ရခိုင်ပြည် တောင်ကုတ်မြို့နယ်က အမှတ် ၅ စစ်ဆင်ရေးကွက်ကဲမှုဌာနချုပ် (စကခ ၅) ကို အာရက္ခတပ်တော် AA က သိမ်းပိုက်လိုက်ပြီ တောင်ကုတ်မြို့နယ်တစ်ခုလုံးကို ထိန်းချုပ်လိုက်ပြီး ဖြစ်ကြောင်း စစ်ရေးသတင်းရင်းများထံမှ သိရသည်။
တောင်ကုတ်မြို့ကို နိုဝင်ဘာလ ၂၄ ရက်နေ့က အလုံးစုံထိန်းချုပ်ပြီးနောက် စကခ ၅ တပ်မ၊ ခမရ ၃၄၆ တပ်ရင်း၊ ခမရ ၅၄၄ တပ်ရင်းတို့ကို AA က ဆက်လက်ထိုးစစ်ဆင်တိုက်ခိုက်ခဲ့သည်။
ယမန်နေ့ ဒီဇင်ဘာလ ၁၄ ရက်နေ့ ညနေပိုင်းတွင် စကခ ၅ တပ်မအပါအဝင် တပ်ရင်းများကို သိမ်းပိုက်နိုင်ခဲ့၍ လက်ရှိတွင် တောင်ကုတ်မြို့နယ်တစ်ခုလုံးအား အပြီးသတ်သိမ်းပိုက် ထိန်းချုပ်လိုက်ပြီဟု သတင်းရင်းမြစ်က ဆိုသည်။
“တောင်ကုတ်မြို့နယ် တစ်ခုလုံးကို AA က သိမ်းပိုက်ပြီဗျ။ နောက်ဆုံးကျန်တဲ့ စကခ ၅ တပ်မဌာနချုပ်၊ ခမရ ၅၄၄၊ ခမရ ၃၄၆ တို့ကိုလည်း သိမ်းလိုက်ပါပြီ။ တောင်ကုတ်ဒေသတစ်ခုလုံးဟာ AA ရဲ့ လက်ထဲသို့ ရောက်သွားပါပြီ” ဟု ပြောသည်။
တောင်ကုတ်တက္ကသိုလ်ထဲက စစ်ကောင်စီတပ်ရင်း၊ ရဲစခန်းအပါအဝင် ပန်းမြောက်တောင် အမြောက်တပ်ရင်းနှင့် တပ်စခန်းပေါင်း ၁၀ ကို အာရက္ခတပ်တော် AA က နိုဝင်ဘာလ ၄ ရက်မှ ၂၀ ရက်အတွင်းမှာ ပထမဆုံး သိမ်းပိုက်ခဲ့သည်။
ပြီးမှ AA သည် တောင်ကုတ်ဒေသရှိ စကခ ၅ တပ်မနှင့် တပ်ရင်းနှစ်ခုကို ဆက်လက်ထိုးစစ်ဆင်ကာ လက်ရှိတွင် တောင်ကုတ်ဒေသတစ်ခုလုံးအား ထိန်းချုပ်နိုင်ခဲ့ပြီး ထွက်ပြေးလွတ်မြောက်နေသော စစ်ကောင်စီတပ်ဖွဲ့ဝင်များကို လိုက်လံရှင်းလင်းနေသည်ဟု သတင်းရင်းမြစ်များက ပြောဆိုကြသည်။
“AA က အခု ရခိုင်ပြည်ထဲက မြို့သိမ်းထားတာဟာ ပလက်ဝအပါအဝင် ၁၃ မြို့အထိ ဖြစ်လာပါပြီ။ အမ်း နပခ လည်း မကြာခင် ကျမယ်လို့ သိရပါတယ်။ မြို့ပေါ်ကိုတော့ AA က ထိန်းချုပ်ထားတယ်။ ဂွမြို့ထဲကို တိုက်ပွဲက မကြာခင် ရောက်လာပါတော့မယ်။ AA က တစ်မြို့ပြီးတစ်မြို့ ဆက်တိုက် သိမ်းနိုင်တာကို အရမ်းဝမ်းသာရပါတယ်” ဟု တောင်ကုတ်ဒေသခံ စစ်ရှောင်တစ်ဦးက ပြောသည်။
အာရက္ခတပ်တော် AA သည် ပြီးခဲ့သည့်ရက်ပိုင်းက မောင်တော နယ်ခြားစောင့်တပ် နခခ ၅ တပ်စခန်းကို သိမ်းပိုက်ပြီးနောက် မောင်တောမြို့နယ်ဒေသတစ်လုံးကို အပြီးသတ်သိမ်းပိုက် ထိန်းချုပ်နိုင်ခဲ့သည်။
လက်ရှိတွင် အာရက္ခတပ်တော်သည် အမ်းနှင့် ဂွမြို့ကို သိမ်းပိုက်နိုင်ရန် စစ်ကောင်စီတပ်အား အပြင်းအထန် ထိုးစစ်ဆင်တိုက်ခိုက်နေသည်ဟု စစ်ကောင်စီတပ်ဖွဲ့ဝင်တစ်ချို့ အလံဖြူထောင် အလင်းဝင်ရောက်မှုများ ရှိနေကြာင်း သိရသည်။
