(ထိခိုက်သေဆုံးမှုများပြားပြီး အရေအတွက်ကို အတိအကျ မသိရသေး)
မကွေးတိုင်း မြိုင်မြို့နယ် ကျောက်ခွက်ရေနံမော်ဒေသက ဆုံကုန်းကျေးရွာ ဘုန်းတော်ကြီးကျောင်းမှာ ပြုလုပ်နေသော မင်္ဂလာဆောင်ကို စစ်ကောင်စီက လေကြောင်းဗုံးကြဲ တိုက်ခိုက်ခဲ့၍ သေဆုံးသူများပြားကြောင်း သိရသည်။
ယနေ့ ဖေဖော်ဝါရီလ ၂၅ ရက် နံနက် ၁၀ နာရီခန့်က မြိုင်မြို့နယ် ဆုံကုန်းကျေးရွာမှ မင်္ဂလာဆောင်ကို စစ်ကောင်စီက လေကြောင်းဗုံးကြဲတိုက်ခိုက်ခဲ့ခြင်းဖြစ်သည်။
မြိုင် ပကဖ မှ ဗိုလ် Cross က “လက်ရှိ အထိတော့ အထိအခိုက်ရှိတယ်ပဲ သိရသေးတယ်။ ဘုန်းကြီးကျောင်းပေါ် တည့်တည့်ကျတယ်၊ သူတို့ကို ထမင်းဟင်းချက်ကျွေးနေတဲ့ စားဖိုတွေရော အကုန်လုံးမီးလောင်သွားတာ။ အဲဒီ အပေါ်တွေ တည့်ကျတာဆိုတော့။ ဂျက်ဖိုက်တာနဲ့ ၂ ကြိမ်လာကြဲသွားတာ၊ ဘယ်နှစ်ယောက် ထိတယ်၊ သေတယ် တိတိကျကျမသိရသေးဘူး။ တချို့ဟာတွေက အခုမှ ဆွဲထုတ်နေတုန်းပဲရှိ သေးတာ။ ထိခိုက်တာတွေ တော်တော်များတယ်လို့ သိရတယ်” ဟု ပြောသည်။
စစ်ကောင်စီက ပေါင် ၅၀၀ ဗုံးသီးများဖြင့် နှစ်ကြိမ်တိုင်တိုင် လာရောက် ဗုံးကြဲသွားခြင်းဖြစ်ပြီး အရပ်သားပြည်သူ အများအပြား သေဆုံးသွားကြောင်း သိရသည်။
စစ်ကောင်စီက နောက်ထပ် ဗုံးလာကြဲနိုင်သည့်အတွက် ဓါတ်ပုံများနှင့် သတင်းများကို သတိထားကြရန်လည်း မြိုင် ပကဖ က မေတ္တာရပ်ခံထားသည်။ ဒေသခံပြည်သူများမှာ ဗုံးထပ်မံ ကြဲခံရနိုင်၍ ထွက်ပြေးတိမ်းရှောင်နေရကြောင်း သိရသည်။
ကုန်ခဲ့သည့် အပတ်ကလည်း မြိုင်မြို့နယ် မြောက်ပိုင်းက ချစ်တီးကျေးရွာကို အာဏာသိမ်း စစ်ကောင်စီက လေကြောင်းဗုံးကြဲတိုက်ခဲ့သေးကြောင်း သိရသည်။
စစ်ကောင်စီတပ်က ပြည်သူလူထုအပေါ် ပစ်မှတ်ထားကာ ဗုံးကြဲတိုက်ခိုက်မှုများ ဆက် တိုက်လုပ်ဆောင်နေမှုကြောင့် မိဘပြည်သူများ အနေဖြင့် စစ်ကောင်စီ၏ လေကြောင်း အန္တရယ်ကို သတိထားကြရန်နှင့် လူစုလူဝေးမလုပ်ကြရန် တော်လှန်ရေးတပ်ဖွဲ့များက သတိပေး တိုက်တွန်းနေသည်။
(ခေတ်သစ်မီဒီယာသည် Western News ၏ မိဖက် မီဒီယာဖြစ်သည်)
