ငလျင်သင့် ပြည်သူများအား ကူညီကယ်ဆယ်ရေး ပြုလုပ်ရန် လာရောက်သော တရုတ်ကြက်ခြေနီအသင်း ယာဉ်တန်းကို ရှမ်းမြောက် နောင်ချိုမြို့နယ်တွင် သေနတ်မိုးပေါ် ထောင်ပစ်ခဲ့ဟု အာဏာသိမ်း စစ်ကောင်စီက ပြောခွင့်ရက ဝန်ခံထားသည်။
ဧပြီလ ၁ ရက်နေ့ ညနေ ၉ နာရီ ၃၀ မိနစ်အချိန် နောင်ချိုမြို့နယ်၊ အုမ္မတီးကျေးရွာအနီးတွင် တရုတ်ကြက်ခြေနီအသင်း၏ ကူညီကယ်ဆယ်ရေး ယာဉ်တန်းကို စစ်ကောင်စီတပ်ဖွဲ့ဝင်များက ပစ်ခတ်တားဆီးခဲ့သည်။
ကြိုတင်အကြောင်းကြားထားခြင်းမရှိဘဲ တိုက်ပွဲဧရိယာအတွင်းသို့ ရောက်ရှိလာ၍ သေနတ် မိုးပေါ်ပစ်ခတ်ပြီး တားဆီးခဲ့ကြောင်း စစ်ကောင်စီပြောခွင့်ရ ဗိုလ်ချုပ် ဇော်မင်းထွန်းက ဝန်ခံပြောဆိုထားသည်။
“အခုဖြစ်ခဲ့တဲ့ အဖွဲ့အနေနဲ့ မြန်မာနိုင်ငံကိုရော သက်ဆိုင်ရာ စစ်သံရုံးကိုရော အကြောင်းကြားထားခြင်းမရှိဘူး။ ဖြစ်တဲ့နေရာကတော့ နောင်ချိုမြို့နယ် အုမ္မတီးရွာအနီးမှာ ဖြစ်ခဲ့တာ။ အဲဒီနေရာမှာလည်း တပ်မတော်နဲ့ TNLA တို့အကြား တိုက်ပွဲတွေဖြစ်ပွားနေတာကို ကျနော်တို့အားလုံး သတင်းများ သိရှိနိုင်ပါတယ်။ တပ်မတော်လုံခြုံရေးအဖွဲ့အနေနဲ့ ဒီယာဉ်တန်းကို တွေ့တဲ့အခါမှာ တားဆီးပါတယ်။ တားဆီးလို့မရတဲ့အခါမှာ မီတာ ၁၀၀ အကွာလောက်ကတည်းက မီးထိုးပြီးတော့ တားဆီးတယ်။ မီတာ ၁၀၀ လောက်မှာတော့ မိုးပေါ်ထောင်ပြီး သေနတ် ၃ ချက် ပစ်ဖောက်ခဲ့တယ်လို့ သိရပါတယ်။ ဒါနဲ့ နောင်ချို ဘက်ကို ပြန်သွားတယ်လို့ အကြမ်းဖျဉ်းသိရပါတယ်။ ကားတွေက မြန်မာနိုင်ငံနံပါတ်တွေရဲ့ ကားတွေပဲဖြစ်ပါတယ်” ဟု ပြောသည်။
သို့သော်လည်း တရုတ်ကြက်နီအသင်း ကား ၉ စီးပါသည့် ယာဉ်တန်း ငလျင်သင့်ပြည်သူများအား ကယ်ဆယ်ရေ လာရောက်သည်ကို TNLA က စစ်ကောင်စီအား အကြောင်းကြားခဲ့သည်ဟု ထုတ်ပြန်ထားသည်။
တရုတ်ကြက်ခြေနီအသင်း၏ အကူအညီပေးရေး ယာဉ်တန်းသည် မန္တလေးမြို့သို့ ခရီးဆက်သွားမည့်အကြောင်းကိုလည်း စစ်ကောင်စီထံ သတင်းပို့ခဲ့သော်လည်း ပစ်ခတ်ခံရ၍ နောင်ချိုမြို့သို့ ပြန်လည် လှည့်ပြန်ခဲ့ရသည်ဟု TNLA က ပြောသည်။
လက်ရှိတွင် တရုတ်နိုင်ငံကြက်ခြေနီအသင်း ယာဉ်တန်းကို TNLA က ကာကွယ်စောင့်ရှောက်ပေးထားပြီး ၎င်းတို့ လိုရာခရီးကို ဆက်လက် ပို့ဆောင်သွားမည်ဟု TNLA က ထုတ်ပြန်ကြေညာထားသည်။
