မြန်မာစစ်တပ်က အာဏာသိမ်းသည့် ၂၀၂၁ မှ ၂၀၂၄ ခုနှစ်အတွင်း စစ်ကောင်စီ၏ အခြေစိုက်ပေါင်း ၁၇၄ ထက်မနည်းကို တော်လှန်ရေးအင်အားစုများက သိမ်းပိုက်ထားသည်ဟု ISP Myanmar ၏ အစီရင်ခံစာအရ သိရသည်။
ဇန်နဝါရီလ ၁၇ ရက်နေ့တွင် ထုတ်ပြန်သော Institute for Strategy and Policy- Myanmar (ISP Myanmar) ၏ အစီရင်ခံစာတွင် ယင်းသို့ ဖော်ပြထားသည်။
တိုင်းစစ်ဌာနချုပ် နှစ်ခု အပါအဝင် အခြေစိုက်စခန်း ၁၄၁ ခုထက်မနည်းမှာ ရခိုင်ပြည်နှင့် ရှမ်းပြည်နယ်ထဲကဖြစ်ကြောင်း ပြောဆိုထားသည်။
စစ်ကောင်စီ၏ အမိန့်ပေးကွက်ကဲမှုဌာနချုပ်ပေါင်း ၁၂ ခုထက်မနည်း တိုက်ခိုက်သိမ်းပိုက်ခံထားရပြီး ရှမ်းပြည်နယ်တွင် အရှေ့မြောက်တိုင်းစစ်ဌာနချုပ် အပါအဝင် အမိန့်ပေးကွက်ကဲမှုဌာနချုပ်ပေါင်း ၅ ခုထက်မနည်း သိမ်းပိုက်ခံထားရသည်။
ရခိုင်ပြည်တွင် အနောက်ပိုင်းတိုင်းစစ်ဌာနချုပ် အပါအဝင် အမိန့်ပေးကွက်ကဲမှုဌာနချုပ်ပေါင်း ၇ ခုထက်မနည်း သိမ်းပိုက်ခံထားရသည်။
စစ်ကောင်စီ၏ ခြေမြန်တပ်ရင်းပေါင်း ၅၄ ခုထက်မနည်း သိမ်းပိုက်ခံထားရပြီး အဆိုပါ ပမာဏ၏ ၆၄ ရာခိုင်နှုန်းသည် ရခိုင်ပြည်ကဖြစ်ကြောင်း ISP Myanmar က ဆိုသည်။
စစ်ကောင်စီ လက်အောက်ခံ နယ်ခြားစောင့်တပ်ဖွဲ့များ၏ အခြေစိုက်စခန်း ၈ ခုထက်မနည်း တိုက်ခိုက်သိမ်းပိုက်ခံထားရပြီး ကချင်ပြည်နယ်တွင် နယ်ခြားစောင့်တပ် ၃ ခုထက်မနည်း သိမ်းပိုက်ခံထားရကာ အများဆုံးဖြစ်သည်။
စစ်ကောင်စီ လက်ရုံးတပ်ရင်းများ၏ အခြေစိုက်စခန်းပေါင်း ၃၉ ခုထက်မနည်း သိမ်းပိုက်ခံထားရပြီး အဆိုပါ ပမာဏ၏ ၅၄ ရာခိုင်နှုန်းနီးပါးသည် ရှမ်းပြည်နယ်အတွင်းမှ ဖြစ်ကြောင်း ISP Myanmar က ထုတ်ပြန်ထားသည်။
စစ်ကောင်စီ၏ လက်ရုံးအကူတပ်ရင်းပေါင်း ၂၄ ခုထက်မနည်းမှာလည်း တိုက်ခိုက်သိမ်းပိုက်ခံထားရပြီး အဆိုပါ ပမာဏ၏ ၈၈ ရာခိုင်နှုန်းနီးပါးသည် ရှမ်းပြည်နယ်က ဖြစ်ကြောင်း သိရသည်။
စစ်ကောင်စီ၏ ခြေလျင်တပ်ရင်းပေါင်း ၃၇ ခုထက်မနည်း တော်လှန်ရေးတပ်ဖွဲ့များထံ တိုက်ခိုက်သိမ်းပိုက်ခံထားရပြီး အဆိုပါ ပမာဏ၏ ထက်ဝက်ကျော်သည် ရှမ်းပြည်နယ်က ဖြစ်ကြောင်း သိရသည်။
အာဏာသိမ်း စစ်ကောင်စီမှာ ရခိုင်ပြည်အတွင်း မဟာဗျူဟာကျ တရုတ်စီမံကိန်း ၁၁ ခုရှိပြီး အားလုံးကို အာရက္ခတပ်တော် AA က သိမ်းပိုက်လိုက်ပြီဟု ISP Myanmar ၏ အစီရင်ခံစာအရ သိရသည်။
ထိုအထဲတွင် သံတွဲ၊ ဂွ၊ အမ်းက လေအားလျှပ်စစ်စီမံကိန်းများလည်းပါဝင်ကြောင်း သိရသည်။
မြန်မာစစ်တပ်မှာ နိုင်ငံအနှံ့ တော်လှန်ရေးတပ်ဖွဲ့များ၏ ထိုးစစ်များကို ခုခံနေရပြီး လက်ရှိတွင် မကွေး၊ ပဲခူးနှင့် ဧရာဝတီက အာရက္ခတပ်တော်နှင့် ပူးပေါင်းတပ်ဖွဲ့များ၏ ထိုးစစ်များကို ကြည်း၊ ရေ၊ လေ သုံးခုစလုံးဖြင့် အပြင်းအထန် ခုခံကာကွယ်နေရသည်။
ယင်းကဲ့သို့ အပြင်းအထန် ခုခံသော်လည်း တန်ပြန်ခုခံစစ်ကို မယှဉ်နိုင်သောကြောင့် စစ်ကောင်စီတပ်ဖွဲ့ဝင်များမှာ ပြန်လည်ဆုတ်ခွာသွားရသည်ဟု AA က ထုတ်ပြန်ပြောဆိုထားသည်။
