ကချင်ပြည်နယ်၊ ဗန်းမော်မြို့နယ်၊ စင်းခန်းရွာကို စစ်ကောင်စီတပ်က လေယာဉ်ဖြင့် ဗုံးကြဲမှုကြောင့် အရပ်သားပြည်သူ ၂ ဦး သေဆုံးပြီး ၃ ဦး အပြင်းအထန် ဒဏ်ရာ ရရှိကြောင်း သိရသည်။
ဖေဖော်ဝါရီလ ၁၄ ရက်နေ့ ညနေ ၄ နာရီ ၆ မိနစ်ခန့်တွင် ဗန်းမော်မြို့နယ်၊ စင်းခန်းရွာကို စစ်ကောင်စီတပ်က ဂျက်ဖိုက်တာဖြင့် ပေါင် ၂၀၀ ဗုံးသီး ၃ လုံး ကြဲချ တိုက်ခိုက်ခဲ့ကြောင်း ဒေသခံများက ပြောသည်။
“ဂျက်ဖိုက်တာ ၁ စီးနဲ့ ပေါင် ၂၀၀ ဗုံး ၃ လုံးကြဲချ တိုက်ခိုက်သွားတာ ပြည်သူ အသက် ၄၀ အရွယ် အမျိုးသား ၁ ဦး နဲ့ အသက် ၃၀ အရွယ် အမျိုးသမီး ၁ ဦး သေဆုံးတယ်။ ပြည်သူ ၃ ဦးကတော့ ပြင်းထန် ဒဏ်ရာရရှိတယ်။ အသက် အန္တရာယ် စိုးရိမ်နေရပါတယ်” ဟု ပြောဆိုသည်။
သေဆုံးသွားသူမှာ အသက် ၄၀ အရွယ် အမျိုးသား ၁ ဦးနှင့် အသက် ၃၀ အရွယ် အမျိုးသမီး ၁ ဦးနေရာတွင် သေဆုံးခဲ့ပြီး နောက်ထပ် ၃ ဦး ပြင်းထန်ဒဏ်ရာရရှိခဲ့ကာ အသက်အန္တရာယ် စိုးရိမ်ရကြောင်း သိရသည်။
ပြင်းထန် ဒဏ်ရာရရှိသူ ၃ ဦးသည် အသက် ၅၀ အရွယ် အမျိုးသား ၁ဦး၊ အသက် ၁၂ အရွယ် မိန်းခလေး ၁ ဦးနှင့် အသက် ၂၂ အရွယ် အမျိုးသား ၁ ဦးတို့ဖြစ်ပြီး လက်ရှိချိန်တွင် ဆေးကုသမှု ခံယူနေဆဲဖြစ်ကြောင်း သိရသည်။
ထို့ပြင် လေကြောင်းဖြင့် ဗုံးကြဲတိုက်ခိုက်မှု အတွင်း နေအိမ် ၂ လုံးလည်း ပျက်စီးခဲ့ရပြီး ကျေးရွာသားများလည်း ကြောက်လန့်ပြီး ဘေးလွတ်ရာကို ထွက်ပြေး တိမ်းသွားကြကြောင်း ဒေသခံများက ပြောဆိုသည်။
ပြီးခဲ့သည့် ၂၀၂၄ ခုနှစ် ဒီဇင်ဘာလ ၄ ရက်နေ့မှ ဗန်းမော်မြို့ပေါ်တွင် တိုက်ပွဲများ အပြင်းအထန်ဖြစ်ပွားလျက်ရှိပြီး စစ်ကောင်စီတပ်၏ တပ်ရင်းများကို KIA ဦးဆောင်သော တော်လှန်ရေးတပ်များက တိုက်ခိုက် သိမ်းပိုက်လျက်ရှိသည်။
