အာဏာသိမ်း မြန်မာစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ထိုင်းနိုင်ငံ ဘန်ကောက်မြို့တွင် ဆန္ဒပြခံရကြောင်း သိရသည်။
ဘန်ကောက်မြို့တွင် ကျင်းပနေသော BIMSTEC အစည်းအဝေးကို မြန်မာစစ်ခေါင်းဆောင် မင်းအောင်လှိုင် ဧပြီလ ၃ ရက်နေ့က တက်ရောက်နေသည်။
အစည်းအဝေး ကျင်းပနေသည့် ရှန်ဂရီလာဟိုတယ်အနီးရှိ ကျောက်ဖရားမြစ် တံတားတစ်စင်းပေါ်တွင် မင်းအောင်လှိုင်အား ဆန္ဒပြသည့် စာတန်းပါ ဗီနိုင်းများ ချိတ်ဆွဲထားသည်။
ဗီနိုင်းပါ ဆန္ဒပြစာတန်းမှာ “လူသတ်သမား မင်းအောင်လှိုင်ကို ငါတို့ မကြိုဆို ” ဟု စာသားအား အင်္ဂလိပ်ဘာသာဖြင့် ကန့်ကွက်ဆန္ဒပြထားခြင်းဖြစ်သည်။
အာဏာသိမ်း မြန်မာစစ်ခေါင်းဆောင် မင်းအောင်လှိုင်အား BIMSTEC အစည်းအဝေးသို့ တက်ရောက်ရန် ဖိတ်ခေါ်သည့် ထိုင်းအစိုးရအဖွဲ့အနေဖြင့်လည်း ထိုင်းပြည်သူများထံသို့ ရှင်းလင်းချက် ပေးရန် ထိုင်လွှတ်တော်အမတ်များက တောင်းဆိုနေကြသည်။
တရားမျှရေးပါတီမှ လွှတ်တော်အမတ် ကန်နာဝီက “မြန်မာစစ်အာဏာရှင်ဟာ ဘယ်နိုင်ငံ၊ ဘယ်ထိပ်သီးအစည်းအဝေးမှ တက်ရောက်ခွင့် မရတာကြာပါပြီ။ ရုရှားတို့ တရုတ်တို့ ပဲသူ့ကို အဖက်လုပ်ပြီး ဖိတ်ပါတယ်။ အဲ့ဒီနိုင်ငံတွေပဲ သွားခဲ့ရတယ်။ ဒါပေမယ့် မင်းအောင်လှိုင် တတိယမြောက်ခြေချတဲ့ နိုင်ငံ ထိုင်းတဲ့ဗျာ” ဟု ပြောသည်။
အရပ်သားပြည်သူများရှိရာ နေရာများကို နေ့စဉ် ဗုံးကြဲတိုက်ခိုက်နေသော မြန်မာစစ်အာဏာရှင် ခေါင်းဆောင် မင်းအောင်လှိုင်အား ထိုင်းအစိုးရက ဖိတ်ကြားထားသည့် ကိစ္စကို ထိုင်းပြည်သူများသို့ ရှင်းလင်းချက်ပေးရန် တောင်းဆိုခြင်းဖြစ်သည်ဟု ကန်နာဝီ က ဆိုသည်။
မြန်မာနိုင်ငံအတွင်းက ဒီမိုကရေစီအင်အားစုများ အပါအဝင် တော်လှန်ရေးလှုပ်ရှား ဆောင်ရွက်နေသည့် အဖွဲ့အစည်းများနှင့် နိုင်ငံတကာအဖွဲ့အစည်းများကလည်း မင်းအောင်လှိုင်အား လိုလိုလားလား ဆက်ဆံနေသည့် ထိုင်းအစိုးရအဖွဲ့ကို ကန့်ကွက်ထားကြသည်။
