ရှမ်းမြောက်ဒေသ နောင်ချိုမြို့နယ်တွင် စစ်ကောင်စီတပ်များနှင့် တအောင်းတပ် TNLA တပ်တို့ကြား တိုက်ပွဲများ ပြင်းထန်လျက်ရှိကြောင်း TNLA က ယမန်နေ့က ထုတ်ပြန်ထားသည်။

နောင်ချိုမှာရှိသည့် စစ်ကောင်စီ၏ အမတ (၃၅၄) တပ်စခန်း၊ တောင်ခမ်းရွာအနီးတ၀ိုက်၊ စစ်ကောင်စီတပ် (၉၀၂) တပ်စခန်းနှင့် မကျီးရေရွာအနီးတ၀ိုက်တွင် TNLA နှင့် စစ်ကောင်စီတပ်တို့အကြား တိုက်ပွဲဖြစ်ပွားလျက်ရှိသည်။

ယမန်နေ့ နံနက် (၂း၃၀) နာရီအချိန်တွင် စစ်ကောင်စီ အမြောက်တပ် (၃၅၄)တပ်စခန်း၌လည်းကောင်း၊ တောင်ခမ်းရွာအနီးတ၀ိုက်တွင် နေ့လည် (၁၁း၀၀)နာရီအချိန်၌လည်းကောင်း၊ ညနေ (၃း၄၀)နာရီအချိန်တွင် မကျီးရေရွာအနီးတ၀ိုက်၌လည်းကောင်း၊ စစ်ကောင်စီ (၉၀၂)တပ်စခန်းနေရာတွင် ညနေ (၃း၄၅)နာရီအချိန်၌ လည်းကောင်း တိုက်ပွဲဖြစ်ပွားခဲ့ကြသည်။

PSLF/TNLA ထိန်းချုပ်ထားသည့် နောက်ချိုမြို့ တောင်ရပ်ကွက်နှင့် ရွှေမုဠောဘုရားကို စက်တင်ဘာလ ၁၄ ရက်နေ့တွင် စစ်ကောင်စီတပ်မှ လေကြောင်းအသုံးပြုပြီး ပေါင် (၅၀၀)ဗုံးဖြင့် ထပ်မံလာရောက်ဗုံးကြဲ တိုက်ခိုက်ခတ်ခဲ့သည်။

ပြည်သူလူထုများအိပ်မောကျနေချိန် ည(၁၂း၀၀)နာရီအချိန်တွင် စစ်ကောင်စီတပ်မှ ဖျက်အားပြင်းလက်နက်ကြီးဖြစ်သည့် ပေါင် (၅၀၀)ဗုံး (၃)လုံး လာရောက်ကြဲချတိုက်ခိုက်ခဲ့၍ ဒေသခံနေအိမ် (၅)လုံး ထိခိုက်ပျက်စီးသွားခဲ့ရသည်။

ရှမ်းပြည်နယ်တောင်ပိုင်း ရပ်စောက်မြို့နယ် ကျောက်ဂူမှ နောင်ချိုမြို့နယ်အတွင်းသို့ စစ်အင်အားပြန်လည်ဖြည့်တင်းရန် ကြိုးပမ်းနေသော စစ်ကောင်စီတပ်သည် ထိုးစစ်ဆင်လာ၍ နှစ်ဖက်တိုက်ပွဲ ဖြစ်ပွားခဲ့သည်။

စစ်ကောင်စီတပ်သည် တအာင်းတပ်မတော် PSLF/TNLA အုပ်ချုပ်နေသည့် မြို့များဖြစ်သည့် ကွတ်ခိုင်၊ နမ့်ဆန်၊ မန်တုံ၊ သီပေါ၊ ကျောက်မဲ၊ နောင်ချိုနှင့် နမ့်ခမ်းမြို့တို့တွင် အရပ်သားပစ်မှတ်များဦးတည်ကာ နေ့စဥ်လာရောက်ဗုံးကြဲတိုက်ခိုက်နေပြီး စစ်ရာဇဝတ်မှုကို ပြောင်ပြောင်တင်းတင်း ချိုးဖောက်နေသည်။