အာရက္ခတပ်တော် AA နှင့် ဒေသခံပြည်သူ့ကာကွယ်ရေးတပ်ဖွဲ့ ပူးပေါင်းတပ်ဖွဲ့တို့သည် ဧရာဝတီတိုင်းထဲက ငါးသိုင်းချောင်းမြို့နယ်ရှိ စစ်ကောင်စီ၏ အမြောက်တပ် ၃၄၄ တပ်ရင်းကို ထိုးစစ်ဆင်တိုက်ခိုက်နေကြောင်း သိရသည်။

အမြောက်တပ် ၃၄၄ နှင့် ငါးသိုင်းချောင်းမြို့တို့သည် ၄ မိုင်ကျော်မှာရှိပြီး မြောက်စမ်းရွာမှာရှိကြောင်းနှင့် တိုက်ပွဲမှာ ယနေ့ ဖေဖော်ဝါရီလ ၁၄ ရက်တွင် ပြင်းထန်နေကြကြောင်း သတင်းရင်းမြစ်များက ပြောသည်။

“ဟုတ်တယ်ဗျ။ ငါးသိုင်းချောင်းက အမြောက်တပ် ၃၄၄ ကို AA ရဲ့ ပူးပေါင်းတပ်ဖွဲ့က ထိုးစစ်ဆင် တိုက်ခိုက်နေပါတယ်။ စစ်ကောင်စီကလည်း ပြန်ခုခံနေပါတယ်။ တိုက်ပွဲကတော့ ပြင်းထန်နေကြပါတယ်။ လက်နက်ကြီး ပစ်ခတ်မှုတွေလည်း ပါတယ်လို့ သိရပါတယ်” ဟု ဧရာဝတီသတင်းရင်းမြစ်တစ်ဦးက ပြောသည်။

အာရက္ခတပ်တော် AA ပူးပေါင်းတပ်ဖွဲ့တို့သည် ရခိုင် ဂွမြို့နှင့်ထိစပ်နေသည့် ဧရာဝတီတိုင်းထဲက မကျီးဇင်နှင့် ဘောမိဒေသတို့ကို သိမ်းပိုက်ထားပြီး လက်ရှိတွင် ငါးသိုင်းချောင်း၊ ရေကြည်နှင့် သာပေါင်းမြို့နယ်ဘက်တွင် ထိုးစစ်ဆင်တိုက်ခိုက်နေခြင်းဖြစ်သည်။

“ဘောမိဘက်တွေမှာ တိုက်ပွဲက လျော့နည်းသွားပါတယ်။ အခု ငါးသိုင်းချောင်းဘက်ကို လှည့်လာပါတယ်။ စစ်ကောင်စီဘက်က အထိအခိုက်များတယ်လို့တော့ သိရပါတယ်” ဟု ၎င်းက ဆိုသည်။

ဒေသခံပြည်သူများမှာ ဘေးလွတ်ရာသို့ တိမ်းရှောင်နေရပြီး တိုက်ပွဲမှာ ဆက်လက်ပြင်းထန်လာနိုင်ကြောင်းလည်း စစ်ရေးသတင်းရင်းမြစ်အချို့က သုံးသပ်နေကြသည်။

AA ၏ ထိုးစစ်မှာ တိုက်ပြီး ပြန်ဆုတ်သွားမည့် ပုံစံမျိုးမဟုတ်ဘဲ အမြောက်တပ် ၃၄၄ ကို သိမ်းပိုက်နိုင်ခြေရှိသည့်အတွက် တိုက်ပွဲမှာ နေ့စဉ် ပြင်းထန်လာနိုင်ကြောင်း သုံးသပ်နေကြခြင်းဖြစ်သည်။

အာရက္ခတပ်တော် AA နှင့် ဒေသခံပြည်သူ့ကာကွယ်ရေးတပ်ဖွဲ့များက အဆိုပါ တိုက်ပွဲနှင့် ပတ်သက်ပြီး စစ်ရေးသတင်းများကို ထုတ်ပြန်ထားခြင်းမရှိသေးပေ။

သို့သော်လည်း ဧရာဝတီက ပြည်သူ့ကာကွယ်ရေးတပ်ဖြစ်သည့် ၂၉ ဗျူဟာ တပ်မှာ ဧရာဝတီတိုင်းအတွင်း စစ်ရေးအရှိန်မြင့်လာကြောင်း ထုတ်ပြန်ပြောဆိုထားသည်။