အကြမ်းဖက် Arakan Rohingya Salvation Army (ARSA) လက်နက်ကိုင်အဖွဲ့ သတ်ဖြတ်မှုကြောင့် ရခိုင်ပြည် မောင်တောမြို့နယ်က အရပ်သား အမျိုးသား ၄ ဦးသေဆုံးသွားကြောင်း ဒေသခံများက ပြောသည်။
မောင်တောမြို့နယ်က ခရီးသွားပြည်သူ ခမီလူမျိုး ၄ ဦးကို မတ်လ ၂၉ ရက်နေ့ နံနက် ၇ နာရီခန့်တွင် ARSA အဖွဲ့က ဖမ်းဆီးသတ်ဖြတ်ခဲ့ပြီး ရုပ်အလောင်းကို သတ်ဖြတ်ထားခဲ့ခြင်း ဖြစ်ကြောင်း ဒေသခံများက ပြောသည်။
မြဝတီ ခမီးကျေးရွာမှ အောက်ဂန္ဒရူးကျေးရွာသို့ သွားရောက်စဉ် လမ်းမှာ ARSA အဖွဲ့ဝင်များက ဖမ်းဆီးသွားပြီး ရုပ်အလောင်းများကို မယူတောင်တန်း ဘဒဂါးတောင်ကျော်လမ်းတွင် စွန့်ပစ်ထားခဲ့ကြောင်း သတ်ဖြတ်ခံရသူများ၏ မိသားစုဝင်များက ပြောသည်။
ARSA သတ်ဖြတ်မှုကို ခံရသော ခမီးအမျိုးသား ၄ ဦးမှာ အသက် ၁၇ နှစ်အရွယ် မောင်သာအေးကျော်၊ အသက် ၁၉ နှစ်အရွယ် ကိုအောင်နိုင်ထွန်း၊ အသက် ၂၅ နှစ်အရွယ် ကိုမောင်ကြီးနှင့် အသက် ၄၁ နှစ်အရွယ် ဦးမောင်ဘ တို့ဖြစ်သည်။
၎င်းတို့၏ ရုပ်အလောင်းများကို မတ်လ ၃၀ ရက်နေ့မှာ ဘဒဂါးတောင်ကျော်လမ်းတွင် တွေ့ရှိခဲ့ခြင်းဖြစ်ပြီး ဝမ်းဗိုက်၊ ခြေထောက်နှင့် ခန္ဓာကိုယ်အနှံ့မှာ သေနတ်ဒဏ်ရာများဖြင့် တွေ့ရှိခဲ့ခြင်းဖြစ်သည်။
ARSA တပ်ဖွဲ့ဝင်များ ခြုံခိုပစ်ခတ်ခိုက်၍ အာရက္ခတပ်တော် AA တပ်ဖွဲ့ဝင် ၂ ဦးသေဆုံး သွားသည့် ရုပ်သံဖိုင်တစ်ခုလည်း မတ်လ ၂၉ ရက်နေ့က ARSA အဖွဲ့၏ လူမှုကွန်ရက် စာမျက်နှာပေါ်တွင် ရေးသားထားသည်။
AA တပ်ဖွဲ့ဝင် ၂ ဦးမှာ လုံခြုံရေးကင်းလှည့်နေစဉ် ခြံခိုတိုက်ခိုက်ခံရ၍ သေဆုံးသွားခြင်းဖြစ်သည်ကို တွေ့ရသည်။
ရခိုင်ပြည် ဘူးသီးတောင်၊ မောင်တော ဒေသတွင် ARSA အဖွဲ့သည် ဒေသခံပြည်သူများအား မတရားဖမ်းဆီးခြင်း၊ သတ်ဖြတ်ခြင်း အပြင် အာရက္ခတပ်တော် AA တပ်ဖွဲ့ဝင်များကိုလည်း မကြာခဏ တိုက်ခိုက်မှုများ ပြုလုပ်လျက်ရှိသည်။
၂၀၂၄ ခုနှစ် အောက်တိုဘာလ ၇ ရက်နေ့ကလည်း လူပျောက်သွားရှာသော AA ၏ လုံခြုံရေးတပ်ဖွဲ့ဝင် ၃ ဦးကို ARSA အဖွဲ့က ဘူးသီးတောင်မြို့နယ် ဂုံးနားကျေးရွာအနီးတွင် ခြုံခိုတိုက်ခိုက်ခဲ့၍ AA လုံခြုံရေးတပ်ဖွဲ့ဝင် ၁ သေဆုံးခဲ့ပြီး ၂ ဦးဒဏ်ရာ ရရှိခဲ့သည်။
ရခိုင်ပြည်စပ်ဒေသတွင် လုံခြုံရေးသတိကို ပေါ့လျော့၍ လုံးဝမရကြောင်းနှင့် ခေါင်းဆောင်တစ်ဦး ပြောင်းသွားရုံ၊ အဖမ်းခံရရုံးဖြင့် ARSA ၏ ရည်မှန်းချက်များမှာ ပြောင်းချင်မှ ပြောင်းမည်ဟု ရခိုင်နိုင်ငံရေးအကျဉ်းသားဟောင်း ဦးဝေဟင်အောင်က Western News ကို ပြောဆိုထားသည်။
“လုံခြုံရေးသတိဆိုတာ လုံးဝ ပေါ့လျော့လို့ မရဘူး။ လုံခြုံရေးသတိဟာ အချိန်ပြည့်ရှိနေဖို့ လိုအပ်တယ်။ လူတိုင်းလူတိုင်းဟာ လုံခြုံရေးသတိဟာ ပေါ့လျော့လို့ မရဘူး။ ခေါင်းဆောင်တစ်ယောက် ပြောင်းသွားရုံလောက်နဲ့တော့ သူတို့ရည်မှန်းချက်တွေ ပြောင်းချင်မှ ပြောင်းမယ်ပေါ့” ဟု ပြောသည်။
ARSA ၏ ခေါင်းဆောင်ကြီး အာတာအူလာ နှင့် ထိပ်တန်းခေါင်းဆောင်များကို ဘင်္ဂလားဒေ့ရှ်အစိုးရက မတ်လ ၁၇ ရက်တွင် ဖမ်းဆီးလိုက်ပြီးနောက် ARSA အဖွဲ့ဝင်တွင် နောက်ထပ် ခေါင်းဆောင်တစ်ဦး အသစ်တင်မြှောက်ခဲ့သည်။
ARSA အဖွဲ့ကို အကြမ်းဖက်အဖွဲ့အဖြစ် နိုင်ငံတကာ လူ့အခွင့်အရေးအဖွဲ့များနှင့် အာရက္ခတပ်တော် AA က ထုတ်ပြန်ကြေညာထားပြီး ARSA အဖွဲ့သည် ဘင်္ဂလားဒေ့ရှ်နှင့် ရခိုင်ပြည်အတွင်း အရပ်သားပြည်သူများအပေါ် မတရားဖမ်းဆီးခြင်း၊ သတ်ဖြတ်ခြင်း၊ စစ်သားစုဆောင်းခြင်းနှင့် ငွေညစ်လုယက်ခြင်းများ စသည့် စစ်ရာဇဝတ်မှုကျူးလွန်နေသော အဖွဲ့ဖြစ်သည်ဟုလည်း သတ်မှတ်ထားကြသည်။
