မကွေးတိုင်း၊ ငဖဲမြို့နယ်ရှိ နတ်ရေကန်တွင် စစ်တပ်စစ်ကြောင်းကို ကြားဖြတ် တိုက်ခိုက်ရာ စစ်တပ်ဘက်မှ ၇ ဦးသေဆုံးပြီး လက်နက် ၄ လက်သိမ်းဆည်းရရှိခဲ့ကြောင်း ချင်းကာကွယ်ရေးတပ် – အရှို က ဖေဖော်ဝါရီ ၂၃ ရက်နေ့တွင် သတင်းထုတ်ပြန်သည်။

လက်နက်ခဲယမ်းများ သယ်ဆောင်ပြီး စစ်ယာဉ်တန်းဖြင့် ဆုတ်ခွာလာသော စစ်တပ်စစ်ကြောင်းကို CDF – Asho မှ ပျဉ်းဝ စစ်ဆေးရေးဂိတ် နတ်ရေကန်လမ်းဟောင်းတွင် ကြားဖြတ် တိုက်ခိုက်ခဲ့ကြောင်း ထုတ်ပြန်ချက်က ရေးသည်။

ဖေဖော်ဝါရီလ ၂၂ ရက်နေ့ မွန်းလွဲ ၁ နာရီကျော်တွင် စစ်ကောင်စီ တပ်သား အင်အား ၁၀၀ ခန့်ပါ ယာဉ်တန်းကို ငဖဲမြို့နယ်ရှိ နတ်ရေကန် လေကြောင်း ရန်ကာကွယ်ရေးတပ်မှ လက်နက်ခဲယမ်းများ သယ်ဆောင်ကာ ဆုတ်ခွာလာခြင်း ဖြစ်ကြောင်း သိရသည်။

ယင်းတိုက်ခိုက်မှု အတွင်း စစ်ယာဉ်တန်း ၄ စီးထဲမှ ၁ စီးပျက်စီးကာ ၁ စီး မီး လောင်ကျွမ်းခဲ့ပြီး တိုက်ပွဲအတွင်း စစ်ကောင်စီ တပ်သား ၇ ဦး နေရာတွင် သေဆုံးကာ ထိခိုက်ဒဏ်ရာ ရရှိမှုများလည်း များပြား ရှိခဲ့ကြောင်း သိရသည်။

ယင်းတိုက်ပွဲအတွင်း စစ်ကောင်စီ တပ်သားများထံမှ လက်နက်ငယ် ၄ လက်နှင့် ခဲယမ်းအချို့ သိမ်းဆည်းရရှိခဲ့ပြီး Chin Defence Force – Asho မှ တော်လှန်ရေး ရဲဘော် ၁ ဦး သေဆုံးခဲ့ကာ တစ်ဦးမှာ မစိုးရိမ်ရ ဒဏ်ရာ ရရှိခဲ့ကြောင်း သိရသည်။

မကွေးတိုင်း၊ ငဖဲမြို့နယ်တွင် AA နှင့် တော်လှန်ရေးပူးပေါင်းတပ်၏ တိုက်ခိုက်မှုကြောင့် စစ်ကောင်စီတပ်များ အရေးနိမ့်ထွက်ပြေး ဆုတ်ခွာနေရကြောင်း တော်လှန်ရေး သတင်းရင်းမြစ်များထံမှ သိရှိရသည်။

ရိုးမတောင်ခြေ ရွာများလည်း AA ပူးပေါင်းတပ်ဖွဲ့များနှင့် ကျောက်ပုံ၊ ခဲပြစ် ကျေးရွာအနီးအနားတွင် စစ်ကောင်စီတို့ တိုက်ပွဲများ ပြင်းထန် ဖြစ်ပွားခဲ့ပြီး စစ်ကောင်စီ၏ စခန်းတစ်ခုဖြစ်သော ရခိုင်ရိုးမတောင်း တန်းအထက်ရှိ မိုးထိတောင် စခန်း သိမ်းပိုက်ခဲ့သည်။

လက်ရှိတွင် အာရက္ခတပ်တော် AA နှင့် ပူးပေါင်းတပ်ဖွဲ့များသည် မကွေး၊ ပဲခူးနှင့် ဧရာဝတီတို့နှင့် ထိစပ်နေသည့် ရခိုင်ရိုးပေါ်က စစ်ကောင်စီ တပ်စခန်းများအားလုံးကို သိမ်းပိုက်ပြီး ရခိုင်ရိုးမတောင်တန်းကို ထိန်းချုပ်ထားသည်။