ယခုနှစ် ၂၀၂၅ နှစ်အတွင်းမှာ မြန်မာပြည်အလယ်ပိုင်း ထိုးဖောက်ဝင်ရောက်နိုင်ရေး စစ်ဆင်ရေးရည်မှန်းချက်များ ထားရှိထားပြီး ဝတ်မှုန်ကူးသယ်ဆောင်လာမည်ဟု ကျောင်းသားလက်ရုံးတပ်တော် SAF က ယနေ့ ဇန်နဝါရီ ၁ ရက်တွင် ထုတ်ပြန်သည်။

ပြီးခဲ့သည့် ၂ နှစ်ခန့်ကပင် အညာဒေသနှင့် မြေလတ်ဒေသတွင် စစ်ဒေသများထားရှိကာ ပြောက်ကျားစစ်၊ လှုပ်ရှားစစ်များကို ဆောင်ရွက်လျက်ရှိကြောင်း ကျောင်းသားလက်ရုံးတပ်တော် – SAF က ပြောသည်။

ယခု၂၀၂၅ ခုနှစ် သည် တောင်တန်းဒေသမှသည် မြေပြန့်ဒေသများဆီသို့ တော်လှန်စစ်ကို ဝတ်မှုန်ကူး သယ်ဆောင်လာရမည့် နှစ်တစ်နှစ်ဟု SAF က ယုံကြည်ထားကြောင်း ထုတ်ပြန်သည်။

လူမျိုးစုလက်နက်ကိုင်တော်လှန်ရေးအဖွဲ့အစည်းများ (EROs) ထံမှ သင်ယူဆည်ပူးအတွေ့အကြုံယူရရှိခဲ့သည့် လေ့ကျင့်ရေး၊ စစ်ရေး၊ ထောက်လှမ်းရေး၊ စစ်ဆင်ရေး၊ စည်းရုံးရေးဆိုင်ရာအတွေ့အကြုံများကို “မြန်မာပြည်အလယ်ပိုင်း ထိုးဖောက်ဝင်ရောက်နိုင်ရေး” စစ်ဆင်ရေးရည်မှန်းချက်အတွက် ဝတ်မှုန်ကူးသယ်ဆောင်လာမည်ဟု ကျောင်းသားလက်ရုံးတပ်တော် – SAF က ပြောသည်။

၂၀၂၁ ခုနှစ်၊ ဖေဖော်ဝါရီလ (၁) ရက် မှသည် စစ်အုပ်စု အာဏာသိမ်းခဲ့သည့် လေးနှစ်တာကာလအတွင်း လူထုသည် စစ် (၃) စစ်၏ ဂုတ်သွေးစုပ်ဖိနှိပ်မှု လှိုင်းတံပိုးအမျိုးမျိုးကို ရဲရဲဝံ့ဝံ့ရင်ဆိုင်ဖြတ်ကျော်ခဲ့ပြီး တော်လှန်စစ်သည်လည်း တစ်နှစ်ထက်တစ်နှစ် သိသာစွာပင် ရေစီးသန်အရှိန်ရလာခဲ့ကြောင်း ဆိုသည်။

ကုန်ခဲ့သည့် နှစ်များသည် ကျောင်းသားလက်ရုံးတပ်တော် – SAF အတွက် တိုက်ရင်းတည်ဆောက်၊ တည်ဆောက်ရင်းတိုက်ကာ တိုက်စွမ်းရည်၊ တိုက်စွမ်းအား ဖြည့်တင်းနိုင်ရေးအတွက် အရေးကြီးသော သက္ကရာဇ်များဖြစ်ခဲ့သည်ဟု ပြောသည်။

တော်လှန်ရေးမဟာမိတ်များ၊ မိတ်ဖက်များနှင့်အပြန်အလှန် ယုံကြည်မှု၊ လေးစားမှု၊ တော်လှန်ရေးတာဝန်များကို ပူးတွဲဆောင်ရွက်မှုအားဖြင့် ဘုံရန်သူ စစ် (၃) စစ် ဖြိုချရေးရည်မှန်းချက်အတွက် ဟန်ချက်ညီညီ တိုက်ပွဲဝင်ခဲ့ကြကြောင်း SAF က ထုတ်ပြန်ထားသည်။

ယခု ၂၀၂၅ ခုနှစ်သည် တော်လှန်စစ်ကို ပီပီပြင်ပြင် အကောင်အထည် ဖော်နိုင်ရေးအတွက် တော်လှန်ရေးတပ်ပေါင်းစု တစ်ရပ်ဖြစ်တည်လာရန် နိုင်ငံရေး၊ စစ်ရေးအရ ညှိနှိုင်းဆွေးနွေး လက်တွဲအကောင်အထည်ဖော်ရမည့် အရေးကြီးသည့်နှစ်ဟု ရှုမြင်ကြောင်းလည်း SAF က ဆိုသည်။

စစ် (၃) စစ်အမြစ်ဖြတ်ဖြိုချရေးသည် တပ်ပေါင်းစု၏လက်သီးဖြင့်သာ အလဲထိုးဖြိုချနိုင်မည်ဟု ယုံကြည်ပြီး “လူထုလွတ်မြောက်ရေးနှင့် နိုင်ငံတော်သစ်ဆီသို့” မျှော်ရည်ကာ တော်လှန်ရေးတပ်ပေါင်းစု တစ်ရပ်ပေါ်ပေါက်လာရေး၊ စစ် (၃) စစ်အမြစ်ဖြတ်ချေမှုန်းရေးနှင့် နိုင်ငံတော်သစ် တစ်ရပ်ထူထောင်နိုင်ရေးတို့အတွက် ဖိနှိပ်ခံလူထုနှင့်အတူ ကျောချင်းကပ် ရင်ချင်းဆက်ကာ တော်လှန်စစ် ဆုံးခန်းတိုင်သည်အထိ လက်နက်စွဲကိုင်တိုက်ပွဲဝင်သွားမည်ဖြစ်ကြောင်း SAF က ထုတ်ပြန်ထားသည်။