြုလုပ်မည်မဟုတ်ဘဲ ဧပြီလ ၁ ရက်နေ့မှ ၃၀ ရက်နေ့ အထိ တစ်လတာ တစ်ဖက်သတ် အပစ်အခတ်ရပ်စဲကြောင်း ထုတ်ပြန် ကြေညာချက်တွင် ဖော်ပြသည်။
အာရက္ခတပ်တော် AA၊ မြန်မာအမျိုးသား ဒီမိုကရက်တစ် မဟာမိတ်တပ်မတော်နှင့် တအောင်း အမျိုးသား လွတ်မြောက်ရေး တပ်မတော် တို့က အဆိုပါ ထုတ်ပြန်ချက်ကို ယနေ့ ဧပြီ ၁ရက်နေ့ ညနေမှာ ထုတ်ပြန်သည်။
နိုင်ငံတွင်း ငလျင်နောက်ဆက်တွဲ ကယ်ဆယ်ရေးလုပ်ငန်းများ အမြန်ဆုံး ထိရောက်စွာ ဆောင်ရွက်နိုင်ရန် တိုက်ပွဲဖြစ်ပွားလျက်ရှိသော နေရာများတွင် ထိုးစစ်များကို ပြုလုပ်မည်မဟုတ်ကြောင်း ဆိုသည်။
ထုတ်ပြန်လိုက်သည့် နေ့မှစ၍ ညီနောင်မဟာမိတ်များနှင့် စစ်ကောင်စီတို့ တိုက်ပွဲဖြစ်ပွားလျက်ရှိသော နေရာများတွင် ညီနောင်သုံးဖွဲ့က ခုခံကာကွယ်သည့် တုံ့ပြန်မှုမျိုးမှလွဲ၍ စတင် ထိုးစစ်ဆင် တိုက်ခိုက်မှု ပြုလုပ်မည်မဟုတ်ကြောင်း ဆိုသည်။
ပြည်တွင်း၊ ပြည်ပ ကူညီကယ်ဆယ်ရေး လုပ်ကိုင်နိုင်ကြစေရန်နှင့် ငလျင်ဒဏ်သင့် ပြည်သူများအတွက် အရေးပေါ် လိုအပ်လျက်ရှိသော လူသားချင်း စာနာထောက်ထားမှုဆိုင်ရာ လုပ်ငန်းများကို အမြန်ဆုံး ဆောင်ရွက်နိုင်ရန် အထူးလိုလားကြောင်း ဆိုသည်။
ယခုရက်ပိုင်းများတွင် စစ်ကောင်စီက ကျောက်ဖြူမြို့နယ်များကို လက်နက်ကြီးနှင့် ပစ်ခတ်ခြင်း မြောက်ဦးမြို့နယ်များ လေကြောင်း ပစ်ခတ်မှုများ လုပ်ဆောင်ခဲ့မှုကြောင့် အရပ်သားများ သေဆုံး ဒဏ်ရာ ရရှိခဲ့သည်။
