ပြီးခဲ့သည့် ရက်ပိုင်းများအတွင်းစ၍ ကျောက်ဖြူမြို့နယ်တွင် စစ်ကောင်စီနှင့် အာရက္ခတပ်တော် AA တို့ နှစ်ဖက်တိုက်ပွဲများ ပြင်းထန် ဖြစ်ပွားနေမှုကြောင့် မာန်အောင်မြို့နယ်ကို စစ်အင်အား တိုးမြှင့် ချထားလိုက်ကြောင်း သိရသည်။
ကျောက်ဖြူမြို့ရှိ စစ်ကောင်စီ၏ ဓညဝတီရေတပ်အနီး တိုက်ပွဲဖြစ်ပွားခဲ့ပြီးနောက် မာန်အောင်မြို့က ရေတပ်စခန်းနှင့် တပ်စခန်းများတွင် အင်အား ထပ်ဖြည့်တင်းနေကြောင်း ဒေသခံသတင်းရင်းမြစ်များမှ ပြောသည်။
မာန်အောင်သတင်းရင်းမြစ်တစ်ဦးက “မာန်အောင်မှာ စစ်ကောင်စီက အင်အားဖြည့်တာ၊ တပ်သားတွေ စုထားတာက ပုံမှန်ပဲပေါ့နော်။ ဒါပေမယ့် ကျောက်ဖြူမှာ ပြီးခဲ့တဲ့ရက်ပိုင်းက တိုက်ပွဲဖြစ်ကြတော့ မာန်အောင်က ရေတပ်စခန်းနဲ့ တပ်စခန်းတွေမှာ အင်အားတွေ ထပ်ဖြည့်ထားတယ်လို့ သိရတယ်။ မာန်အောင်ကိုတော့ စစ်ကောင်စီက အခိုက်အမာကို ခံစစ်ပြင်ဆင်ထားတယ်” ဟု ပြောသည်။
ကျောက်ဖြူ ဓညဝတီရေတပ်အနီး စည်မော်၊ ဦးကင်း၊ ကြတ္တိန် ကျေးရွာဘက်တွင် စစ်ကြောင်းထိုးလာသော စစ်ကောင်စီ စစ်ကြောင်းနှင့် AA တို့ ဖေဖော်ဝါရီလ ၂၃ ရက်ညနေပိုင်းတွင် နာရီပိုင်းကြာ ထိတွေ့တိုက်ပွဲဖြစ်ပွားခဲ့ကြသည်။
ယင်းနောက် အပြန်အလှန် လက်နက်ကြီးများဖြင့် ပစ်ခတ်မှုဖြစ်ပွားခဲ့ပြီး လက်ရှိတွင် တိုက်ပွဲငြိမ်းသက်သွားကြောင်း စုံစမ်းသိရသည်။
ထိုထက် တိုက်ပွဲပြင်းထန်လာပါက ကျောက်ဖြူနှင့် မာန်အောင် ရေကြောင်းကနေ စစ်ကူပေးနိုင်ရန် စစ်ကောင်စီက အင်အားကို တိုးချခြင်းဖြစ်ကြောင်း နောက်ထပ် မာန်အောင် ဒေသခံ သတင်းရင်းမြစ်တစ်ဦးက ပြောသည်။
“ကျောက်ဖြူနဲ့ မာန်အောင်က ရေကြောင်းကနေဆို သိပ်ဝေးတာတော့ မဟုတ်ဘူး။ ရမ်းဗြဲကျွန်းကို ဖြတ်ပြီးတော့လည်း မာန်အောင်ကနေ လက်နက်ကြီးပစ်ကူပေးတာတွေလည်း လုပ်နိုင်တယ်။ မာန်အောင်ကျွန်း ပတ်ပတ်လည်ကို စစ်ကောင်စီရေတပ်က နေရာယူထားပြီးတော့ မြေပြင်တပ်စခန်းတွေကိုလည်း ကျွန်းပတ်ပတ်လည်မှာ အင်အားတိုးချထားတယ်” ဟု ပြောသည်။
မာန်အောင်ကျွန်းတွင် စစ်ကောင်စီ၏ မျှော်တော်ဦးရေတပ်စခန်း၊ ခမရ ၃၄၄ ကမုံတောင်တပ်ရင်းနှင့် သစ်ပုံရဲကင်းစခန်း၊ ကမားရဲကင်းစခန်း၊ ဆားချက်ရဲကင်းစခန်း စသဖြင့်ရှိကြောင်းလည်း သိရသည်။
စစ်ကောင်စီ၏ ၎င်းတို့ တပ်စွဲထားသော နေရာများ အထူးသဖြင့် မာန်အောင်ကျွန်းပတ်ပတ်လည်တွင် မြေမြှုပ်မိုင်းများ ထောင်ထားကြောင်းလည်း မာန်အောင်ဒေသခံအချို့က ပြောဆိုထားကြသည်။
