(လူနေအိမ်များအပါအဝင် အစိုးရအဆောက်အဦး ၂၀ ခန့်ပျက်စီးသွား)
ချင်းပြည် တောင်ပိုင်းဒေသရှိ ကန်ပက်လက်မြို့နယ်ကို ယမန်နေ့ ဧပြီ ၂ ရက်နေ့တွင်ဂျက်ဖိုက်တာဖြင့် အကြိမ်ကြိမ် ဗုံးကြဲချခဲ့သည်ဟု ကန်ပက်လက်မြို့နယ် ပြည့်သူအုပ်ချုပ်ရေးအဖွဲ့မှ ဧပြီလ ၂ ရက်တွင် ထုတ်ပြန်သည်။
အာဏာသိမ်း စစ်ကောင်စီ ယာယီ အပစ်ရပ်ကြေညာသည့် ဧပြီလ ၂ ရက်တွင် ချင်းပြည်တောင်ပိုင်းကို ယမန်နေ့ နေ့လယ် ၁ နာရီ ၁၅ မိနစ်တွင် ဂျက်ဖိုက်တာဖြင့် လေကြောင်းက ဗုံးကြဲတိုက်ခိုက်ခဲ့ခြင်း ဖြစ်သည်။
စစ်ကောင်စီ၏ လေကြောင်းတိုက်ခိုက်မှုကြောင့် ကန်ပက်လက်မြို့ထဲက လူနေအိမ်များ အပါအဝင် အစိုးရအဆောက်အဦး ၂၀ ခန့်ပျက်စီးသွားသည်ဟု ကန်ပက်လက်မြို့နယ် ပြည့်သူအုပ်ချုပ်ရေးအဖွဲ့က ဆိုသည်။
အရပ်သားပြည်သူ့နေအိမ် ၅ လုံး၊ အစိုးရအဆောက်အဦးများနှင့် ထွေ/အုပ်ရုံး ၈ လုံး၊ ကျေးလက်ဦးစီးမှူးရုံး၂ လုံး၊ မြို့နယ်ရွေးကောက်ပွဲကော်မရှင်ရုံး ၁ လုံး၊ မြို့နယ် (စစစ) ရုံး ၁ လုံးနှင့် မြို့နယ်စီမံကိန်းရုံး ၂ လုံး စုစုပေါင်း အလုံး ၂၀ ပျက်စီးခဲ့ခြင်းဖြစ်သည်။
ကန်ပက်လက်မြို့ပေါ်က ပြည်သူလူထုများအနေဖြင့် လေကြောင်းရန် အထူးဂရုစိုက် နေထိုင်ကြရန် အသိပေးတိုက်တွန်းထားသည်ဟု ကန်ပက်လက်မြို့နယ် ပြည့်သူအုပ်ချုပ်ရေးအဖွဲ့က ပြောသည်။
ငလျင်ကယ်ဆယ်ရေး လုပ်ငန်းများ ဆောင်ရွက်ရန် အကြောင်းပြချက်ဖြင့် အာဏာသိမ်း စစ်ကောင်စီသည် တစ်ဖက်သက် အပစ်အခတ်ရပ်စဲရေးကို ၂၀၂၅ ခုနှစ် ဧပြီလ ၂ ရက်နေ့မှ ၂၂ ရက်နေ့အထိ သတ်မှတ်ထားသည်။
အလားတူ ကချင်လွတ်မြောက်ရေးအဖွဲ့ KIO၊ မြောက်ပိုင်းညီနောင် မဟာမိတ်အဖွဲ့နှင့် အမျိုးသားညီညွတ်ရေးအစိုးရ NUG တို့ကလည်း ပစ်ခတ်မှုများ ယာယီအရပ်စဲထားကြသည်။
