တနင်္သာရီတိုင်း ကော့သောင်းခရိုင် ခမောက်ကြီးမြို့ မာရမ်းကျေးရွာတွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးပူးပေါင်းတပ်ဖွဲ့တို့ကြား နှစ်ဖက်တိုက်ပွဲဖြစ်ပြီးနောက် ဒေသခံစစ်ရှောင် ၂၀၀ နီးပါးသည် ထိုင်းဘက်ခြမ်းကို ယာယီထွက်ပြေးခိုလှုံနေရကြောင်း စစ်ရှောင်များနှင့် ဒေသ အခြေစိုက် တော်လှန်ရေးတပ်ဖွဲ့များထံမှ သိရသည်။

ခမောက်ကြီးမြို့ မာရမ်းကျေးရွာရှိ စစ်ကောင်စီ၏ ရဲစခန်းကို ဇွန် ၂၂ ရက်နေ့ နံနက် ၅ နာရီခွဲအချိန်တွင် ပြည်သူ့ကာကွယ်ရေးပူးပေါင်းအဖွဲ့က သွားရောက်တိုက်ခိုက်ချိန် အပြန်အလှန် နှစ်ဖက်ပစ်ခတ်မှုကြောင့် အသက် ၄၃ နှစ်အရွယ်ရှိ ကော့သောင်း (ပကဖ) အဖွဲ့က ရဲဘော်တစ်ဦး ကျဆုံးခဲ့ကြောင်း သိရကာ အလာတူ ရဲတပ်ဖွဲ့ဝင်နှစ်ဦးလည်း သေဆုံးကာ တစ်ဦး ဒဏ်ရာရရှိကြောင်း သိရသော်လည်း အတည်ပြုနိုင်ခြင်း မရှိသေးပေ။

မြေပြင်ရှိ ရဲဘော်တစ်ဦးက “PDF ရဲဘော်က တိုက်ပွဲဖြစ်နေချိန် ရဲစခန်းဂိတ်တံခါးကို ဝင်ရောက်ဆွဲဖွင့်ရာမှ စစ်တပ်ကပစ်လိုက်တဲ့ ကျဉ်ထိပြီး ကျဆုံးသွားတာ ဖြစ်တယ်” ဟု ပြောသည်။

တော်လှန်ရေးပူးပေါင်းအဖွဲ့က သွားရောက်တိုက်ခိုက်သည့် အဆိုပါ ရဲစခန်းတွင် အင်အားမရှိဟုဆိုကာ သွားရောက်တိုက်ခိုက်ရာမှ စစ်ကောင်စီဘက်က ရဲတပ်ဖွဲ့နှင့် စစ်ကောင်စီတပ်သားများ ပေါင်းပြီး အင်အား ၃၀ နီးပါးရှိနေကြောင်း တော်လှန်ရေး ရဲဘော်များထံမှ သိရသည်။

ယင်းတိုက်ပွဲအတွင်း တော်လှန်ရေးပူးပေါင်းအဖွဲ့မှ လက်နက်အင်အားမမျှ၍ ပြန်လည်ဆုတ်ခွာသွားခဲ့ပြီးနောက် စစ်ကောင်စီဘက်က လက်နက်ကြီးဖြင့် ရမ်းသမ်းပစ်ခတ်မှုကြောင့် မာရမ်းရွာရှိ အရပ်သား ၂၀၀ ကျော်ဟာ ထိုင်းနိုင်ငံနယ်စပ်ဘက်ကို ယင်းနေ့ ညနေ ၅ နာရီအချိန်တွင် ထွက်ပြေး တိမ်းရှောင်ခဲ့ကြောင်း ဒေသခံ စစ်ရှောင်များထံမှ သိရသည်။

လက်ရှိတွင် နှစ်ဖက်တိုက်ပွဲကြောင့် သက်ကြီးပိုင်းနှင့် ကလေးသူငယ်များ အပါအဝင် ဒေသခံပြည်သူ ၂၀၀ ကျော်သည် ထိုင်းနိုင်ငံ၊ ကရဘူရီမြို့နယ်၊ နမ်းကျု့ကျေးရွာအုပ်စု၊ နမ်းဒင်ကျေးရွာဘက်တွင် ရောက်ရှိနေကြောင်း ထိုင်းဘက်ကလာသည့် သတင်းများအရ သိရသည်။

ဒေသခံ စစ်ရှောင်တဦး ပြောပြတာက “တိုက်ပွဲဖြစ်တဲ့အချိန် လက်နက်ကြီးတွေ ပစ်နေတာ တအားကြမ်းတယ်၊ ရွာထဲကို ကျလာမှာကို ကြောက်လို့ ထွက်ပြေးလာတာ ဖြစ်တယ်” ဟု ပြောသည်။

ထိုကြောင့် လက်ရှိ ထိုင်းဘက်ကို ရောက်ရှိနေသည့် မြန်မာစစ်ရှောင်များကို ထိုင်းနိုင်ငံ တာဝန်ရှိသူများက လူသားချင်းစာနာမှု အကူအညီများပေးထားကာ တိုက်ပွဲတည်ငြိမ်ပါက ပြန်လည် ပို့ဆောင်သွားမည်ဖြစ်ကြောင်း ထိုင်းသတင်းဌာနများက ရေးသားထားသည်။

ခမောက်ကြီးမြို့ မာရမ်းကျေးရွာတွင် ၂၀၂၃ ခုနှစ်ကလည်း ယခုလို နှစ်ဖက်တိုက်ပွဲကြောင့် ဒေသခံများ ရွာလုံးကျွတ် တစ်ဘက်ထိုင်းနိုင်ငံကို ထွက်ပြေးတိမ်းရှောင်ခဲ့ရသလို အခုနှစ် ၂၀၂၄ ခုနှစ် ဧပြီလတွင် ရှမ်းကိုးရွာဒေသထဲရှိ ဝိုင်ဒင်းကျေးရွာက တိုက်ပွဲတွင် တရက်အတွင်း နှစ်ဖက်ထိတွေ့မှု ၃ကြိမ်အထိ ဖြစ်ပွားခဲ့ပြီး စစ်ကောင်စီတပ်ဖွဲ့က မီးရှို့ဖျက်ဆီးမှုကြောင့် ဥယျာဉ်ခြံနှင့် နေအိမ် ခြောက်လုံးပျက်စီးခဲ့ကြောင်း ဒေသခံများထံမှ သိရသည်။