ရခိုင်ပြည်၊ သံတွဲခရိုင် ဂွမြို့နယ် ကျိန္တလီမြို့ကို စစ်ကောင်စီ လေကြောင်းက ထပ်မံ ဗုံးကြဲမှုကြောင့် ကလေးငယ်တစ်ဦး အပါအဝင် ၂ ဦးသေဆုံးခဲပြီး ၄ ဦး ထိခိုက် ဒဏ်ရာရရှိခဲ့ကြောင်း ဂွဒေသခံများက Western News ကိုပြောသည်။
ဖေဖော်ဝါရီ ၁၃ ရက်နေ့ နေ့လယ် ၁၂ နာရီကျော် လောက်က ကျိန္တလီမြို့ အမှတ် (၃) သဖန်းကွင်း ကို စစ်ကောင်စီ လေကြောင်းကနေ လာရောက်ဗုံးကြဲခဲ့ခြင်း ဖြစ်ကြောင်း ဂွဒေသခံ တစ်ဦးက ပြောသည်။
“အမျိုးသမီးတစ်ယောက်ရယ်၊ နောက်ပြီး ကလေးတစ်ယောက် သေဆုံးပါတယ်။ လာပစ်တာက နေ့လယ် ၁၂ နာရီကျော်လောက်မှာ လာကြဲတာပါ။ ကျိန္တလီမြို့ အမှတ် (၃) သဖန်းကွင်း ကို ကျပါတယ်။ ထိခိုက်ဒဏ်ရာ ရသူတွေ ၄ ယောက်ထက် မနည်းဘူး “ဟုပြောသည်။
သေဆုံးသွားသူများမှာ ကျိန္တလီမြို့၊ အမှတ် (၃) သဖန်းကွင်းရပ်ကွက်က အသက် ၃နှစ်အရွယ် မောင်ဖြူလေး၊ အသက် ၄၀ အရွယ်ရှိ ဒေါ်လှအေး ဖြစ်ကြပြီး အသက် ၅၃ နှစ် အရွယ်ရှိ ဦးတင်သိန်း၊ အသက် ၃၇ နှစ် ဦးမြင့်နိုင်၊ အသက် ၃၅ နှစ်ရွယ် ဦးလှတင်နှင့် အသက် ၄၅ နှစ်ရွယ်ရှိ ဒေါ်ညွှန့်ညွှန့်စန်း တို့ ဖြစ်ကြသည်။
ဂွမြို့ခံ တစ်ဦးက “ဒီကနေ့ ဆိုရင် အဲဒီရပ်ကွက်ကို ဗုံးသုံးလုံးကြဲတာဗျ။ အမှတ် ၂ရပ်ကွက်ကို မနေ့ကလည်း တစ်ခေါက် လာကြဲတယ်။ အဲ့ဒီမှာလည်း တစ်ယောက် ထိခိုက်ဒဏ်ရာရတယ်။ နေအိမ်တစ်ချို့ ပျက်စီးသွားတယ်။ အခုလူတွေက အကုန်ပြေးနေကြပြီ”ဟုပြောသည်။
ဖေဖော်ဝါရီ ၁၂ ရက်နေ့ ပြည်ထောင်စုနေ့မှာလည်း သံတွဲခရိုင်၊ ဂွမြို့နယ် ကျိန္တလီမြို့၊ အမှတ် (၂) ရပ်ကွက်ကို စစ်ကောင်စီက လေယာဉ် ဗုံး ၂လုံး လာရောက်ကြဲချမှုကြောင့် အရပ်သားတစ်ဦး ထိခိုက်မှုရှိခဲ့ပြီး နေအိမ် အချို့ ပျက်စီးခဲ့ပါတယ်။
ရခိုင်တွင် စစ်ရှုံးနေသော စစ်ကောင်စီသည် အရပ်သားများ နေထိုင်သည့် ကျေးရွာ၊ မြို့များကို အငြိုးအတေးထားပြီး လက်နက်ကြီးများဖြင့် လေကြောင်းက ပစ်ခတ်မှုကြောင့် ၂လအတွင်းမှာ အရပ်သား ရာနှင့်ချီ သေဆုံးခဲ့သည်။
