(အမ်းက တောဟိန်းတောင်ဗျူဟာကိုလည်း AA သိမ်းပိုက်)

အပြင်းအထန် ထိုးစစ်ဆင်တိုက်ခဲ့သော သံတွဲမြို့နယ်တွင် သံတွဲလေဆိပ် (မဇင်လေဆိပ်) နှင့်အနီးရှိ ခမရ ၅၆၆ တပ်ရင်းကို အာရက္ခတပ်တော် AA က သိမ်းပိုက်ပြီဟု သိရသည်။

သံတွဲ ငပလီမြို့အခြေစိုက် စစ်ကောင်စီ၏ ခမရ ၅၆၆ တပ်ရင်းကို ဇွန်လ ၂၇ ရက်နေ့က အပြီးသတ် သိမ်းပိုက်ရရှိခဲ့ကြောင်းနှင့် သံတွဲလေဆိပ်ကို ဇူလိုင်လ ၅ ရက်က အပြီးသတ် သိမ်းပိုက်ထိန်းချုပ်လိုက်ပြီဟု AA က ယနေ့တွင် ထုတ်ပြန်ထားသည်။

သံတွဲမြို့နယ်တွင် ကျန်ရှိနေသေးသော စစ်ကောင်စီ၏ ခလရ ၅၅ နှင့် အခြားသောတပ်ရင်း၊ တပ်စခန်းများကို ဆက်လက်ထိုးစစ်ဆင်တိုက်နေပြီး ထွက်ပြေးလွတ်မြောက်နေသော စစ်ကောင်စီ တပ်သားများကိုလည်း လိုက်လံချေမုန်းတိုက်ခိုက်နေကြောင်း AA က ဆိုသည်။

အမ်းမြို့နယ်က စစ်ကောင်စီ နပခ ၏ အဓိက ခံတပ်တစ်ခုဖြစ်သော တောဟိန်းတောင်ဗျူဟာကုန်းကို ဇွန်လ ၂၃ ရက်နေ့တွင် အပြီးသတ်သိမ်းလိုက်ပြီဟု AA က ထုတ်ပြန်ထားသည်။

မောင်တောမြို့နယ်က နခခ ၂ နယ်ခြားစောင့်တပ်စခန်းကိုလည်း ဇူလိုင်လ ၆ ရက်နေ့ နေ့လယ် ၂ နာရီခန့်က သိမ်းပိုက်ရရှိခဲ့သည်။