အာဏာသိမ်း စစ်ကောင်စီက ငလျင်ကယ်ဆယ်လုပ်ငန်းများကြောင့် ဧပြီလ ၂ ရက်နေ့မှ ၂၂ ရက်နေ့အထိ ရက် ၂၀ ကြာ အပစ်ခတ်ရပ်သည်ဟု ထုတ်ပြန်ထားသည်။
စစ်ကောင်စီ အပစ်ရပ်ကြေညာထားသည့်အတိုင်း ကချင်လွတ်မြောက်ရေးအဖွဲ့ KIO ကလည်း ယင်းကာလအတွင်း ပစ်အခတ်ရပ်စဲသည်ဟု ဧပြီလ ၂ ရက်နေ့ ညနေပိုင်းက ထုတ်ပြန်အသိပေးထားသည်။
KIO က ထိုးစစ်များအား ရပ်နားထားမည်ဖြစ်ပြီး စစ်ကောင်စီဘက်ကလည်း ၎င်း၏ ကတိကဝတ်များကို လိုက်နာရန် လိုအပ်သည်ဟု KIO ဥက္ကဌ ဒုတိယ ဗိုလ်ချုပ်ကြီး ဂွန်မော်က ပြောသည်။
“တိုက်ပွဲဆင်နွှဲနေကြသူတွေ အားလုံး အပစ်ရပ်အပေါ် လိုနာဖို့လိုအပ်တယ်။ စစ်ကောင်စီကလည်း လိုက်နာဖို့ လိုအပ်တယ်။ ငလျင်သင့်ဒေသတွေကို ပြန်လည်ထူထောင်ရေး ရေရှည်လုပ်မှာဖြစ်တယ်” ဟု ပြောသည်။
စစ်ကောင်စီ၏ ယာယီအရပ်ထုတ်ပြန်ချက်တွင် တိုင်းရင်းသားလက်နက်ကိုင် အဖွဲ့များအနေဖြင့် တပ်စခန်းများအား တိုက်ခိုက်ခြင်း၊ ဌာနချုပ်များကို နှောက်ယှက်တိုက်ခိုက်ခြင်း၊ အင်အားစုဆောင်းများ၊ ပြင်ဆင်စုဖွဲ့ခြင်းနှင့် နယ်မြေချဲ့ထွင်မှုများကို ပြုလုပ်ပါက တုန့်ပြန်တိုက်ခိုက်သွားမည်ဟု ပါရှိသည်။
ထိုအချက်များအားလုံးကို စစ်ကောင်စီဖက်ကလည်း လိုက်နာရန် လိုအပ်ကြောင်း ကချင်လွတ်မြောက်ရေးအဖွဲ့ KIO က သတိပေးထားခြင်းဖြစ်သည်။
အလားတူ မြောက်ပိုင်းညီနောင်မဟာမိတ်အဖွဲ့ MNDAA, TNLA, AA တို့ကလည်း လူသားချင်းစာနာထောက်ထားမှုကို ရည်ရွယ်၍ စစ်ကောင်စီတပ်စခန်းများအား ထိုးစစ် တစ်ဖက်သက် ရပ်စဲကြောင်း ဧပြီလ ၁ ရက်က ထုတ်ပြန်ထားသည်။
ညီနောင်မဟာမိတ်အဖွဲ့၏ ဧပြီလ တစ်လတာ အပစ်အခတ်ရပ်စဲခြင်းမှာ ထိုးစစ်များသာ ဖြစ်ပြီး စစ်ကောင်စီဖက်က တိုက်ခိုက်မှုများ ပြုလုပ်လာပါက ခုခံစစ်ဖြင့် တန်ပြန်တိုက်ခိုက်သွားမည်ဟု ပြောဆိုထားသည်။
ငလျင်ကြောင့် ဒုက္ခရောက်နေကြသည့် ပြည်သူလူထုများအား ကူညီကယ်ဆယ်ရေးလုပ်ငန်းများနှင့် ပြန်လည်ထူထောင်ရေး လုပ်ငန်းများ အရှိန်မြှင့် ဆောင်ရွက်နိုင်ရန် စစ်ကောင်စီ၊ ညီနောင်မဟာမိတ်အဖွဲ့၊ KIO နှင့် အမျိုးသားညီညွတ်ရေးအစိုးရ NUG တို့မှာ တိုက်ပွဲအား ယာယီရပ်နားထားကြခြင်းဖြစ်သည်။
