အာရက္ခတပ်တော် AA က သိမ်းပိုက်ထားသော မြို့နယ်များတွင် စစ်ကောင်စီခန့်ထားခဲ့သည့် ရပ်/ကျေးအုပ်ချုပ်ရေးမှူးများကို အပြောင်းအလဲလုပ်နေကြောင်း ဒေသခံသတင်းရင်းမြစ်များထံမှ သိရသည်။

အထူးသဖြင့် ရခိုင်ပြည် မြောက်ပိုင်းဘက်က ထိန်းချုပ်နယ်မြေများတွင် ပြုလုပ်နေပြီး ပြီးခဲ့သည့် ရက်ပိုင်းအတွင်း လေကြောင်းတိုက်ခိုက်မှု ဆက်တိုက်ခံရပြီးနောက်ပိုင်း ပြုလုပ်လာခြင်းဖြစ်သည်။

“မြေပုံ၊ မင်းပြား၊ မြောက်ဦး၊ ကျောက်တော်၊ ပေါက်တော၊ ပုဏ္ဏားကျွန်းနဲ့ ရသေ့တောင်၊ ဘူးသီးတောင်ဒေသတွေမှာ အဓိက ရပ်/ကျေးအုပ်ချုပ်ရေးမှူးတွေကို အပြောင်းအလဲလုပ်နေတယ်လို့ သိရပါတယ်။ ဘာကြောင့်ဆိုတာမျိုးတော့ မသိဘူး။ ပြီးခဲ့တဲ့ ရက်ပိုင်း ဗုံးဆက်တိုက်ကြဲခံရတာနဲ့ ပတ်သက်မယ်ထင်တာပဲ” ဟု မြောက်ဦးသတင်းရင်းမြစ်တစ်ဦးက ပြောသည်။

AA သည် ရခိုင်ပြည်အတွင်း အုပ်ချုပ်ရေးယန္တရားများကို စတင်ကတည်းက ရပ်ကွက်နှင့် ကျေးရွာများတွင် စစ်ကောင်စီခန့်ထားသော အုပ်ချုပ်ရေးမှူးများနှင့်အပြိုင် ၎င်း၏ ယုံကြည်ရသော အုပ်ချုပ်မှူးများကို ခန့်ထားခဲ့သည်။

“တချို့ရွာတွေ၊ ရပ်ကွက်တွေမှာ စစ်ကောင်စီနဲ့ အပြိုင် အုပ်ချုပ်မှူးရေးမှူးတွေကို ခန့်ထားတယ်။ အုပ်ချုပ်ရေးမှူး နှစ်ယောက်ဖြစ်သွားတာပေါ့။ တချို့ ရပ်ကွက်တွေ၊ ကျေးရွာတွေမှာလည်း စစ်ကောင်စီခန့်ထားတဲ့ အုပ်ချုပ်ရေးမှူးတွေက ယုံကြည်ရတယ်ဆိုရင် သူ့ကိုပဲ ဆက်လက် AA ရဲ့ အုပ်ချုပ်မှူးအဖြစ် ခန့်ထားတယ်။ အဲဒီအုပ်ချုပ်ရေးမှူးကတော့ စစ်ကောင်စီအတွက်လည်း အလုပ်လုပ်ရသလို AA အတွက်လည်း အလုပ်လုပ်ရတယ်” ဟု မင်းပြားဒေသခံတစ်ဦးက ပြောသည်။

AA က ယခု အပြောင်းအလဲလုပ်ရာတွင် စစ်ကောင်စီ ခန့်ထားသော အုပ်ချုပ်ရေးမှူးများလည်း ပါဝင်သလို ၎င်းတို့ကိုယ်တိုင် ခန့်ထားသော အုပ်ချုပ်ရေးမှူးများကိုလည်း အပြောင်းအလဲ လုပ်နေခြင်းဖြစ်ကြောင်း ပေါက်တောဒေသခံတစ်ဦးက ပြောသည်။

“တပ်တော်က ရပ်/ကျေးအုပ်ချုပ်ရေးမှူးတွေကို အပြောင်းအလဲ လုပ်နေတာက ကြာပါပြီ။ ပုံမှန် လုပ်နေကြ အလုပ်လို့ပဲ ပြောလို့ရပါတယ်။ တချို့အုပ်ချုပ်ရေးမှူးတွေက အသက်ကြီးပြီ။ ငယ်တဲ့သူကို ခန့်တာမျိုးရှိတယ်။ တချို့ကျတော့လည်း စီမံခန့်ခွဲရေးညံ့လို့ တော်တဲ့သူကို ပြောင်းခန့်တာမျိုးလည်းရှိပါတယ်” ဟု ၎င်းက ပြောသည်။

၂၀၂၄ ခုနှစ် ဒီဇင်ဘာလ ၃၀ ရက်နေ့မှ ယခု ၂၀၂၅ ဇန်နဝါရီလ ဒုတိယအပတ်အတွင်း အာဏာသိမ်း စစ်ကောင်စီသည် ပုဏ္ဏားကျွန်း၊ မြေပုံ၊ ရမ်းဗြဲ၊ ကျောက်တော်နှင့် ပေါက်တောမြို့တို့က အရပ်သားများရှိရာ နေရာများကို ဗုံးအလုံးရေ ၂၀ လုံး ထက်မနည်း ကြဲချတိုက်ခိုက်ခဲ့သည်။

ထိုဗုံးကြဲတိုက်ခိုက်မှုများကြောင့် အပြစ်မဲ့အရပ်သားပြည်သူ ၆၀ နီးပါး သေဆုံးခဲ့သလို ၆၀ နီးပါး ဒဏ်ရာ ပြင်းထန်စွာ ရရှိခဲ့ကြပြီး လူနေအိမ်နှင့် အဆောက်အဦးအများအပြားလည်း ပျက်စီးဆုံးရှုံးခဲ့သည်။

အဆိုပါ ဗုံးကြဲတိုက်ခိုက်ခံရမှုများသည် သတင်းပေါက်ကြားမှု သို့မဟုတ် သတင်းပေးများရှိနေခြင်းတို့ကြောင့် ဖြစ်သည်ဟု ပြည်သူအချို့က သံသယရှိနေကြပြီး ထိုကြောင့်လည်း AA က ရပ်/ကျေးအုပ်ချုပ်ရေးမှူးများကို အပြောင်းအလဲ လုပ်နေရသည်ဟု သုံးသပ်သူအချို့က ပြောဆိုနေကြသည်။