ရခိုင်ပြည် သံတွဲမြို့နယ် နန်းချောင်းကျေးရွာကို စစ်ကောင်စီက လေကြောင်းဗုံးကြဲတိုက်ခိုက်၍ အပြစ်မဲ့အရပ်သားပြည်သူ ၈ ဦးဒဏ်ရာရရှိသွားကြောင်း သိရသည်။
နိုဝင်ဘာလ ၂၇ ရက်နေ့ နံနက် ၁၁ နာရီခန့်က ဂျက်ဖိုက်တာဖြင့် ဗုံးလာကြဲတိုက်ခိုက်ခဲ့ခြင်းဖြစ်သည်။ နန်းချောင်းကျေးရွာသည် အရပ်သားပြည်သူများနေထိုင်ရာ ကျေးရွာဖြစ်ပြီး စစ်ရေးနှင့် သက်ဆိုင်ခြင်းမရှိသော ရွာလည်းဖြစ်သည်။
ဒဏ်ရာရရှိသူများမှာ မအေးသန္တာထွေး (၁၇ နှစ်)၊ မောင်ခန့်ပိုင်စိုး (၁၇ နှစ်)၊ မအိမြင့်မြတ်ဖြိုး (၁၇ နှစ်)၊ ကိုအောင်ခန့်ကျော် (၂၄ နှစ်)၊ ဦးကျော်လင်းသူ (၄၀ နှစ်)၊ ဒေါ်ငယ်မရီး (၅၀ နှစ်)၊ ဦးမောင်ရိုင်သိန်း (၅၈ နှစ်) ဒေါ်ခင်၀င်း (၇၁ နှစ်) တို့ဖြစ်သည်။
ပြီးခဲ့သည့် နိုဝင်ဘာလ ၂၄ ရက်နေ့ကလည်း သံတွဲမြို့နယ် သစ်ငုတ်တောင်ကျေးရွာကို စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်မှုကြောင့် အသက် ၁၆ နှစ်အရွယ် ကလေးတစ်ဦးသေဆုံးပြီး ၃ ဦး ဒဏ်ရာပြင်းထန်စွာ ရရှိသွားကြောင်း သိရသည်။
နိုဝင်ဘာလ ၁၀ ရက်နေ့ကလည်း သံတွဲမြို့ကို စစ်ကောင်စီ လေကြောင်းဗုံးကြဲတိုက်ခိုက်မှုကြောင့် မြို့ခံအမျိုးသမီး၂ ဦးသေဆုံးခဲ့ရသည်။
နိုဝင်ဘာလ ၁ ရက်မှ ၂၆ ရက်နေ့အတွင်း ရခိုင်ပြည်မှာ စစ်ကောင်စီဗုံးကြဲတိုက်ခိုက်မှုနှင့် သေနတ်ပစ်သတ်မှုကြောင့် အရပ်သားပြည်သူ ၂၀ ဦးသေဆုံးခဲ့ရပြီး အမျိုးသမီး ၉ ဦးနှင့် အမျိုးသား ၁၁ ဦးပါဝင်ကြောင်း AAPP က ထုတ်ပြန်ထားသည်။ ထိုအထဲတွင် အသက် ၁၈ နှစ်အောက် ကလေး ၆ ဦးပါဝင်ကြောင်း သိရသည်။
၂၀၂၃ နိုဝင်ဘာ ၁၃ မှ ၂၀၂၄ နိုဝင်ဘာ ၁၃ ရက်နေ့အထိ ရခိုင်ပြည် တကျော့ပြန်တိုက်ပွဲအတွင်း စစ်ကောင်စီ၏ ပစ်ခတ်သတ်ဖြတ်မှုကြောင့် အပြစ်မဲ့အရပ်သားပြည်သူ ၇၃၅ ဦးသေဆုံးခဲ့ရပြီး ၁၅၆၉ ဦးမှာ ထိခိုက်ဒဏ်ရာများရရှိခဲ့ကြောင်း ULA/AA အစိုးရအဖွဲ့၏ လူသားချင်းစာနာ ထောက်ထားရေးနဲ့ ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး HDCO က နိုဝင်ဘာ ၁၈ ရက်တွင် ထုတ်ပြန်ထားသည်။
