(CNF က အာဏာရှင်ဆန်သော အစိုးရသစ် ဖွဲ့စည်းနေဟု CB က ပြန်ပြော)

ချင်းတိုင်းရင်းသား တော်လှန်ရေးအဖွဲ့အစည်း အချင်းချင်း ပူးပေါင်းဆောင်ရွက်နိုင်ရန် ချင်းညီနောင်အဖွဲ့ CB ကို ချင်းအမျိုးသားတပ်ဦး CNF က ဖိတ်ခေါ်လိုက်ကြောင်း သိရသည်။

ချင်းပြည်ထဲက စစ်ကောင်စီများကို တိုက်ထုတ်ရန်နှင့် ချင်းပြည် ချင်းလူထုလက်ထဲသို့ အပြည့်အဝ ရောက်ရှိရေးအတွက် ပူးပေါင်းဆောင်ရွက်ရန် ချင်းညီနောင်အဖွဲ့ CB ကို CNF နိုင်ငံခြားရေးတာဝန်ခံလည်းဖြစ် ချင်းလူ့အခွင့်အရေးအဖွဲ့ အမှုဆောင်ညွှန်ကြားရေးမှူးလည်းဖြစ်သည့် ဆလိုင်းဘွေလျန်မန်း က အာအက်ဖေနှင့် အင်တာဗျူးတစ်ခုတွင် ထည့်သွင်းပြောဆို ဖိတ်ခေါ်ခဲ့ခြင်းဖြစ်သည်။

” ကျနော်တို့ NUG နဲ့တောင် ပေါင်းတာပဲ။ ကျနော်တို့ ချင်းညီကိုအချင်းချင်းကြားထဲမှာ တိုက်စရာခိုက်စရာအကြောင်းမရှိဘူး။ အဲဒါကြောင့် ဒီကနေပဲ အခွင့်ကောင်းယူပြီး ကျနော် ချင်းညီကိုတွေကိုလည်း ပြောချင်ပါတယ်။ ပူးပေါင်းလိုက်ရအောင်။ ငါတို့ပူးပေါင်းလိုက်ရင် အများကြီးထိရောက်မှုရှိနိုင်တယ်။ ဖိတ်ခေါ်ချင်ပါတယ်။ ” ဟု ပြောသည်။

CNA/CNF ဦးဆောင်သော ချင်းတိုင်းရင်းသားလက်နက်ကိုင်အဖွဲ့အစည်းများဖြင့် ဖွဲ့စည်းထားသော ချင်းပြည်အစိုးရအဖွဲ့မှာ ပါဝင်ရန် ချင်းညီနောင်အဖွဲ့ဝင်များကို ဖိတ်ခေါ်ခဲ့သော်လည်း တက်ရောက်ခြင်း မရှိခဲ့ကြောင်း ဆလိုင်းဘွေလျန်မန်း က ဆိုသည်။

ချင်းညီနောင်အဖွဲ့နှင့် ချင်းပြည်အစိုးရတို့ကြားတွင် မတူပီမြို့သိမ်းတိုက်ပွဲပြီးနောက် အချင်းချင်းတင်းမာမှု ပိုမိုပြင်းထန်လာပြီး အာရက္ခတပ်တော် AA က ချင်းနိုင်ငံရေးတွင် ဝင်ရောက်စွပ်ဖက်နေသည်ဟု CNF နိုင်ငံခြားရေးတာဝန်ခံ ဆလိုင်းဘွေလျန်မန်း က စွပ်စွဲထားသည်။

” ချင်းလဲန်းကောင်စီ ချင်းပြည်အစိုးရထဲမှာ မပါဝင်သေးတဲ့ အဖွဲ့သေးသေးလေးပေါ့။ အဲဒါတွေကို ပုံချဲ့ပြီးတော့ သိပ်ကြီးသလိုပေါ့နော်။ လုပ်တယ်။ သူတို့ (AA) နဲ့တွဲပြီး လုပ်တယ်။ ချင်းထဲမှာ ၅၃ မျိုးရှိတယ်လို့ ပြောတယ်။ ၅၃ မျိုးထဲမှာ ၆ ဖွဲ့လောက်နဲ့ ပေါင်းပြီးတော့ အဲဒီလိုမျိုး ချင်းပြည်သူတွေရဲ့ နိုင်ငံရေးထဲမှာ ဝင်ရောက်စွပ်ဖက်တယ်ဆိုတာကိုတော့ သိပ်ပြီးတော့ တရားမကျဘူးလို့ မြင်ပါတယ်။ ” ဟု ဆလိုင်းဘွေလျန်မန်းက အာအက်ဖေနှင့် အင်တာဗျူးမှာ AA အား ပြောဆိုခဲ့ခြင်းဖြစ်သည်။

မတူပီမြို့သိမ်းတိုက်ပွဲအတွင်း ချင်းညီနောင်အဖွဲ့၏ မဟာမိတ် AA စစ်ကြောင်းကို ချင်းလဲန်းကောင်စီ ဦးဆောင်သော CNA စစ်ကြောင်းက ကြားဖြတ်ဝင်ရောက် ပစ်ခတ်တိုက်ခိုက်မှုကြောင့် CNA/CNF, ချင်းလဲန်းကောင်စီ၊ ချင်းပြည်အစိုးရ တို့နှင့် ချင်းညီနောင်အဖွဲ့တို့မှာ စစ်ရေးအရ တင်းမာနေကြသည်။

သို့သော်လည်း CNA ဝင်ရောက်နှောင့်ယှက်မှုကြားက ချင်းညီနောင်အဖွဲ့သည် AA အပါအဝင် အခြားသော မဟာမိတ်တပ်ဖွဲ့များ၏ အကူအညီဖြင့် မတူပီမြို့ကို သိမ်းယူနိုင်ခဲ့ပြီး လက်ရှိတွင် ချင်းညီနောင်အဖွဲ့ကသာ မတူပီမြို့ကို အုပ်ချုပ်ရေးစီမံနေသည်ဟု သိရသည်။

ချင်းအမျိုးသားတပ်ဦး CNF/CNA နှင့် ချင်းလွှတ်တော်ကိုယ်စားလှယ်တချို့သည် ချင်းတစ်မျိုးသားလုံး၏ အကျိုးစီးပွားနှင့် အရပ်သားအုပ်ချုပ်မှုစံနှုန်းများကို လျစ်လျူရှုပြီး အာဏာရှင်ဆန်သော ချင်းပြည်အစိုးရသစ် တစ်ခုကို အလျင်စလို တည်ထောင်ရန် ကြိုးစားနေကြောင်း ချင်းညီနောင်အဖွဲ့က ထုတ်ပြန်ချက်များဖြင့် ပြောဆိုထားကြောင်း သိရသည်။

ချင်းအမျိုးသားအလံအဖြစ် CNF အဖွဲ့၏ အလံကို သတ်မှတ်ခြင်းမှာ အဖွဲ့အစည်းတစ်ခု၏ အလံဖြစ်နေသည့်အတွက် ချင်းညီနောင်များမှာ ချင်းပြည်အစိုးရအဖွဲ့ထဲ မပါဝင်ရသည့် အကြောင်းအရင်းထဲက တစ်ခုဖြစ်ကြောင်း သိရသည်။