(စကခ ၁၅ ကွက်ကဲရေးမှူး ဗိုလ်မှူးချုပ် သူရိန်ထွန်း အင်အား ၁၅၀ ခန့်ဖြင့် ထွက်ပြေးလွတ်မြောက်နေ)
မောင်တောဒေသတွင် စစ်ကောင်စီတပ်ဖွဲ့ဝင်များနှင့် မွတ်ဆလင်လက်နက်ကိုင်များ ထွက်ပြေးလွတ်မြောက်နေ၍ ရခိုင်ပိုင်နက် နတ်မြစ်အတွင်း ရေကြောင်းခရီးသွားလာခွင့်များကို အကန့်အသတ်မရှိ ပိတ်ပင်တားမြစ်ကြောင်း အာရက္ခတပ်တော် AA က ယနေ့ ဒီဇင်ဘာ ၈ ရက်တွင် ထုတ်ပြန်အသိပေးထားသည်။
မောင်တောဒေသတွင် တစ်ခုတည်းကျန်ရှိနေသော အမှတ် ၅ နယ်ခြားစောင့်တပ်စခန်း (နခခ ၅) ကို AA က ယနေ့ ဒီဇင်ဘာလ ၈ ရက် နံနက် ၉ နာရီခွဲအချိန်တွင် အပြီးသတ်သိမ်းပိုက်လိုက်ပြီဖြစ်ကြောင်း သိရသည်။
နခခ ၅ ထဲက စစ်ကောင်စီတပ်သားများ၊ စစ်ကောင်စီနှင့် ပူးပေါင်းနေသော မွတ်ဆလင်လက်နက်ကိုင်တပ်ဖွဲ့ဝင်များမှာ လက်နက်များဖြင့် ကစဉ့်ကလျား ထွက်ပြေးလွတ်မြောက်နေဆဲဖြစ်၍ နတ်မြစ်အတွင်း ရေကြောင်းခရီးသွားလာခွင့်ကို ပိတ်ပင်ရခြင်းဖြစ်ကြောင်း AA က ဆိုသည်။
Western News ၏ စစ်ရေးသတင်းရင်းမြစ်များပြောပြချက်အရ နခခ ၅ ထဲက စကခ ၁၅ ကွက်ကဲရေးမှူး ဗိုလ်မှူးချုပ် သူရိန်ထွန်းမှာ မွတ်ဆလင်တပ်သားအပါအဝင် အင်အား ၁၅၀ ခန့်ဖြင့် ကျောက်ပန္ဒူဘက်သို့ ထွက်ပြေးသွားကြောင်း သိရသည်။
“နခခ ၅ မှာ စကခ ၁၅ က ဗိုလ်မှူးချုပ်ပေါ့။ ဗိုလ်မှူးချုပ် သူရိန်ထွန်း ဦးဆောင်တဲ့ ARSA, RSO, ARA က သူတွေအပါအဝင် အင်အား ၁၅၀ ခန့်ဟာ နတ်မြစ်မှာရှိတဲ့ ကျောက်ပန္ဒူကျေးရွာ ရေကြောင်းကပေါ့ ကမ်းနားလမ်းကနေ ပျောက်ကျားစနစ်နဲ့ ထွက်ပြေးသွားတယ်။ ဒီဇင်ဘာ ၆ ရက်နေ့ ညမှာပဲ ထွက်ပြေးသွားတာဖြစ်တယ်” ဟု သတင်းရင်းမြစ်က ပြောသည်။
ထွက်ပြေးသွားသည့် ဗိုလ်မှူးချုပ် သူရိန်ထွန်း၏ စစ်ကြောင်းကို ယမန်နေ့ ဒီဇင်ဘာလ ၇ ရက်နေ့ နံနက် ၇ နာရီခန့်တွင် ကျောက်ပန္ဒူကျေးရွာအနီးမရောက်မီ အာရက္ခတပ်တော် AA က ကြားဖြတ်တိုက်ခိုက်၍ နှစ်ဖက်တိုက်ပွဲပြင်းထန်ခဲ့ကြောင်း သတင်းရင်းမြစ်က ပြောသည်။
“အဲဒီတိုက်ပွဲမှာ စစ်ကောင်စီဘက်က ဂျက်ဖိုက်တာ နှစ်စီး၊ Y12 နှစ်စီးနဲ့ လေကြောင်းကနေ ဗုံးကြဲတယ်။ ပြီးတော့ စစ်ကောင်စီ နတ်မြစ်ဝမှာ နေဗီ ၃ စီးလောက်ရှိတယ်။ နေဗီကလည်း လက်နက်ကြီး၊ လက်နက်ငယ်တွေနဲ့ ပစ်ကူပေးတယ်။ တချို့ဆို စပီးဘုတ်တွေနဲ့ ကမ်းနားအထိ ကပ်ပြီးတော့ ပစ်ခတ်တာရှိတယ်” ဟု စစ်ရေးသတင်းရင်းမြစ်က ဆိုသည်။
အဆိုပါ ကျောက်ပန္ဒူရွာအနီး တိုက်ပွဲတွင် စကခ ၁၅ မှ ဗိုလ်မှူးချုပ် သူရိန်ထွန်းမှာ ကျဆုံးသွားသည်ဟု ကနဦးသတင်းရရှိထားသော်လည်း ၎င်း၏ အလောင်းအား ရှာမတွေ့သေးကြောင်း သတင်းရင်းမြစ်များက ပြောဆိုကြသည်။
ထွက်ပြေးလွတ်မြောက်နေသော ဗိုလ်မှူးချုပ် သူရိန်ထွန်း စစ်ကြောင်းမှာ မွတ်ဆလင် လက်နက်ကိုင်များ၏ အကူအညီများဖြင့် အာရက္ခတပ်တော် AA အား ပြန်လည်ခုခံတိုက်ခိုက်နိုင်သည့် အခြေအနေရှိကြောင်း သိရသည်။
ထို့ကြောင့် နခခ ၅ အနီးအနားသာမက မောင်တောဒေသ၏ အခြားသောနေရာများ၌ပါ တိုက်ပွဲများ ဆက်လက်ဖြစ်ပွားနေဆဲနှင့် စစ်ကောင်စီတပ်သားများအပါအဝင် မွတ်ဆလင် စစ်သွေးကြွများမှာ လက်နက်များဖြင့် ဘင်္ဂလားဒေ့ရှ်-အာရက္ခနယ်စပ်၊ နတ်မြစ်တစ်လျှောက်၌ စက်လှေ၊ မော်တော်ဘုတ်၊ လောင်းလှေများဖြင့် ထွက်ပြေးရန် ကြိုးစားလျှက်ရှိနေကြောင်း AA က သတိပေးထားသည်။
