ရန်ကုန်တိုင်း ဒေသကြီးတွင် ပြီးခဲ့သည့် ဇန်နဝါရီလအတွင်း စစ်မှုထမ်းရန်အတွက် စစ်ကောင်စီက လူငယ် ၅၀၀ နီးပါး အဖမ်းခံရသည့် အထဲတွင် ရခိုင်လူငယ်အများအပြားလည်း ပါဝင်ခဲ့ကြောင်း Western News က စုံစမ်းသိရှိရသည်။
ဇန်နဝါရီလအတွင်း ဖမ်းဆီးခံလိုက်ရသူ ရန်ကုန်တွင် စုစုပေါင်း ၄၇၅ ဦး ရှိခဲ့ပြီး ယင်းတို့ အနက် ၅၈ ဦး ပြန်လွတ်လာခဲ့ကာ ၁၇ ဦးကိုမူ ပြန်မလွှတ်ပေးသေးဟု အတည်ပြု သိရှိရကြောင်း Rangoon Scout Network က ဖေဖော်ဝါရီလ ၄ ရက်နေ့က ထုတ်ပြန်သည်။
“လမ်းမပေါ် တွေ့ရာ လိုက်ဆွဲလို့ ပါသွားသူ ဦးရေမှာ ၂၄၁ ဦး ရှိပြီး ၎င်းတို့အနက် ၃ ဦးမှာ ရုန်းကန် ထွက်ပြေးလာနိုင်ခဲ့သည်။ ဧည့်စာရင်းစစ်ပြီး ဖမ်းခေါ်ခံရသူ ၇၇ ဦး၊ လမ်းမပေါ် သွားလာနေစဉ် စစ်ဆေးခံရပြီး ဖမ်းခံရသူ ၅၈ ဦး၊ သတင်းအတိအကျဖြင့် ရှာဖွေဖမ်းဆီးခံရသူ ၅၁ ဦးနှင့် စစ်မှုထမ်းစာရင်းပါ၍ ဖမ်းခေါ်ခံရသူ ၄၈ ဦး ရှိကြောင်း” ဟုပြောသည်။
ဖမ်းဆီးခံရသည့်ထဲတွင် ရန်ကုန်တိုင်းထဲက တာမွေ၊ သာကေတ၊ အင်းစိန်၊ သင်္ဃန်းကျွန်း၊ မြောက်ဒဂုံ၊ အလုံနဲ့ အင်းစိန်၊ မြောက်ဥက္ကလာ၊ လှိုင်သာယာ၊ ရွှေပြည်သာ မြို့နယ်များက အများဆုံး ဖမ်းဆီးခံခဲ့ရကြောင်း Rangoon Scout Network က တာဝန်ရှိသူတစ်ဦးက ကပြောသည်။
ထို့အပြင် တော်လှန်ရေး ရဲဘော်များဟု အမည်တပ်ခံရကာ လိုက်လံဖမ်းဆီးခံရသူ ၁၇ ဦး ရှိခဲ့ပြီး အွန်လိုင်းပေါ်တွင် လှုံ့ဆော်စာများ ရေးသားသူဟု ကြေညာခံရကာ ဖမ်းဆီးခံရသူ ၁ ဦးနှင့် YBS ကားပေါ် တက်၍ ဖမ်းဆီးသည့် ဖြစ်စဉ် ၂ ခု ရှိခဲ့ပြီး အမျိုးသား ၂၄ ဦး အဖမ်းဆီးခံရသည်။
ပြီးခဲ့သည့် ဇန်နဝါရီ တစ်လအတွင်း ရန်ကုန်တိုင်းအတွင်း စစ်ကောင်စီတပ်က စစ်မှုထမ်းရန်အတွက် ခေါ်ဆောင်ခြင်းခံရသည့် ရခိုင်လူငယ် ၈၀ နီးပါးခန့် ရှိကြောင်း အမည်မဖော်လိုသည့် ရန်ကုန်ရောက် ရခိုင်အရေး ဆောင်ရွက်နေသူတစ်ဦးက ပြောသည်။
“စာရင်းကတော့ အတိအကျ ပြောဖို့ ခက်ပါတယ်။ မြောက်ဥက္ကလာတို့၊ လှိုင်သာယာ၊ သမိုင်း၊ တာမွေ၊ ရွှေပြည်သာ စတဲ့နေရာတွေမှာ အရမ်း ဖမ်းဆီးခံရပါတယ်။ ပြီးခဲ့တဲ့ တစ်ပတ်လောက်ကလည်း သင်္ကန်းကျွန်းဖက်က လူငယ် ၆ ယောက်လောက် အဖမ်းခံလိုက်ရတယ်။ အခုထိလည်း စုံစမ်းလို့ မရသေးဘူး။ ပြီးခဲ့တဲ့ လက ဆိုရင် ကျနော်တို့ စာရင်းအရ ၈၀ ပတ်ဝန်းကျင်လောက် ရှိမယ်။ တစ်ချို့ ကတော့ ပိုက်ဆံ ပေးပြီးတော့ လွတ်လာတာတွေရှိတယ်”ဟုပြောသည်။
ဇန်နဝါရီလထဲ ရန်ကုန်တိုင်းအတွင်း အဖမ်းအဆီးဖြစ်စဉ်များအနက် ဖြစ်စဉ် ၂၀၀ ရှိခဲ့ပြီး ၎င်းတို့အနက် ဖြစ်စဉ် ၅၃ ခုကို အတည်ပြုနိုင်ရန် စုံစမ်းနေဆဲဖြစ်ကြောင်း အတည်ပြု သိရှိခဲ့ရသည့် ဖြစ်စဉ် ၁၄၇ ခုကိုသာ ယူထားကြောင်း Rangoon Scout Network ဆိုသည်။
မြောက်ဥက္ကလာပမြို့နယ်အတွင်း ကူညီဆောင် ဆောင်ရွက်နေသူတစ်ဦးက “အဓိကတော့ ဧည့်စာရင်းမတိုင်လို့ အဖမ်းခံတာတွေကတော့ များတယ်။ တစ်ချို့ ကတော့ ဘုန်းတော်ကြီးကျောင်းတွေကို ဝင်စစ်တယ်။ ပြီးတော့ တိုင်တဲ့သူတွေရှိပြီးတော့ နေအိမ်တွေ အဆောင်တွေ ဝင်စစ်တာတွေ ရှိတယ်။ အဲ့ဒီမှာ အဖမ်းခံရတွေ အများအပြား ရှိတယ်”ဟုပြောသည်။
စစ်ကောင်စီက မည်သည့်အချိန် လာဖမ်းမှာကို စိုး၍ အိမ်ပြင်တောင်မထွက်ရဲတော့ကြောင်း တာမွေမြို့နယ်တွင် ပန်းထိမ်း လုပ်ငန်း လုပ်ကိုင်နေသည့် အသက် ၂၉နှစ် အရွယ်ရှိ ရခိုင်လူငယ်တစ်ဦးက ပြောသည်။
“အလုပ်သာ လုပ်နေရတာ စိတ်က မချမ်းမြှေးဘူး။ တဒုန့်ဒုန့် ဖြစ်နေတာ။ အလုပ်လုပ်နေရင်းနဲ့ နောက်ကနေ ဘယ်လို အဆွဲခံရမလဲဆိုတာကို တွေးကြောက်နေရတာ။ ညပိုင်းမီးပြတ်ရင် ပိုဆိုးတာပေါ့။ မီးထွန်းပြီးတော့ အလုပ်မလုပ်ရဲဘူးလေ။ မီးလင်းနေရင် လာဖမ်းကိုလည်း ကြောက်နေရတယ်။ အဲ့ဒါတောင် အပြင်ထွက်ပြီးတော့ အလုပ်လုပ်တာမဟုတ်ဘူး။ ကျနော်က အိမ်မှာပဲ အလုပ်လုပ်နေရတာ “ဟုပြောသည်။
ပြီးခဲ့သည့် ၂၀၂၄ ခုနှစ် ဒီဇင်ဘာနှင့် ယခုနှစ် ဇန်နဝါရီလများတွင် ရန်ကုန်တိုင်း မရမ်းကုန်း၊ လှိုင်သာ၊ ရွှေပြည်သာ၊ တောင်ဒဂုံ၊ မြောက်ဒဂုံ၊ မြောက်ဥက္ကလာ စသည့်မြို့နယ်များနှင့် သာကေတမြို့နယ်များက ရခိုင်လူငယ်များ ၅၀ ဦးထက်မနည်းကို စစ်ကောင်စီက ဖမ်းဆီးထားသည်။
၂၀၂၄ ခုနှစ်အတွင်း ရခိုင်အမျိုးသားပါတီ ANP ထဲက လူငယ်ရေးရာ ခေါင်းဆောင် ကိုဂမ္ဘာရီနှင့် ရခိုင်ကျောင်းသား သမဂ္ဂထဲက ခေါင်းဆောင်တစ်ဦးဖြစ်သူ ကိုမြတ်ဟိန်းထွန်းတို့ကို နှစ်ရှည်ထောင်ဒဏ်များ ချမှတ်ထားကြောင်း သိရသည်။
ရခိုင်-မြန်မာ အဆိုတော် မဆုမြတ်ထက်မှာလည်း ပရဟိတလုပ်ရင်း ဖမ်းဆီးခံထားရပြီး စစ်ကောင်စီ တပ်ဖွဲ့ဝင်များက ယခုအချိန်အထိ စစ်ကြောရေးတွင် ထိန်းသိမ်းထားကြောင်း မိသားစုဝင်များနှင့် နီးစပ်သူများထံမှ သိရသည်။
