ရခိုင်ပြည် အမ်းမြို့ရှိ အနောက်ပိုင်းတိုင်းစစ်ဌာနချုပ် (နပခ) မှ အလင်းဝင်ရောက်လာသူများကို အာရက္ခတပ်တော် AA က ကယ်ထုတ်နေစဉ် စစ်ကောင်စီက လေကြောင်းတိုက်ခိုက်မှုများ ဆက်တိုက် ပြုလုပ်ခဲ့သည်ကို ရုပ်သံဖိုင်အရ တွေ့ရသည်။
တိုင်းစစ်ရုံးထဲက စစ်ဆေးမှူးအပါအဝင် စစ်ကောင်စီတပ်သား ရာနှင့်ချီ အာရက္ခတပ်တော် AA ထံ ထပ်မံ၍ လက်နက်ချ အလင်းဝင်ကြကြောင်း ဒီဇင်ဘာ ၁၉ ရက်တွင် ရုပ်သံနှင့်တကွ AA က ထုတ်ပြန်ထားသည်ကို တွေ့ရသည်။
အဆိုပါ ရုပ်သံတွင် စစ်ကောင်စီတပ်သားတစ်ဦးက “ကျနော်တို့ စစ်တပ်ကို မကြိုက်လို့ အလင်းဝင်တာ ” ဟု ပြေးလွှားနေရင်းကနေ ပြောဆိုသည်။
ယင်းကဲ့သို့ ထွက်ပြေးအလင်းဝင်ရောက်လာသည့်သူများထဲတွင် သက်ကြီးပိုင်းများလည်း ပါဝင်ပြီး အမျိုးသမီးများနှင့် စစ်ကောင်စီတပ်သားများ ခြေလက်အင်္ဂါထိခိုက်နေသူများ အများအပြား ပါဝင်သည်ကိုလည်း ရုပ်သံဖိုင်တွင် တွေ့ရသည်။
စစ်ကောင်စီတပ်သားတစ်ဦးက “ကျနော့်ကို ရေနည်းနည်းတိုက်ပါ။ ကျနော်တို့ကတော့ အလင်းဖြူထောင်မှာပဲ။ ကျနော်တို့က အသပ်စွန့်ပြီးတော့ အစ်ကိုတို့ဆီကို လာခဲ့တာပါ။ ရေသောက်ပါရစေ”ဟု ပြန်လည်ပြောဆိုနေသည်ကို တွေ့ရသည်။
AA တပ်ဖွဲ့ဝင် ခေါင်းဆောင်ဟု ယူဆရသူတစ်ဦးက “အားစိုက်ပြီးတော့ သွားနော်၊ အသက်လုံခြုံပြီ။ ဘာမှ မဖြစ်စေရေဘူး။ ခင်ဗျားတို့အသက်ကို ကျနော်တို့ အကုန်လုံး အာမခံတယ်။ ရှေ့ဆိုရောက်ပြီ။ ဒီခြံစည်းရိုးလေးကျော်ရင်ရောက်ပြီး “ပြန်လည်ပြောဆိုနေသည်ကို ကြားနေရသည်။
နောက်ဆုံးတစ်ခုတည်းသာ ကျန်ရှိတော့သည့် အနောက်ပိုင်းတိုင်းစစ်ဌာနချုပ်၏ တိုင်းစစ်ရုံးကို AA က ဆက်လက်ထိုးစစ်ဆင်တိုက်ခိုက်နေရာ လက်ရှိတွင် တိုင်းစစ်ရုံးထဲ အနည်းငယ်သော နေရာအချို့သာ ကျန်ရှိတော့ကြောင်း AA က ပြောသည်။
စစ်ကောင်စီသည် လေကြောင်းမှ မရပ်မနား တောက်လျှောက် ပစ်ခတ်တိုက်ခိုက်နေသောကြောင့် အမ်း နပခ တိုက်ပွဲမှာ မြေပြင်တိုက်ပွဲထက် လေကြောင်းပစ်ခတ်မှုများဖြင့် တိုက်ပွဲပြင်းထန်နေကြောင်း သိရသည်။
အလင်းဝင်ရောက်လာသူ ဒဏ်ရာနှင့် စစ်ကောင်စီတပ်သားတစ်ဦးက “လူကြီးတွေက ကျနော်တို့ကို ပစ်ထားခဲ့တာပါ။ နပခမှူးတွေ၊ ဦးစီတို့ ပြေးသွားကြတယ်။ အခုထပ်ပြီးတော့ ပြေးမလွတ်တော့ အထဲ ပြန်ဝင်လာတယ်”ဟုပြောသည်။
