စစ်စစ်က အာဏာသိမ်းခဲ့သည့် ၄ နှစ်တာကာလအတွင်း စာသင်ကျောင်းနှင့် ဆေးရုံဆေးခန်းများကို စစ်တပ်က တိုက်ခိုက်မှုကြောင့် ကျောင်းသား ကျောင်းသူ၊ ဆရာ ဆရာမ နှင့် CDM ကျန်းမာရေးဝန်ထမ်း ၄၀၀ နီးပါး သေဆုံးခဲ့ကြောင်း သိရသည်။

စစ်အုပ်စုက ရည်ရွယ်ချက် ရှိရှိ ပစ်မှတ်ထား တိုက်ခိုက်ခဲ့သော စာသင်ကျောင်းပေါင်း ၂၄၅ ကျောင်း ထက်မနည်းရှိခဲ့ပြီး ဆေးရုံဆေးခန်း ၃၄၀ ကျော်မှာလည်း ပစ်မှတ်ထား တိုက်ခိုက်ခံခဲ့ရကြောင်း NUG အစိုးရ သမ္မတရုံးပြောရေးဆိုခွင့်ရှိသူ က ပြောသည်။

ပညာရေးနှင့် သက်ဆိုင်သော နေရာများကိုလည်း ရည်ရွယ်ချက် ရှိရှိ တိုက်ခိုက်မှုကြောင့် ကျောင်းသား၊ ကျောင်း သူ၊ ဆရာ၊ ဆရာမ စုစုပေါင်း ၂၅၀ ကျော် သေဆုံးခဲ့ပြီး သေဆုံးသူများထဲတွင် ၁၈ နှစ်အောက် ကလေးငယ် ၈၈ ဦး ပါဝင်ခဲ့သည်။

ထို့ပြင် ဆေးရုံဆေးခန်းများကိုလည်း စစ်တပ်က ရည်ရွယ်ချက်ရှိရှိ တိုက်ခိုက်မှုကြောင့် CDM ကျန်းမာရေးဝန်ထမ်း ၁၃၃ ဦး သေဆုံးခဲ့ပြီး ထိခိုက်ဒဏ်ရာရခဲ့သော ကျန်းမာရေး ဝန်ထမ်း ၁၃၅ ဦးရှိကြောင်း NUG အစိုးရ သမ္မတရုံးပြောရေးဆိုခွင့်ရှိသူ ဦးကျော်ဇော်က ထုတ်ပြန်ပြောဆိုသည်။

NUG အစိုးရ သမ္မတရုံးပြောရေး ဆိုခွင့်ရှိသူ ဦးကျော်ဇော်က ” ၂၄၅ ကျောင်း ထက်မနည်းရှိခဲ့ပြီး ဆေးရုံ ဆေးခန်းတွေကို ပစ်မှတ်ထား တိုက်ခိုက်မှု ၃၄၀ ကျော် ရှိခဲ့ပါတယ်။ ပညာရေးနဲ့ သက်ဆိုင်တဲ့ နေရာတွေကို ရည်ရွယ်ချက်ချက် တိုက်ခိုက်မှုတွေကြောင့် ကျောင်းသားကျောင်းသူ ဆရာ၊ ဆရာမ စုစုပေါင်း ၂၅၀ ကျော် သေဆုံးခဲ့ရပြီး သေဆုံးသူတွေထဲမှာ ၁၈ နှစ်အောက် ကလေးငယ် ၈၈ ဦး ပါဝင်ကြောင်းလည်း သိရှိရပါတယ်။ အကြမ်းဖက် စစ်တပ်ရဲ့ တိုက်ခိုက်မှုကြောင့် ကျန်းမာရေးဝန်ထမ်း CDM ၁၃၃ ဦး သေဆုံးခဲ့ရပြီး ထိခိုက်ဒဏ်ရာရခဲ့သူ ကျန်းမာရေး ဝန်ထမ်း ၁၃၅ ဦးရှိခဲ့ပါတယ်” ဟုပြောဆိုသည်။

အာဏာသိမ်းမှုအလွန် နိုင်ငံတဝန်းရှိ မြို့နယ်ပေါင်း ၁၆၂ ခုထက်မနည်းတွင် စစ်ကောင်စီ၏ လေကြောင်းတိုက်ခိုက်မှု အကြိမ် ၈,၀၀၀ ကျော်ရှိခဲ့သည်ဟု မြန်မာ့မဟာဗျူဟာနှင့် မူဝါဒလေ့လာရေးအင်စတီကျူး ISP-Myanmar မှ ယခုရက်ပိုင်းက ထုတ်ပြန်သည်။

ယင်းအထဲတွင် ရှမ်းပြည်နယ်တွင် လေကြောင်းတိုက်ခိုက်ခံရမှုအများဆုံး ဖြစ်ခဲ့ပြီး အကြိမ် ၁,၇၀၀ ထက်မနည်း ရှိခဲ့ကြောင်း စစ်ကိုင်းတိုင်းမှာ အကြိမ် ၁,၃၀၀ ထက်မနည်း ရှိခဲ့ပြီး ဒုတိယအများဆုံး ဖြစ်ကြောင်း ISP-Myanmar ဆိုသည်။