ရခိုင်ပြည်၊ စစ်တွေမြို့အဝင် ဟိုက်ဝေးလမ်းမပေါ်ရှိ စစ်ကောင်စီ၏ ဂိတ်စခန်းအချို့ကို အာရက္ခတပ်တော် AA က စနိုက်ပါဖြင့် ပစ်ခတ်တိုက်ခိုက်နေကြောင်း စစ်တွေမြို့ခံ စစ်ရေးသတင်းရင်းမြစ်များထံမှ သိရသည်။
အာရက္ခတပ်တော် AA မှ စစ်တွေမြို့အဝင်က စစ်ကောင်စီတပ်ရင်း၊ တပ်စခန်းများအား စနိုက်ပါဖြင့် ပစ်ခတ်တိုက်ခိုက်နေသည်မှာ တစ်လနီးပါး ရှိလာနေပြီဖြစ်ကြောင်း သတင်းရင်းမြစ်က ပြောသည်။
“စစ်တွေမြို့အဝင်မှာရှိတဲ့ စစ်ကောင်စီတပ်ရင်း၊ တပ်စခန်းတွေက ရန်ကုန်-စစ်တွေ ဟိုက်ဝေးလမ်းမပေါ် ဘေးတစ်ဖက်တစ်ချက်စီမှာ ရှိတယ်။ အဓိက ပါဒလိတ်၊ အမြင့်ကျွန်း၊ ရွှေမင်းဂံ စတဲ့ နေရာတွေကို AA က အဓိက တိုက်ခိုက်နေတယ်” ဟု ပြောသည်။
အာရက္ခတပ်တော် AA က စနိုက်ပါပစ်ခတ် တိုက်ခိုက်မှုအပြင် လက်နက်ကြီးများဖြင့်လည်း ကုလားတန်မြစ်ဝရှိ စစ်ကောင်စီ ရေတပ်သင်္ဘော (စစ်သင်္ဘော) များကို ပစ်ခတ်တိုက်ခိုက်မှုရှိကြောင်း ယင်း ပစ်ခတ်မှုကြောင့် ထိခိုက်မှုအခြေအနေအား မသိရပေ။
အာရက္ခတပ်တော် AA သည် စစ်တွေမြို့အား အင်အားအလုံးအရင်းအဖြင့် ထိုးစစ်ဆင်တိုက်ခိုက်ခြင်းမဟုတ်ဘဲ ဖြေးဖြေးရှင်းတိုး၍ တိုက်ခိုက်နေကြောင်း စစ်ရေးသုံးသပ်သူများက ပြောသည်။
စစ်ကောင်စီ တပ်ရင်းများကလည်း အာရက္ခတပ်တော် AA ၏ စနိုက်ပါပစ်ခတ်ခြင်းကို စနိုက်ပါဖြင့် ပြန်လည်ခုခံတိုက်ခိုက်နေကြာင်းနှင့် လက်နက်ကြီးများဖြင့်လည်း ပစ်ခတ်တိုက်ခိုက်နေသည်။
စစ်ရေး သုံးသပ်သူတစ်ဦးက “စစ်ကောင်စီဟာ အဓိက ကုလားတန်မြစ်ဝ၊ ရွှေမင်းဂံရေတပ်စခန်း၊ ရေချမ်းပြင်၊ ပါဒလိတ်၊ အမြင့်ကျွန်း စတဲ့ မြစ်ဝတွေကနေ စစ်တွေမြို့အား ရေကြောင်းကနေ ကာရံထားတယ်။ ဒါ့ကြောင့် AA ဟာ အင်အားလုံး အရင်းနဲ့ ဝင်လာဖို့ မလွယ်ကူတဲ့ သဘောပါ။ အဲဒါ ဖြေးဖြေးရှင်းတိုက်နေတယ်လို့ ယူဆရပါတယ်” ဟု ပြောသည်။
စစ်တွေမြို့ရှိ စစ်ကောင်စီ တပ်ရင်းများမှ ပစ်ခတ်သော လက်နက်ကြီးသည် အာရက္ခတပ်တော် AA ရှိရာသို့ ကျရောက်ခြင်းမဟုတ်ဘဲ အရပ်သားများနေထိုင်ရာ မြို့ရွာများသို့ ကျရောက်ပေါက်ကွဲကာ ဒေသခံပြည်သူများမှာ ထိခိုက်သေဆုံးလျက်ရှိနေကြရသည်။
ယခု ၂၀၂၅ ဇန်နဝါရီလအတွင်း စစ်ကောင်စီ၏ ပစ်ခတ်မှုကြောင့် ပုဏ္ဏားကျွန်း၊ ရသေ့တောင်၊ ပေါက်တောတို့တွင် ၅ ဦးထက်မနည်း သေဆုံးမှုရှိကာ ၁၀ ဦးထက်မနည်း ထိခိုက်ဒဏ်ရာရရှိထားကြသည်။
၂၀၂၄ ခုနှစ်၊ ဒီဇင်ဘာလ ၃၀ ရက်မှ ၂၀၂၅ ဇန်နဝါရီလ ၃၀ ရက်နေ့အထိ အာဏာသိမ်း စစ်ကောင်စီ၏ လေကြောင်းတိုက်ခိုက်မှုများကြောင့် ရခိုင်ပြည်မှာ တစ်လအတွင်း စစ်သုံ့ပန်းများအပါအဝင် အရပ်သား စုစုပေါင်း ၉၂ ဦးအထိ သေဆုံးခဲ့ရပြီး ဒဏ်ရာရရှိသူ ၉၆ ဦးထက်မနည်းရှိကြောင်း Western News ၏ မှတ်တမ်းစုစည်းချက်အရ သိရသည်။
၂၀၂၄ ခုနှစ်၊ ဒီဇင်ဘာလ၂၉ ရက်နေ့တွင် အာရက္ခတပ်တော် AA က စစ်ရေးကို နိုင်ငံရေးနည်းလမ်းဖြင့် ဖြေရှင်းရန် စစ်ကောင်စီအား ငြိမ်းချမ်းရေး ဖိတ်ခေါ်ပြီးနောက် ဒီဇင်ဘာလ ၃၀ ရက်နေ့ကစ၍ ရခိုင်ပြည်မှ မြို့နယ်များမှာ ဗုံးဆက်တိုက်ကြဲခံရပြီး တစ်လအတွင်းမှာ ၁၀၀ နီးပါးအထိကို သေဆုံးခဲ့ရခြင်းဖြစ်သည်။
