စစ်ကိုင်းတိုင်း မုံရွာ-ရေဦး အဝေးပြေးလမ်းမကြီးအနီးတွင် အခြေစိုက်ထားသော စစ်ကောင်စီ၏ အနောက်မြောက်ပိုင်းတိုင်းစစ်ဌာနချုပ် (နမခ) ကို ကျောင်းသားလက်ရုံးတပ်တော် SAF က ရော့ကတ်ဒုံး အလုံး ၁၀၀ ဖြင့် ပစ်ခတ်တိုက်ခိုက်ခဲ့ကြောင်း ဖေဖော်ဝါရီလ ၂၅ ရက်တွင် ထုတ်ပြန်ထားသည်။

ဖေဖော်ဝါရီလ ၁၃ ရက် နေ့လယ် ၃ နာရီကျော်အချိန်တွင် အနောက်မြောက်ပိုင်းတိုင်း စစ်ဌာနချုပ် ကို ရော့ကတ်ဒုံး အလုံး ၇၀ နှင့် အမှတ် ၅၀၈ အမြောက်တပ်ရင်းကို ရော့ကတ်ဒုံး အလုံး ၃၀ စုစုပေါင်း အလုံး ၁၀၀ ဖြင့် ပစ်ခတ်တိုက်ခိုက်ခဲ့သည်ဟု ကျောင်းသားလက်ရုံးတပ်တော် SAF က ဆိုသည်။

ထိုတိုက်ခိုက်မှုအတွင်း စစ်ကောင်စီဖက်က တပ်သား ၇ ဦးကျဆုံးသွားပြီး ၁၅ ဦးအထိ ဒဏ်ရာရရှိသွားကြောင်း SAF က ပြောသည်။

အမှတ် ၅၀၈ အမြောက်တပ်ရင်းသို့ ကျရောက်ခဲ့သည့် ရော့ကတ်ဒုံးသီးများကြောင့် စစ်ကောင်စီ၏ အဆောက်အဦး ၁ လုံးမှာ မီးလောင်ပျက်စီးသွားကြောင်းလည်း ထုတ်ပြန်ထားသည်။

ကျောက်သားလက်ရုံးတပ်တော် SAF သည် အာရက္ခတပ်တော် AA ၏ မဟာမိတ်အဖွဲ့တစ်ခုဖြစ်ပြီး လက်ရှိ AA ၏ မကွေး၊ ပဲခူး၊ ဧရာဝတီ စစ်ဆင်ရေးတို့တွင် ပူးပေါင်းပါဝင် တိုက်ခိုက်နေကြောင်းလည်း သိရသည်။

ကျောက်သားလက်ရုံးတပ်တော် SAF သည် မြန်မာပြည်အလယ်ပိုင်းသို့ ထိုးဖောက်ဝင်ရောက်နိုင်ရေးအတွက် ကြိုးပမ်းလျှက်ရှိကြောင်းလည်း တာဝန်ရှိသူများက ပြောဆိုထားကြသည်။

ယခု၂၀၂၅ ခုနှစ် သည် တောင်တန်းဒေသမှသည် မြေပြန့်ဒေသများဆီသို့ တော်လှန်စစ်ကို ဝတ်မှုန်ကူး သယ်ဆောင်လာရမည့် နှစ်တစ်နှစ် ဖြစ်သည်ဟု ယူဆသောကြောင့် တော်လှန်စစ်ကိုပီပီပြင်ပြင် အကောင်အထည်ဖော်မည်ဟုလည်း SAF က ကြွေးကြော်ထားသည်။

အဖိနှိပ်ခံလူထုလွတ်မြောက်ရေးနှင့် နိုင်ငံတော်သစ် တည်ဆောက်ရေးအတွက် တော်လှန်ရေးကို ဆက်လက်ဆင်နွှဲမည်ဟုလည်း SAF က ဆိုသည်။

SAF က တိုက်ခိုက်ခဲ့သော စစ်ကောင်စီ၏ အနောက်မြောက်ပိုင်းတိုင်းစစ်ဌာနချုပ် (နမခ) သည် မုံရွာ-ရေဦး အဝေးပြေးလမ်းမကြီးအနီးတွင် အခြေစိုက်သော စစ်ကောင်စီ၏ တိုင်းစစ်ဌာနချုပ်တစ်ခု ဖြစ်သည်။

နမခ ၏ အဓိက တာဝန်မှာ စစ်ကိုင်းတိုင်းဒေသကြီး၊ မကွေးတိုင်းဒေသကြီးမြောက်ပိုင်း၊ ချင်းပြည်နယ်ရှိ ဒေသများနှင့် ၎င်းနှင့်ထိစပ်နေသော နေရာဒေသများ၏ ကာကွယ်ရေး၊ လုံခြုံရေးနှင့် စစ်ဆင်ရေးဆိုင်ရာကိစ္စရပ်များအား အဓိကတာဝန်ယူ ဆောင်ရွက်ရကြောင်းလည်း သိရသည်။

ထို့ပြင် တိုင်းစစ်ဌာနချုပ် နယ်မြေအတွင်းရှိ ၎င်း၏လက်အောက်ခံ တပ်များနှင့် အခြားလက်ရုံး/ဝန်ထမ်းတပ်များ၏ စစ်ဦးစီး/ စစ်ရေး/ စစ်ထောက်ပိုင်းဆိုင်ရာ လုပ်ငန်းများကိုပါ ဖြေရှင်းဆောင်ရွက်ပေးသည်။

ယင်းအပြင် အထက်ဌာနများမှ အမိန့်နှင့် ညွှန်ကြားချက်များအား ထပ်ဆင့် ညွှန်ကြားပေးခြင်းနှင့် ကြီးကြပ်ခြင်းတို့ကိုပါ ဆောင်ရွက်ရပြီး လက်ရှိ အနောက်မြောက်တိုင်းစစ်ဌာနချုပ် တိုင်းမှူးတာဝန်ထမ်းဆောင်နေသူမှာ ဗိုလ်မှူးချုပ် မျိုးမင်းထွေး ဖြစ်ကြောင်း သိရသည်။