(စာသင်ကျောင်းနှင့် နေအိမ် ၁၀ လုံး ထိခိုက်ပျက်စီး)
ရှမ်းမြောက် တအောင်းဒေသ လားရှိုးမြို့ကို အာဏာသိမ်း စစ်ကောင်စီက လက်နက်ကြီးများဖြင့် ပစ်ခတ်ခြင်း၊ လေကြောင်းတိုက်ခိုက်မှုများ ပြုလုပ်နေပြီး ယနေ့ တိုက်ခိုက်မှုကြောင့် အရပ်သား ၄ ဦးသေဆုံးခဲ့ရကြောင်း TNLA က ထုတ်ပြန်ထားသည်။
ယနေ့ ဇူလိုင်လ ၁၂ ရက် နံနက်ပိုင်းက စစ်ကောင်စီ ပစ်ခတ်သော လက်နက်ကြီး လားရှိုးမြို့ ရပ်ကွက် ၁၊ ရပ်ကွက် ၈၊ ရပ်ကွက် ၁၀ သို့ ကျရောက်ပေါက်ကွဲခဲ့၍ အပြစ်မဲ့ အရပ်သား ၄ ဦးသေဆုံးခဲ့ရသည်။
ရပ်ကွက် ၈ က နေအိမ်တစ်လုံးသို့ စစ်ကောင်စီ လက်နက်ကြီး တစ်လုံးကျရောက်ခဲ့၍ ထိခိုက်ပျက်စီးခဲ့သလို ရပ်ကွက် ၁၀ ထင်းရှုးမြိုင်အိမ်ယာအနီးတစ်ဝိုက်ကိုလည်း လက်နက်ကြီး ၅ လုံးထက်မနည်း ကျရောက်ပေါက်ကွဲခဲ့သည်။
မိုးကုတ်မြို့အရှေ့ပိုင်း မင်းတံတားရပ်ကွက်သို့ စစ်ကောင်စီ လက်နက်ကြီးကြောင့် အရပ်သားပြည်သူ မထိခိုက်သော်လည်း နေအိမ် ၅ လုံး ထိခိုက်ပျက်စီးသွားသည်။
အလားတူ ယနေ့ နံနက် အစောပိုင်းက ကိုးကန့်တပ် MNDAA ထိန်းချုပ်ထားသည့် သိန္နိမြို့တွင် စစ်ကောင်စီက ဗုံး ၃ လုံး ကြဲချတိုက်ခိုက်ခဲ့၍ အမှတ် ၁ အထက်တန်းကျောင်း၊ ပညာရေးမှူးရုံးနှင့် မူလတန်းကျောင်း ထိခိုက်ပျက်စီးခဲ့သည်။
တကျော့ပြန် ၁၀၂၇ စစ်ဆင်ရေးတိုက်ပွဲ ၁၈ ရက်တာကာလအတွင်း စစ်ကောင်စီမှ အရပ်သားများအားဦးတည်က လေကြောင်းနှင့် လက်နက်ကြီးပစ်ခတ်မှုကြောင့် အရပ်သားပြည်သူ ၅၈ ဦး သေဆုံးပြီး ၈၂ ဦး ထိခိုက်ဒဏ်ရာရရှိခဲ့ကာ အရပ်သားနေအိမ် ၁၀၀ နီးပါး ထိခိုက်ပျက်စီးခဲ့ကြောင်း TNLA က ထုတ်ပြန်ထားသည်။
