ရခိုင်ပြည်၊ မောင်တောမြို့နယ်က ဒေသခံတစ်ဦးမှာ တောင်သို့ ဝါးခုတ်ရန်သွားရာကနေ မိုင်းနင်းမိ၍ ပေါက်ကွဲမှုဖြစ်ပွားပြီး ဘယ်ခြေထောက်တစ်ဖက် ပြတ်သွားကြောင်း ဒေသခံများ၏ ပြောဆိုချက်အရ သိရသည်။

ယနေ့ ဖေဖော်ဝါရီ ၂၃ ရက်နေ့၊ နံနက် ၉ နာရီလောက်က မောင်တောမြို့နယ်၊ မီးတိုက်ရွာ၏ ရွာမြောက်ဖက်ရှိ တောင်သို့ ဝါးခုတ်သွားရာကနေ မိုင်းနင်းမိရာကနေ ပေါက်ကွဲမှု ဖြစ်ပွားပြီး ထိခိုက် ဒဏ်ရာရ ရှိခဲ့ခြင်း ဖြစ်သည်။

ထိခိုက် ဒဏ်ရာရှိသူများ မောင်တောမြို့နယ်၊ မီးတိုက်ကျေးရွာက အသက် ၂၅ နှစ်အရွယ်ရှိ ကိုမောင်ထွန်းအေး ဖြစ်ပြီး ဘယ်ဖက်ခြေထောက် တစ်ဖက်ပြတ်သွားကြောင်း ၎င်းမှာ ဆေးကုသရန် ပို့ဆောင်လိုက်ကြောင်း သိရသည်။

ရခိုင် ထိန်းချုပ်နယ်မြေများတွင် အာရက္ခတပ်တော် AA က မိုင်းရှင်းလင်းရေးများ လုပ်ဆောင်နေသော်လည်း ယခုထက် ထိထိရောက်ရောက် လုပ်ဆောင်ရန် လိုအပ်နေသေးကြောင်း ရခိုင် အရပ်ဖက် အဖွဲ့အစည်းများက ပြောဆိုထားသည်။

မြေမြှုပ်မိုင်း နင်းမိပြီး သေဆုံးမှုနှင့် ထိခိုက် ဒဏ်ရာရရှိသူ ရခိုင်မှာ ယခုရက်ပိုင်းအတွင်း မြင့်တက်လာနေပြီး မြေမြုပ်မိုင်းနှင့် စစ်ကျန်လက်နက်အန္တရာယ်သည် တောတောင်၊ ကျေးလက်ဒေသများအပြင် မြို့ပေါ် ဧရိယာမှာလည်း စိုးရိမ်မှု အနေအထား ရှိနေသည်။

မြန်မာနိုင်ငံမှာ မြေမြှုပ်မိုင်းနှင့် ဖောက်ခွဲရေးပစ္စည်းများကြောင့် သေဆုံးခဲ့ရသည့် ကလေးငယ်များ အပါအဝင် အရပ်သား အသေအပျောက် အရေအတွက်သည် ၂၀၂၂ ခုနှစ်ကထက် နှစ်ဆကျော် မြင့်တက်လာခဲ့ကြောင်း ယူနီဆက်ဖ်က ဆိုသည်။

မြေမြှုပ်မိုင်းနှင့် ပေါက်ကွဲစေတတ်သော အကြွင်းအကျန်များကြောင့် အသေအပျောက် ၂၇၀ ရာခိုင်နှုန်း ခုန်တက်သွားပြီး ၂၀၂၃ ခုနှစ်တွင် ၁၈၈ ဦး သေဆုံးကာ ၈၆၄ ဦး ဒဏ်ရာရရှိခဲ့ကြောင်း သိရသည်။