အာရက္ခတပ်တော် AA က ထိုးစစ်အရှိန် မြှင့်လာ၍ ရခိုင်ပြည်၊ စစ်တွေမြို့ရှိ စီးပွားရေးဘဏ်မှ ငွေများကို အာဏာသိမ်း စစ်ကောင်စီက ပြောင်းရွှေ့ရန် စီစဉ်နေကြောင်း ဘဏ်အသိုင်းအဝိုင်းနှင့် ဝန်ထမ်းများထံမှ သိရသည်။
ပြည်နယ်စစ်ကောင်စီအဖွဲ့သည် စစ်တွေမြို့ရှိ ဝန်ထမ်းများကို နှစ်လစာ ကြိုတင်ပေး၍ ဘဏ်က ငွေအားလုံးကို ရန်ကုန်နှင့် နေပြည်တော်သို့ ရွှေ့ရန် စီစဉ်နေကြောင်း စစ်တွေမြို့နယ် စီးပွားရေးဘဏ်နှင့် နီးစပ်သူတစ်ဦးက ပြေသည်။
“စီးပွားရေးဘဏ်က ပြည်ဂျာဆီကို ပြည်နယ်မန်နေဂျာပေါ့ ပြည်နယ်အစိုးရအဖွဲ့က စာပို့ထားတယ်လို့ ပြောပါတယ်။ ဒီလထဲမှာ လုံခြုံရေးအခြေအနေအရ ဘဏ်က ငွေတွေကို ရွှေ့ပြောင်းမယ့် အခြေအနေ၊ ဝန်ထမ်းတွေကို လစာ နှစ်လစာ ထုတ်ပေးမယ့် အခြေအနေ စတာတွေ ပါတယ်လို့ သိရပါတယ်” ဟု ပြောသည်။
AA သည် စစ်တွေမြို့အနီးက စစ်ကောင်စီတပ် စခန်းရှိရာ နေရာများကို အနည်းဆုံး နေရာ ၃ ခုမှ ထိုးစစ်ဆင်တိုက်ခိုက်နေပြီး လက်နက်ကြီးပစ်ခတ်မှုနှင့် စနိုက်ပါပစ်ခတ် တိုက်ခိုက်မှုကို ဆက်တိုက် ပြုလုပ်နေသည်။
ထိုအခြေအနေများကြောင့် ပြည်နယ်စစ်ကောင်စီအဖွဲ့သည် စစ်တွေမြို့ထဲသို့ တိုက်ပွဲရောက်ရှိလာနိုင်သဖြင့် ယူဆ၍ စီးပွားရေးဘဏ်က ငွေကြေးများကို ပြောင်းရွှေ့ထားခြင်းဖြစ်နိုင်ကြောင်း စစ်တွေမြို့နယ်စီမံခန့်ခွဲရေး အဖွဲ့ဝင်တစ်ဦးက ပြောသည်။
“ပြီးခဲ့တဲ့ ရက်ပိုင်းကစပြီး AA ရဲ့ လက်နက်ကြီးပစ်ခတ် တိုက်ခိုက်မှုဟာ ပိုများလာတယ်လို့ ပြောရမယ်။ အင်အား အလုံးအရင်းနဲ့ ဝင်တိုက်တာမျိုး မဟုတ်ပေမဲ့ စစ်ကောင်စီရဲ့ အခိုင်အမာ တပ်စခန်းတွေ၊ တပ်ရင်းတွေကို အဓိက လက်နက်ကြီးတွေနဲ့ လှမ်းပစ်ခတ်နေတာ။ ဒါတွေကို စိုးရိမ်တယ်ထင်ပါတယ်။ ကြိုတင်ပြင်ဆင်တဲ့ အနေနဲ့ ဝန်ထမ်းတွေကို လစာ ကြိုထုတ်ပေးထားမယ်။ အခြေအနေမကောင်းဘူးဆိုရင် ဘဏ်က ငွေကို တခြားရွှေ့ထားလိုက်မယ်။ ဒါတွေကတော့ အစိုးရအဖွဲ့အနေနဲ့ လုပ်နေကျ အလုပ်တစ်ခုပါပဲ” ဟု ဆိုသည်။
စစ်တွေမြို့ကို အဓိက အကာအကွယ်ပေးထားသည့် စစ်ကောင်စီ၏ အခိုင်အမာ တပ်ရင်း၊ တပ်စခန်းများဖြစ်သော ရေချမ်းပြင်ဆိပ်ကမ်း၊ ပါဒလိတ်တပ်ရင်းများ၊ အမြင့်ကျွန်းတပ်ရင်း၊ ရွှေမင်းဂံရေတပ်စခန်း၊ ကုလားတန်မြစ်ဝနှင့် မယူမြစ်အတွင်းသွားလာနေသော စစ်ရေယာဉ် နေဗီများကို AA က လက်နက်ကြီးပစ်ခတ် တိုက်ခိုက်နေခြင်းဖြစ်သည်။
လက်ရှိ ကုန်ဈေးနှုန်း ကြီးမြင့်မှုများကြောင့် ပြည်နယ်စစ်ကောင်စီ၏ နှစ်လစာ ကြိုထုတ်ပေးမည့် အစီအစဉ်ကို အောက်ခြေဝန်ထမ်းအသိုင်းအဝိုင်းက ကြိုဆိုနေကြပြီး ယနေ့အချိန်အထိတော့ နှစ်လစာ မရရှိသေးကြောင်း ပြောဆိုကြသည်။
