ပြည်နယ်အတွင်းမှာ ရှိကြသည့် တိုင်းရင်းသားလက်နက်ကိုင် အဖွဲ့အစည်းများသည် ကိုယ့်ဒေသကိုယ် ဖျက်ဆီးသည့် လုပ်ရပ်ကို လုပ်နေကြသည်ဟု အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြောသည်။
ယမန်နေ့ ဇန်နဝါရီလ ၁၅ ရက်တွင် ကျရောက်သည့် ၇၃ နှစ်မြောက် ကရင်နီ (ကယား) ပြည်နယ်နေ့ အခမ်းအနားသို့ ပေးပို့သည့် သဝဏ်လွှာတွင် မင်းအောင်လှိုင်က ယင်းကဲ့သို့ ပြောဆိုခဲ့ခြင်းဖြစ်သည်။
“ကယားပြည်နယ်မှာ မကြာမီကာလက KNDF အဖွဲ့နဲ့ PDF အမည်ခံ သမားတွေရဲ့ အကြမ်းဖက်တိုက်ခိုက်မှုတွေကြောင့် လွိုင်ကော်မြို့ အပါအဝင် မြို့ရွာတွေ ထိခိုက်ပျက်စီးခဲ့ရပါတယ်။ ပြည်နယ်အတွင်း နေထိုင်တဲ့ လက်နက်ကိုင် သောင်းကျန်းသူတွေဟာ ကိုယ့်ဒေသကိုယ်ဖျက်ဆီးတဲ့ လုပ်ရပ်ဖြစ်ပါတယ်” ဟု ပြောဆိုထားသည်။
ဒေသတစ်ခုဖွံ့ဖြိုးတိုးတက်ရေး တည်ငြိမ်အေးချမ်းရေးအတွက် ၎င်းဒေသတွင် နေထိုင်သူများကပင် လုပ်ဆောင်ကြရမည်ဖြစ်ပြီး ဒေသ၏ဖွံ့ဖြိုးတိုးတက်မှု ပျက်စီးစေရန်နှင့် တည်ငြိမ်အေးချမ်းမှု ပျက်ပြားစေရန် လုပ်ဆောင်မှုများကို ထိန်းသိမ်းကာကွယ် စောင့်ရှောက်ရန်မှာလည်း ဒေသခံများပင်ဖြစ်ကြောင်း မင်းအောင်လှိုင်က ဆိုသည်။
သို့သော်လည်း နိုင်ငံ ယခုကဲ့သို့ ယိုယွင်းပျက်စီးနေခြင်းနှင့် နိုင်ငံတစ်ဝှမ်း အကြမ်းဖက်မှုများ၊ ဗုံးကြဲတိုက်ခိုက်မှုများသည် အာဏာသိမ်း စစ်ကောင်စီ မြန်မာစစ်တပ်အုပ်စုက လုပ်ဆောင်နေခြင်းသာ ဖြစ်ကြောင်း တော်လှန်ရေးလက်နက်ကိုင်အဖွဲ့အစည်းများနှင့် ဒီမိုကရေစီ အင်အားစုများက ရှုမြင်ထားကြသည်။
လက်ရှိ မြန်မာစစ်တပ်ကို ဖျက်သိမ်းပြီး ပြည်သူများနှင့် တော်လှန်ရေးတပ်ဖွဲ့များ လိုလားသော စစ်မှန်သော ဖက်ဒရယ်ဒီမိုကရေစီ ပြည်ထောင်စု တည်ဆောက်ခြင်း သို့မဟုတ် တိုင်းပြည်အား ပုံအသစ်တစ်ခုဖြင့် ပြန်လည်ဖွဲ့စည်း တည်ဆောက်ရေးကို လိုလားနေကြခြင်းဖြစ်သည်။
