ရခိုင်ပြည် မြို့တော် စစ်တွေမြို့ကို အာရက္ခတပ်တော် AA က ထိုးစစ်ဆင်တိုက်ခိုက်လာပါက ပြန်လည်ခုခံနိုင်ရန် အာဏာသိမ်း စစ်ကောင်စီသည် ဒေါ်စောမြရာဇာလင်း ဦးဆောင်သော ရခိုင်ပြည်လွတ်မြောက်ရေးပါတီ ALP နှင့် ခံစစ်ပူးပေါင်းပြင်ဆင်ထားကြောင်း ဒေသခံများထံမှ သိရသည်။
ရခိုင်လက်နက်ကိုင်အဖွဲ့တစ်ခုဖြစ်သည့် ALP သည် အာဏာသိမ်း စစ်ကောင်စီနှင့် ငြိမ်းချမ်းရေးယူထားသော အဖွဲ့တစ်ခုဖြစ်ပြီး လက်ရှိ စစ်တွေမြို့တွင် ရုံးအခြေစိုက်ကာ စစ်ကောင်စီ၏ အကူအညီများဖြင့် ဒေသခံများကို ခေါ်ယူပြီး စစ်သင်တန်းပေးနေကြောင်း မြို့ခံသတင်းရင်းမြစ်အချို့က ပြောသည်။
ALP သည် စစ်ကောင်စီတပ်ဖွဲ့ဝင်များ၏ အခြံအရံများဖြင့် ၂၀၂၄ ခုနှစ် နိုဝင်ဘာလက စတင်ခဲ့ပေးခဲ့သည့် အခြေခံစစ်ပညာသင်တန်းကို ဒီဇင်ဘာလ တတိယအပတ်တွင် သင်တန်းဆင်းပွဲပြုလုပ်ခဲ့ကြောင်း မြို့ခံသတင်းရင်းက ပြောသည်။
“ALP ရဲ့ အခြေခံစစ်ပညာသင်တန်းကို မင်းဂံက ဒေါ်စောမြရာဇာလင်းရဲ့ နေအိမ်ခြံဝန်းနဲ့ စက်ရုံစုရပ်ကွက်မှာရှိတဲ့ ဌာနချုပ်ရုံးခြံဝန်းမှာ ပြုလုပ်ခဲ့တာဖြစ်ပါတယ်။ မင်းဂံက သင်တန်းမှာ မင်းဂံရပ်ကွက်က ခေါ်ထားတဲ့ ဒေသခံ အမျိုးသား၊ အမျိုးသမီးတွေ၊ ဘင်္ဂါလီမွတ်ဆလင်တွေ ၄၀ လောက်ရှိပါမယ်။ စက်ရုံစုဘက်မှာတော့ ၅၀ လောက်ရှိမယ်လို့ ပြောတယ်။ အခုလည်း ထပ်ပြီး လူစုနေတယ်လို့ သိရပါတယ်။ စစ်ကောင်စီကလည်း ကျေကျေနပ်နပ်ကို ခွင့်ပြုထားတာပါ” ဟု ပြောသည်။
ALP ၏ အခြေခံစစ်ပညာသင်တန်း၌ သင်တန်းဆရာများထဲတွင် စစ်ကောင်စီတပ်ဖွဲ့ဝင် အရာရှိအချို့ ပါဝင်ကြောင်းနှင့် လက်နက်အချို့ကိုလည်း စစ်ကောင်စီဘက်က ထောက်ပံ့ပေးထားကြောင်း သတင်းရင်းမြစ်က အခိုင်အမာ ပြောဆိုကြသည်။
အာရက္ခတပ်တော် AA သည် ရခိုင်ပြည်အတွင်း မြို့နယ် ၁၇ ခုရှိသည့်အနက် ၁၄ ခုကို အပြီးအပိုင်သိမ်းပိုက်ထားကာ မြို့တော် စစ်တွေ၊ ကျောက်ဖြူနှင့် မာန်အောင်မြို့တို့သာ ကျန်ရှိတော့သည်။
တစ်ဆက်တည်းမှာလည်း ယင်းသုံးမြို့ရှိ စစ်ကောင်စီတပ်ရင်းတပ်ဖွဲ့များကို AA က ဝိုင်းရံပိတ်ဆို့ထားပြီး ထိုးစစ်ဆင်တိုက်ခိုက်မည့် အလားအလာဖြင့် စစ်ဆိုင်ထားကြောင်း ဒေသခံများထံမှ သိရသည်။
၂၀၂၄ ခုနှစ် ဒီဇင်ဘာလ နောက်ဆုံးအပတ်ကလည်း စစ်တွေမြို့အဝင်ရှိ ကျောက်တန်းစစ်ရေးဂိတ်အနီးနှင့် ကုလားတန်မြစ်ဝရှိ စစ်ကောင်စီ နေဗီများကို အာရက္ခတပ်တော် AA က လက်နက်ကြီးပစ်ခတ် တိုက်ခိုက်ခဲ့သည်။
လက်ရှိ ရခိုင်ပြည်၏ စစ်ရေးအခြေအနေနှင့် နယ်မြေသိမ်းပိုက်ရရှိယူမှုမှာ AA လက်ထဲတွင်ရှိနေသည့်အတွက် ဒေါ်စောမြရာဇာလင်း ဦးဆောင်သော ရခိုင်ပြည်လွတ်မြောက်ရေးပါတီ ALP အနေဖြင့် စစ်ကောင်စီနှင့် ပူးပေါင်းဆောင်ရွက်ကို ရပ်တန့်ကာ AA နှင့်ပူးပေါင်း၍ စစ်ကောင်စီကို ပြန်လည်တိုက်ခိုက်သင့်ကြောင်း နိုင်ငံရေးအကျဉ်းသားဟောင်းတစ်ဦးက သုံးသပ်သည်။
“ALP ဟာ ဒီအချိန်မှာ အထူးသဖြင့် ရခိုင်ပြည်သူတွေအတွက် မှန်ကန်တဲ့ လမ်းကို ရွေးသင့်နေပြီ။ AA က ကျန်မြို့တွေကို သိမ်းမှာပဲ။ အဲအချိန်မှာ ALP က စစ်ကောင်စီနဲ့အတူ ပြန်ခုခံမှာလား။ ဒါဆိုရင်တော့ ရခိုင်ပြည်သူတွေက လက်ခံကြမှာ မဟုတ်ဘူး။ AA နဲ့ပူးပေါင်းပြီး စစ်ကောင်စီကို ပြန်တိုက်ခိုက်တာက လူထုချစ်ခင်မှုကိုလည်း ရမယ်။ တော်လှန်ရေးလည်း မြန်မြန်ဆန်ဆန် ပြီးစီးသွားပါမယ်။ မဟုတ်ဘူးဆိုရင်တော့ အချင်းချင်း သွေးချောင်းစီးကြတော့မယ်” ဟု ပြောသည်။
စစ်တွေမြို့ခံသတင်းရင်းမြစ်၏ ပြောဆိုချက်အရ စစ်တွေမြို့ရှိ ALP မှာ တပ်အင်အား ၅၀၀ ထက်မနည်းရှိကြောင်းနှင့် စစ်ကောင်စီကလည်း မွတ်ဆလင်များကို ငွေကြေး/စားနပ်ရိက္ခာများဖြင့် စည်းရုံးကာ လူပေါင်း ထောင်ချီ စုစည်းထားကြောင်း သိရသည်။
အာရက္ခတပ်တော် AA ၏ ထိပ်ပိုင်းခေါင်းဆောင်နှင့် နီးစပ်သူအချို့ထံမှ Western News သတင်းတစ်ခုလက်ခံရရှိထားသည်မှာ ဒေါ်စောမြရာဇာလင်း ဦးဆောင်သော ရခိုင်ပြည်လွတ်မြောက်ရေးပါတီ ALP ကို လက်နက်ချအညံ့ခံရန် သို့မဟုတ် ပူးပေါင်းရန် ကြိုတင်အသိပေးမည်ဖြစ်ကြောင်းနှင့် အကယ်၍ လက်ခံမှုမရှိပါက AA သည် ALP ကို အပြတ်ရှင်းလင်းမည်ဟု သတင်းရရှိထားသည်။
အာဏာသိမ်း စစ်ကောင်စီသည် စစ်တွေမြို့ မကျဆုံးစေရေး အာရက္ခတပ်တော် AA ၏ ထိုးစစ်အန္တရာယ်ကနေ ကာကွယ်နိုင်ရန် မြို့အဝင်တံတား မင်းချောင်းတံတားကို မိုင်းခွဲဖျက်ဆီးထားသလို ကမ်းနားလမ်း၊ ရှုခင်းသာလမ်းတစ်လျှောက် သံဆူးကြိုးများဖြင့် ကာရံထားကြောင်း သိရသည်။
