ရခိုင်ပြည် ဂွမြို့နယ် တိုင်ကျိုးကျေးရွာတွင် ယမန်နေ့ ဖေဖော်ဝါရီလ ၃ ရက် နေ့လယ်ပိုင်းက စစ်ကျန်လက်နက်ပစ္စည်း ဗုံးသီးပေါက်ကွဲ၍ ကလေးအပါအဝင် အရပ်သား ၃ ဦးသေဆုံးကာ ဒဏ်ရာရရှိသူ ၂ ဦးရှိကြောင်း သိရသည်။

သေဆုံးသူမှာ အသက် ၅ နှစ်အရွယ် ကလေးငယ် ကျား တစ်ဦးနှင့် မ တစ်ဦး၊ လူကြီးပိုင်း တစ်ဦးတို့မှာ သေဆုံးသွားပြီး ကောင်းမွန်စွာ သင်္ဂြိုလ်ပေးလိုက်ပြီဟု ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့က ထုတ်ပြန်ထားသည်။

ဒဏ်ရာ ရရှိသူနှစ်ဦးကို ဆေးကုသမှု ခံယူနိုင်ရန် ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့ တာဝန်ခံများမှ ပို့ဆောင်ကူညီခဲ့သည်ဟု ဆိုသည်။

ပြန်ကြားရေးတာဝန်ခံ ကိုနိုင်အောင်လင်းက “ကလေးငယ်တစ်ဦးကတော့ အခင်းဖြစ်စဉ်မှာပဲ ပွဲချင်းပြီး ဆုံးသွားပါတယ်။ ဗိုက်ပွင့်ပြီးတော့။ ၅ နှစ်အောက် ကလေးငယ်တစ်ဦးပါ။ ကျန်တဲ့ ထိခိုက်ဒဏ်ရာရတဲ့ ကလေးနှစ်ယောက်နဲ့ လူကြီးနှစ်ယောက်ကို ကျနော်တို့ လူနာတင်ကားနဲ့ ဆေးရုံကိုပို့ဖို့ ခေါ်လာတဲ့အခါမှာ လမ်းမှာတင် နှစ်ယောက်ဆုံးသွားပါတယ်။ ကျန်တဲ့နှစ်ယောက်ကတော့ ဆေးရုံမှာ ဆေးကုသမှု လက်ရှိကတော့ ခံယူလို့ရှိပါတယ်” ဟု ပြောသည်။

ပေါက်ကွဲမှုဖြစ်စဉ်အား ကိုနိုင်အောင်လင်းက ဆက်လက်ပြောသည်။

ထိခိုက်သေဆုံး သူများအတွက် အသုံးစရိတ်များကို လတ်တလောတွင် ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့၏ ဘဏ္ဍာငွေများမှ ကျခံသုံးစွဲထားပြီး ထိခိုက်ဒဏ်ရာရသူများ ဆေးကုသမှု့ခံယူရန်နှင့် သေဆုံးသူ၏ ကျန်ရစ်သူမိသားဝင်စုများအား ဆက်လက်ထောက်ပံ့ကူညီပေးသွားမည်ဟု ကိုနိုင်အောင်လင်းက ဆိုသည်။

ဂွမြို့နယ် စစ်ပွဲကာလအတွင်း စစ်ကျန်လက်နက်ပစ္စည်းကြောင့် ထိခိုက်သေဆုံးသူ ၅ နှစ်အောက် ကလေးသူငယ် ၃ ဦး၊ လူကြီး ၁ ဦး စုစုပေါင်း ၄ ဦးနှင့် ထိခိုက်ဒဏ်ရာရရှိသူ ၃ ဦးအထိ ရှိလာပြီဖြစ်သည်ဟု ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့က ထုတ်ပြန်ထားသည်။

ယခုဖော်‌ပြထားသော ထိခိုက်သေဆုံးသူ ကိန်းဂဏန်းများသည် ဂွမြို့နယ်စစ်ဘေးရှောင်ကူညီပူးပေါင်းအဖွဲ့မှ ကောက်ယူထားသော စစ်တမ်းကိန်းဂဏန်းများဖြစ်ပြီး မြေပြင်နှင့်ကွဲလွဲမှုရှိနိုင်သည်ဟုလည်း ဆိုသည်။

ဂွမြို့နယ်စစ်ဘေးရှောင် ကူညီရေးပူးပေါင်းအဖွဲ့မှ ဂွမြို့နယ်စစ်ပွဲကာလအတွင်း ထိခိုက်ဒဏ်ရာရရှိသူများ ဆေးကုသမှု ခံယူနိုင်ရန်နှင့် သေဆုံးသူများ၏ မိသားစုဝင်များအား ထောက်ပံ့ကူညီမှုများ ပေးအပ်လျှက်ရှိကြောင်းဆိုသည်။

ဆက်လက်ပြီး စစ်ကျန်လက်နက်ပစ္စည်းများ၏ ဆောင်ရန်ရှောင်ရန်နှင့် သိ‌ထိုက်သောအကြောင်းအရာများကို တာဝန်ရှိသူများနှင့်ပူးပေါင်း၍ အသိပညာ‌ပေးဟောပြောမှုများ‌ ဆောင်ရွက်လျှက်ရှိကြောင်းလည်း သိရသည်။