ရခိုင်ပြည် ကျောက်တော်မြို့ လူနေရပ်ကွက်များနှင့် ဈေးကို စစ်ကောင်စီက ယနေ့ ဇန်နဝါရီလ ၁၁ ရက် နံနက် ၉ နာရီကျော်အချိန်တွင် ဗုံးကြဲတိုက်ခိုက်ခဲ့သည်။
ဆေးရုံသွားရောက်ခဲ့သည့် ဒေသခံတစ်ဦးက “သေဆုံးသူ ၈ ဦးလောက်ရှိတယ်လို့ ပြောတယ်။ အတိအကျတော့ မသိရသေးဘူး။ အဲထက်လည်း ပိုကောင်းပိုနိုင်ပါတယ်။ ဒဏ်ရာရသူက ၂၀ လောက်တောင်ရှိတယ်လို့ ပြောတယ်။ တာဝန်ရှိသူတွေ ထုတ်ပြန်လာမယ်ထင်ပါတယ်” ဟု ပြောသည်။
ကျောက်တော်မြို့သည် ဖုန်းလိုင်း၊ အင်တာနက်လိုင်း ဖြတ်တောက်ခံထားရသည့် မြို့နယ်ထဲက တစ်ခုဖြစ်သည်။
ကျောက်တော်မြို့သည် အာရက္ခတပ်တော် AA ထိန်းချုပ်သိမ်းပိုက်ထားသော မြို့နယ်တစ်ခုဖြစ်ပြီး စစ်ကောင်စီသည် တိုက်ပွဲဖြစ်ပွားခြင်းမရှိဘဲ တမင်တကာ ရည်ရွယ်ချက်ရှိရှိ လေကြောင်းဗုံးကြဲတိုက်ခိုက်ခြင်းဖြစ်ဟည်။
အာရက္ခတပ်တော် AA ကလည်း ကျောက်တော်ဗုံးကြဲခံရမှုကို ထုတ်ပြန်ထားပြီး စစ်ကောင်စီက ဗုံး ၁၅ ခန့် ကြဲချတိုက်ခဲ့ကြောင်းနှင့် ထိခိုက်သေဆုံးစာရင်းများကို ထုတ်ပြန်ပေးသွားမည်ဟု ဆိုသည်။
ပြီးခဲ့သည့် ဇန်နဝါရီလ ၈ ရက် နေ့လယ် ၁ နာရီကျော်အချိန်ကလည်း ရခိုင်ပြည် ရမ်းဗြဲမြို့နယ် ကျောက်နီမော်ကျေးရွာကို ဗုံးကြဲတိုက်ခိုက်မှုကြောင့် အရပ်သား ၄၁ ဦးသေဆုံးပြီး ၂၇ ဦး ဒဏ်ရာရရှိခဲ့ကြောင်းနှင့် နေအိမ် ၃၉၈ လုံးမီးလောင်ကျွမ်း ပျက်စီးသွားကြောင်း သိရသည်။
အာဏာသိမ်း စစ်ကောင်စီ၏ ရခိုင်ပြည်အတွင်း လက်ရှိ ဗုံးကြဲတိုက်ခိုက်မှုများအားလုံးသည် သူရဲဘောကြောင်သော လုပ်ရပ်ဖြစ်သလို စစ်ရာဇဝတ်မှုကိုပြောင်ပြောင်တင်းတင်း ကျူးလွန်ခြင်း ဖြစ်ကြောင်း အာရက္ခတပ်တော် AA ၏ ပြောခွင့်ရ ဦးခိုင်သုခက ပြောသည်။
“ဘာတိုက်ပွဲမှ ဖြစ်ပွားခြင်းမရှိတော့တဲ့နေရာမှာ အခုလို အပြစ်မဲ့ပြည်သူတွေကို ဦးတည်ပစ်မှတ်ထား တိုက်ခိုက်တာဟာ အကြမ်းဖက်စစ်ကောင်စီအနေနှင့် အလွန်ယုတ်မာသူရဲဘောကြောင်တဲ့လုပ်ရပ်ဖြစ်သလို စစ်ရာဇဝတ်မှုကို ပြောင်ပြောင်တင်းတင်းကျူးလွန်တာလဲဖြစ်ပါတယ်” ဟု ပြောသည်။
အာဏာသိမ်း စစ်ကောင်စီသည် အမှန်တကယ် ငြိမ်းချမ်းရေးလမ်းကြောင်းကို သွားလိုသော ဆန္ဒမရှိကြောင်းနှင့် ယခု ဗုံးကြဲတိုက်ခိုက်မှုများသည် ရန်လိုမုန်းတီးမှုများကို ပြသနေခြင်းဖြစ်ကြောင်း တောင်ကုတ်ဒေသခံ နိုင်ငံရေးအကျဉ်းသားဟောင်းတစ်ဦးက ပြောသည်။
“တကယ့်တကယ် ငြိမ်းချမ်းရေးကို သွားမယ်ဆိုလို့ရှိရင် စစ်ကောင်စီဟာ တစ်ဖက်သက် အပစ်ရပ်လိုက်လို့ ရတယ်။ သူအပစ်ရပ်လိုက်လို့ တစ်ဖက်က တိုင်းရင်းသား ERO တွေဖြစ်ဖြစ် PDF တွေဖြစ်ဖြစ် ထိုးစစ်ဆင်တိုက်ခိုက်ရင် တော်လှန်ရေးတပ်ဖွဲ့တွေကို အပြစ်လို့ ပြောလို့ရတယ်။ ဒါပေမယ့် အခုက အဲလိုမဟုတ်ဘူး။ စစ်ကောင်စီဟာ ငြိမ်းရေးတံခါးဖွင့်ထားတယ်လို့ ပါးစပ်ကပဲ ပြောတာ။ တကယ့်တကယ် ဆိုရင် စစ်အင်အားဖြည့်တာ၊ ထိုးစစ်ဆင်တာတွေ၊ လက်နက်ကြီးလှမ်းပစ်တာတွေ၊ ဝေဟင်က လေကြောင်းက ဗုံးကြဲတာတွေကို စစ်ကောင်စီဟာ နေ့စဉ်လုပ်နေတယ်။ ဒါက တကယ့်ကို ရန်လိုမုန်းတီးမှုကို ပြနေတာဖြစ်တယ်။ ကျောက်နီမော် ဗုံးကြဲခံရမှုမှာ အရပ်သားတွေ ဒါဇင်နဲ့ချီ ထိခိုက်သေဆုံးကြတယ်။ စစ်ကောင်စီရဲ့ လက်ရှိ လုပ်ရပ်ဟာ မြန်မာပြည်ငြိမ်းချမ်းရေးအတွက် အသုံးမဝင်ဘူး။ ဒါတွေအားလုံးက စစ်ကောင်စီရဲ့ စစ်ရာဇဝတ်မှုကျူးလွန်နေတာပဲဖြစ်ပါတယ်” ဟု ပြောသည်။
ယခု ကျောက်တော် ဖြစ်စဉ်မပါဝင်ဘဲ ၂၀၂၄ ခုနှစ် ဒီဇင်ဘာလ ၃၀ ရက်ကနေ ၂၀၂၅ ခုနှစ် ဇန်နဝါရီလ ၁၁ ရက်နေ့အထိ ၁၃ ရက်အတွင်း ရခိုင်ပြည်မှာ အာဏာသိမ်း စစ်ကောင်စီ၏ လေကြောင်းဗုံးကြဲတိုက်ခိုက်မှုကြောင့် ၅၁ ဦးသေဆုံးပြီး ဒဏ်ရာရရှိသူ ၃၇ ဦးရှိကြောင်း Western News ၏ မှတ်တမ်းအရ သိရသည်။
တကျော့ပြန်တိုက်ပွဲ စတင်ခဲ့သည့် ၂၀၂၃ နိုဝင်ဘာလ ၁၃ ရက်နေ့မှ ၂၀၂၄ ခုနှစ် နိုဝင်ဘာလ ၁၃ နေ့ တစ်နှစ်တာအတွင်း အာဏာသိမ်း စစ်ကောင်စီ၏ ဗုံးကြဲတိုက်ခိုက်မှု၊ လက်နက်ကြီးပစ်ခတ်မှုများကြောင့် ရခိုင်ပြည်မှာ သေဆုံးသူ ၇၃၅ ဦးနှင့် ဒဏ်ရာရရှိသူ ၁၅၆၉ ဦးရှိကြောင်း ULA/AA ၏ လူသားချင်းစာနာထောက်ပံ့ရေးရုံး HDCO က တစ်နှစ်တာအစီရင်ခံစာတွင် ဖော်ပြထားသည်။
ဖမ်းဆီးခံရသူပေါင်း ၇၄၉ ဦးရှိခဲ့ပြီး မွတ်ဆလင်ပြည်သူများအပါအဝင် စစ်ဘေးရှောင်ဒုက္ခသည် ၆ သိန်းခန့်ရှိကြောင်း ထုတ်ပြန်ထားသည်။
