မြန်မာနိုင်ငံတဝှမ်း အမျိုးသမီးသေဆုံးမှု ဆက်လက်မြင့်တက်လျက်ရှိပြီး ဧပြီလအတွင်း အမျိုးသမီး ၇၁ ဦး အသက် ဆုံးရှုံးခဲ့ရကြောင်းနှင့် ၅၀ ဦးမှာ ထိခိုက်ဒဏ်ရာရရှိခဲ့သည်ဟု မြန်မာ့အမျိုးသမီးမဂ္ဂ BWU ယနေ့ မတ်လ ၇ ရက်တွင် ထုတ်ပြန်ထားသည်။

အသက်ဆုံးရှုံးခဲ့ရသည့် အကြောင်းရင်းများမှာ စစ်ကောင်စီ၏ လေကြောင်းဖြင့် ဗုံးကြဲ တိုက်ခိုက်မှုကြောင့် ၅၉ ဦး၊ ပြည်သူများ၏ ရွာနှင့် နေအိမ်များအား ပစ်မှတ်ထား လက်နက်ကြီး ပစ်ခတ်မှုကြောင့် ၇ ဦးနှင့် စစ်ကောင်စီတပ်ဖွဲ့ဝင်များ၏ သတ်ဖြတ်မှုကြောင့် ၅ ဦး တို့ဖြစ်သည်။

အသက်ဆုံးရှံးခဲ့သည့် အမျိုးသမီး ၇၁ ဦးထဲမှ ၁၃ ဦးသည် အသက် ၁၈ နှစ်အောက်များ ဖြစ်ကြကြောင်းလည်း BWU က ဆိုသည်။

ထိခိုက်ဒဏ်ရာရရှိခဲ့သည့် အမျိုးသမီး ၅၀ ဦးထဲတွင် စစ်ကောင်စီ၏ လေကြောင်းတိုက်ခိုက်မှုကြောင့် ၄ဝ ဦး၊ လက်နက်ကြီးပစ်ခတ်မှုကြောင့် ၅ ဦး၊ မြေမြှုပ်မိုင်းကြောင့် ၄ ဦးနှင့် အာရက္ခတပ်တော် AA တပ်ဖွဲ့ဝင်နှစ်ဦး မုဒိမ်းပြုကျင့်ခြင်းကြောင့် ၁ ဦးတို့ ပါဝင်ကြသည်။

၂ဝ၂၅ ခုနှစ် ဧပြီလအတွင်း အသက်ဆုံးရှုံးခဲ့သည့် အမျိုးသမီးဦးရေသည် စစ်ကိုင်းတိုင်း ဒေသကြီးမှ ၃ဝ ဦး၊ မန္တလေးတိုင်း ဒေသကြီးမှ ၁၄ ဦးနှင့် ပဲခူးတိုင်းဒေသကြီးမှ ၅ ဦးတို့ဖြစ်ကြပြီး စစ်ကိုင်းတိုင်း ဒေသကြီးသည် ၂ဝ၂၅ ခုနှစ် ဧပြီလအတွင်း အမျိုးသမီး သေဆုံးမှုအများဆုံး တိုင်းဒေသကြီးဖြစ်သည်။

ယခု အချက်အလက်များမှာ တိကျခိုင်လုံသော သတင်းမီဒီယာများ၏ သတင်းအချက်အလက်များကို စောင့်ကြည့်မှတ်တမ်းမှုများအပြင် မြေပြင်မှ အချက်အလက်ကောက်ယူထားမှုများကို ပြန်လည် စုစည်းတင်ပြထားခြင်း ဖြစ်ကြောင်းလည်း BWU က ဆိုသည်။

သို့သော် လက်တွေ့မြေပြင်အခြေအနေတွင် မိမိတို့အနေဖြင့် ဒေတာနှင့် သတင်းအချက်အလက်များကို လက်လှမ်းမီနိုင်ရန် အခက်ခဲများစွာ ရှိသဖြင့် ကိန်းဂဏန်းများသည် မြေပြင်၌ ယခုထက်ပို၍ များနိုင်ကြောင်းလည်း မြန်မာ့အမျိုးသမီးသမဂ္ဂ BWU က ထုတ်ပြန်သည်။

မတ်လ ၂၈ ရက်နေ့က မြန်မာပြည်အလယ်ပိုင်းတွင် လှုပ်ခတ်ခဲ့သော ငလျင်ကြောင့် ကယ်ဆယ်ရေးနှင့် ပြန်လည် ထူထောင်ရေးအတွက် အာဏာသိမ်း စစ်ကောင်စီက ဧပြီလ တစ်လလုံး အပစ်ရပ်ကြေညာထားခဲ့သည်။

စစ်ကောင်စီသည် အပစ်ရပ်ကြေငြာထားသော်လည်း ငလျင်ဒဏ်ကြောင့် ပူဆွေးသောက ရောက်နေသည့် အပြစ်မဲ့ပြည်သူများအား ပစ်မှတ်ထားကာ လေကြောင်းတိုက်ခိုက်မှုများအား ပိုမို အသုံးပြုလာခြင်းကြောင့် အမျိုးသမီးများနှင့် မိန်းကလေးငယ်များသည်လည်း နေ့စဉ်နှင့်အမျှ အသက်ဆုံးရှုံးနေရသည်ဟု မြန်မာ့အမျိုးသမီးသမဂ္ဂ BWU က ပြောသည်။