ရခိုင်ပြည်၊ ပေါက်တောမြို့နယ်တွင် လူငယ်နှစ်ဦးက ကောက်ရလာသော စစ်လက်ကျန် ဗုံးသီး တစ်လုံးကို စမ်းသပ်ထုခွဲရာမှ ပေါက်ကွဲမှု ဖြစ်၍ လူငယ်နှစ်ဦး သေဆုံးပြီး ၄ ဦးထိခိုက် ဒဏ်ရာ ရရှိသွားကြောင်း ဒေသခံများက ပြောသည်။
ဖေဖော်ဝါရီ ၁၂ ရက်နေ့၊ နေ့လယ်ပိုင်း ၃ နာရီအချိန်ခန့်က ပေါက်တောမြို့နယ်စွန်ရဲရွာ အနီးကနေ ယူဆောင်လာသော စစ်ကျန်ဗုံးသီးတစ်လုံးကို စမ်းသပ်ထုခွဲရာကနေ ပေါက်ကွဲမှုဖြစ်သွားခြင်းကြောင်း ပေါက်တော ဒေသခံတစ်ဦက ပြောသည်။
“မောင်မင်းစိုးက စွန်းရဲရွာအနားက ဗုံးသီးကို ကောက်လာတယ်လို့ပြောတယ်။ အဲ့ဒီမှာ ဂြင်းဒွေရွာရှိ ကန်နှစ်ကန်ကြား ကုက္ကိုလ်ပင်အောက်မာ သူ့သူငယ်ချင်းတွေက ခေါ်ပြီးတော့ စမ်းသပ်ပြီးတော့ ထုကြည့်တယ်လို့ပြောတယ်။ အဲ့ဒီမှာ ပေါက်ကွဲမှုဖြစ်တယ်။ နှစ်ယောက်သေဆုံးသွားပါတယ် “ဟုပြောသည်။
သေဆုံးသူသွားသူမှာ ဂြင်းဒွေရွာက အသက် ၂၀ အရွယ်ရှိ ကိုနေမျိုးဝင်းနှင့် အသက် ၁၈ နှစ်ရွယ်ရှိ ကိုကိုနိုင် ဖြစ်ပြီး ဒဏ်ရာ ရရှိသူများမှာ အသက် ၁၅ နှစ်ရွယ်ရှိ မောင်ငြိမ်းစိုးလင်းနှင့် မောင်ဟိန်းစိုးနိုင် အသက် ၁၇ ရွယ်ရှိ မောင်မင်းစိုးထွန်း အသက် ၂၀ ရွယ်ရှိမမြတ်အေးခိုင် တို့ ဖြစ်ကြပါတယ်။
ထိခိုက်ဒဏ်ရာရှိသူများမှာ စိုးရိမ်သည့် အနေအထားရှိပြီး ဆေးကုသမှု ခံယူထားကြောင်း သိရသည်။
ပြီးခဲ့သည့် ဇန်နဝါရီလ ၂၂ ရက်နေ့က မြောက်ဦးမြို့တွင် တောတောင်သို့ ထင်းခွေသွားသည့် အသက် ၄၀ ကျော် အမျိုးသမီးတစ်ဦး မိုင်းနင်းမိ၍ သေဆုံးမှုရှိခဲ့ကြောင်း သိရသည်။
ဖေဖော်ဝါရီလ ၉ ရက် တောင်ကုတ်မြို့တွင် ချောင်းကမ်းနားက ကောက်ယူလာသော စစ်ကျန်ဗုံးသီးကို ကစားရာမှ ပေါက်ကွဲမှုဖြစ်ပွားပြီး အသက် ၉ နှစ်အရွယ် အပါအဝင် အရပ်သား ၂ ဦး ထိခိုက်ဒဏ်ရာရရှိသွားကြောင်း သိရသည်။
ဂွမြို့နယ် တိုင်ကျိုးကျေးရွာတွင် ဖေဖော်ဝါရီလ ၃ ရက် နေ့လယ်ပိုင်းက စစ်ကျန်လက်နက်ပစ္စည်း ဗုံးသီးပေါက်ကွဲ၍ ကလေးအပါအဝင် အရပ်သား ၃ ဦးသေဆုံးကာ ဒဏ်ရာရရှိသူ ၂ ဦးရှိကြောင်း သိရသည်။
ကုလသမဂ္ဂကလေးများရံပုံငွေအဖွဲက ပြီးခဲ့သည့် ၂၀၂၄ ခုနှစ် ဇန်နဝါရီလကနေ စက်တင်ဘာလ အထိကောက်ယူထားသော စာရင်းအရ မြန်မာနိုင်ငံတွင် မြေမြှုပ်မိုင်းနှင့် ပေါက်ကွဲစေတတ်သော စစ်ကျန် လက်နက်ပစ္စည်းများကြောင့် အရပ်သား သေဆုံးဒဏ်ရာရသူ ၈၈၉ ဦးအထိရှိကြောင်း ဖော်ပြထားသည်။
