မကွေးတိုင်းဒေသကြီး၊ မင်းဘူးခရိုင် ပွင့်ဖြူမြို့နယ် မဲဇလီ ရဲစခန်းကို AA နှင့် PDF၊ CDF – ASHO တို့က ဝင်ရောက် တိုက်ခိုက်ခဲ့ပြီးနောက် စစ်ကောင်စီ တပ်ဖွဲ့များ ဒဏ်ရာများဖြင့် ဆုတ်ခွာသွားကြောင်း စစ်ရေး သတင်းရင်းမြစ်များက ပြောသည်။

ဖေဖော်ဝါရီ ၁ရက်နေ့ နေလယ် ၁နာရီကျော်က မုံရွာလမ်းမကြီး မဲဇလီ ရဲစခန်းကို အာရက္ခတပ်တော် AA နှင့် ပြည်သူ့ ကာကွယ်ရေးတပ် PDF၊ ကာကွယ်ရေးတပ် – အရှို တို့ပူပေါင်းအဖွဲ့ တို့က ဝင်ရောက် ထိုးစစ်ဆင် တိုက်ခိုက်ခဲ့ခြင်း ဖြစ်သည်။

စစ်ရေး သတင်းရင်းမြစ်တစ်ဦးက “AA ပူးပေါင်းတပ်ဖွဲ့တွေက မဲဇလီ ရဲစခန်းကိုဝင်တိုက်တာဗျ၊ တိုက်ပွဲက အရမ်းပြင်းတယ်။ စစ်တပ်က သေဆုံးမူကို မသိဘူး။ ဒဏ်ရာများနဲ့ ဆုတ်ခွာသွားပါတယ်။ အင်အား ၄၀၀ လောက်ရှိတယ်။ ပွင့်ဖြူ ဝါတပ် အခု ကပစ လို့ ခေါ်နေတာပေါ့နော်။ စခန်းထားခဲ့ပြီး ဆုတ်ခွာသွားတာပါ” ဟုပြောသည်။

အဆိုပါ တိုက်ပွဲတွင် ပျူစောထီများ၊ ဦးဝါသဝ ဦးဆောင်သော ပြည်သူစစ်၊ ကျောင်းကုန်ကြီး ပြည်သူစစ်တို့များ ပါဝင်ပြီး စစ်ကောင်စီတပ်ဖွဲ့ဝင် အကျအရှုံးများ ဒဏ်ရာများဖြင့် ဆုတ်ခွာကြောင်း စစ်ရေးသတင်းရင်းမြစ်က ပြောသည်။

နှစ်ဖက်တိုက်ပွဲကြောင့် လက်နက်ကြီး ထိမှန်ပြီး မဒဲကျေးရွာသား ၆ဦးသေဆုံးသွားကာ ကနီ၊ ထူးပေါက်၊ မဲဇလီ ကျေးရွာဒေသခံများသည်လည်း ဘေးလွက်ရာကို ထွက်ပြေး တိမ်းရှောင်နေရကြောင်း ဒေသခံတစ်ဦးက ပြောသည်။

မဲဇလီကျေးရွာအနီးအနားက ရွာများကို စစ်ကောင်စီက လေကြောင်း တိုက်ခိုက်များ ပြုလုပ်ခဲ့ပြီး ယင်းကဲ့သို့ ပြုလုပ်မှုကြောင့် ကျေးရွာ ၁၀ ကျော်မထက် မနည်း မီးလောင်ခဲ့ကာ ဒေသခံများမှာလည်း ထောင်ချီ ထွက်ပြေးနေရကြောင်း သိရသည်။

ဒေသခံတစ်ဦးက “စစ်တပ်ဖက်က လေကြောင်းကနေ လာပြီးတော့ ဗုံးကြဲပါတယ်။ ကျနော်တို့ သိသလောက်တော့ ကျေးရွာ ၁၃ ရွာထက်မနည်း မီးလောင်တယ်ဗျ။ ပြီးတော့ လူတွေ တော်တော်ထိခိုက် ဒဏ်ရာ ရတယ်လို့ ကြားတယ်။ လူပေါင်း ထောင်ချီထွက်ပြေးနေရတယ်”ဟုပြောသည်။

ရိုးမတောင်ခြေ ရွာများလည်း အာရက္ခတပ်တော် AA ပူးပေါင်းတပ်ဖွဲ့များနှင့် ကျောက်ပုံ၊ ခဲပြစ် ကျေးရွာအနီးအနားတွင် စစ်ကောင်စီတို့ တိုက်ပွဲများ ပြင်းထန် ဖြစ်ပွားနေပြီး စစ်တပ်က လေကြောင်း တိုက်ခိုက်မှု ပြုလုပ်ခဲ့ကြောင်း သိရသည်။

မကြာသေးခင်ကလည်း စစ်ကောင်စီ၏ စခန်းတစ်ခုဖြစ်သော ရခိုင်ရိုးမတောင်းတန်းအထက်ရှိ မိုးထိတောင် စခန်းနှင့် ဧရာဝတီတိုင်းအတွင်းရှိ ပွိုင့် ၂၆၃ စခန်းနှင့် ပွိုင့် ၃၆၉ စခန်းတို့ကို အာရက္ခတပ်တော် ပူးပေါင်းတပ်ဖွဲ့တို့က သိမ်းပိုက်ရရှိခဲ့သည်။