စစ်ရေးပြင်းထန်နေသော ရခိုင်ပြည် သံတွဲမြို့နယ်မှာ စစ်ကောင်စီပစ်ခတ်သော လက်နက်ကြီး ကျောက်ဆိပ်ကျေးရွာက လူနေအိမ်ကို ကျရောက်ပေါက်ကွဲခဲ့၍ အရပ်သား ၁ ဦးသေဆုံးပြီး ၃ ဦး ဒဏ်ရာပြင်းထန်ကြောင်း သိရသည်။
ယမန်နေ့ ဇူလိုင်လ ၁၀ ရက် ညက တိုက်ပွဲမရှိဘဲ စစ်ကောင်စီတပ်ရင်းများမှ ယမ်းသန်းပစ်ခတ်သော လက်နက်ကြီး ကျောက်ဆိပ်ကျေးရွာ လူနေအိမ်ပေါ်သို့ ကျရောက်ပေါက်ကွဲခဲ့ခြင်းဖြစ်သည်။
အမည်မဖော်လိုသူ ဒေသခံတစ်ဦးက ” ရွာအနီး ဘာတိုက်ပွဲမှ မရှိဘူး။ စစ်ကောင်စီက နေ့စဉ် အချိန်ပြည့် လေယာဉ်နဲ့ လာဗုံးကြဲလိုက်၊ လက်နက်ကြီးနဲ့ ကျေးရွာတွေဆီ လှမ်းပစ်ခတ်လိုက် လုပ်နေတာ။ မနေ့ညက စစ်ကောင်စီတပ်ရင်းက ပစ်ခတ်တဲ့ လက်နက်ကြီး တစ်လုံးဟာ ကျောက်ဆိပ်ရွာက အိမ်တစ်အိမ်ကို တည့်တည့်ကျတာ။ အမျိုးသမီးတစ်ဦးသေတယ်။ ၃ ဦးလောက် ဒဏ်ရာပြင်းထန်ရတယ်။ ” ဟု ပြောသည်။
သေဆုံးသွားသည့် အမျိုးသမီးမှာ အသက် ၃၀ အရွယ် မစန်းစန်းအေး ဖြစ်ပြီး ဒဏ်ရာရသူများမှာ မြေပြင်ဆေးရုံတစ်ခု၌ ဆေးကုသမှုခံယူနေရကြောင်း စုံစမ်းသိရသည်။
ဇူလိုင်လ ၉ ရက်နေ့ညကလည်း စစ်ကောင်စီက ပစ်ခတ်သော လက်နက်ကြီးကြောင့် အသက် ၆၀ ကျော်အရွယ် လင်မယားနှစ်ဦး ထိခိုက်ဒဏ်ရာရရှိသွားပြီး မျက်လုံး၌ ဒဏ်ရာပြင်းထန်စွာ ရရှိသွားသော ဇနီးဖြစ်သူ ဒေါ်ကြည်ထွေးမှာ ရန်ကုန်ဆေးရုံသို့ အရေးပေါ်ပို့ဆောင်လိုက်ရကြောင်း သိရသည်။
ဇူလိုင်လ ၂ ရက်နေ့ကလည်း လေကြောင်း ဗုံးကြဲပစ်ခတ်မှုကြောင့် သံတွဲမြို့နယ် မြုံပြင်ကျေးရွာက အမျိုးသမီး ၅ ဦး ထိခိုက်ဒဏ်ရာရရှိခဲ့ကြောင်း သိရသည်။
သံတွဲမြို့၊ ငပလီမြို့တို့တွင် စစ်ကောင်စီတပ်နှင့် AA တို့ တိုက်ပွဲပြင်းထန်လျှက်ရှိနေပြီး ငပလီမြို့ ဂျိတ္တောနှင့် မြပြင်ရပ်ကွက်တို့က စစ်ရှောင် ၃၀၀ ကျော်မှာ စားဝတ်နေရေးအခက်အခဲဖြင့် ကြုံတွေ့နေရကြောင်း သိရသည်။
ဒေသခံတစ်ဦးက ” ငပလီမြို့ထဲရယ်၊ ဂျိတ္တော၊ မြပြင်ရယ် အနီးဝန်းကျင်တွေမှာ တိုက်ပွဲက အရမ်းပြင်ထန်နေတယ်။ လုံခြုံမယ့်နေရာတွေမှာ ယာယီခိုလှုံနေကြတာပေါ့။ စခန်းနေရာတွေကိုတော့ မပြောတော့ပါဘူး။ စစ်ရှောင် ၃၀၀ လောက်ရှိမယ်။ အခု နေဖို့၊ စားဖို့ အရမ်းအခက်အခဲဖြစ်နေကြတယ်။ စစ်ရှောင်ကူညီရေး အဖွဲ့တွေ၊ ပုဂ္ဂိုလ်တွေကလည်း ကူညီကြပါတယ်။ ဒါပေမယ့် မလောက်ဘူးလေနော်။ ကျန်းမာရေးက အစပေါ့နော်။ အများကြီးလိုအပ်နေပါသေးတယ်။ ” ဟု ပြောသည်။
သံတွဲမှာ စစ်ရှောင်အရေအတွက် တိုးလာနေပြီး အရေးပေါ်ကူညီရေးအဖွဲ့အစည်းများ၏ ပြောပြချက်အရ စစ်ရှောင် သောင်းချီရှိနေကြောင်း သိရသည်။
သံတွဲမြို့နယ်သို့ ကူညီကယ်ဆယ်ရေးအဖွဲ့များ အနည်းအကျဉ်းသာ ရှောက်ရှိကြ၍ အရေးပေါ်ကူညီကယ်ဆယ်ရေးများနှင့် ကျန်းမာရေးစောင့်ရှောက်မှုများ အမြန်ဆုံးကူညီဆောင်ရွက်ပေးကြရန် ဒေသခံများနှင့် စစ်ရှောင်များက တောင်းဆိုနေကြသည်။
