မကွေးတိုင်း ငဖဲမြို့နယ် နတ်ရေကန် လေကြောင်းရန် ကာကွယ်ရေးတပ် ကာကင်းစခန်းများမှ တပ်စခန်းစွန့်ခွာ ထွက်ပြေးလာသော စစ်ကောင်စီတပ်ဖွဲ့ဝင်များကို အရှင်းလက်ရ ဖမ်းဆီးမိထားကြောင်း ချင်းကာကွယ်ရေးတပ် CDF Asho က ယနေ့ ဖေဖော်ဝါရီလ ၂၆ ရက်တွင် ထုတ်ပြန်ထားသည်။

အာရက္ခတပ်တော် AA မှ နတ်ရေကန် လေကြောင်းရန် ကာကွယ်ရေးတပ် တည်ရှိရာ တောင်ကုန်း အား ထိုးစစ်ဆင် တိုက်ခိုက်နေစဉ်အတွင်း ကာကင်းစခန်းများမှ ထွက်ပြေးလာသော စစ်ကောင်စီ တပ်ဖွဲ့ဝင် ၂၃ ဦးကို ဖမ်းဆီးရမိထားကြောင်း CDF Asho က ဆိုသည်။

ကာကင်းစခန်းများမှ တပ်စခန်းစွန့်ခွာ ထွက်ပြေးလာသော စစ်ကောင်စီတပ်ဖွဲ့ဝင်များကို CDF Asho တပ်က ဖေဖော်ဝါရီလ ၂၄ ရက်နေ့ကစ၍ နယ်မြေရှင်းလင်းရေးပြုလုပ်နေပြီး ယနေ့အထိ သုံးရက်အတွင်းမှာ ဖမ်းဆီးရမိခြင်းဖြစ်သည်ဟု သိရသည်။

နတ်ရေကန် ဆက်သွယ်ရေး တာဝါတိုင်၏ မြောက်ဘက် မီတာ ၂၀၀၀ ခန့်အကွာ တောတွင်းနေရာအသီးသီးမှာ စစ်ကောင်စီ တပ်သား ၂၃ ဦးကို လက်နက် ခဲယမ်းများနှင့်အတူ ဖမ်းဆီးရမိခဲ့ခြင်းဖြစ်သည်။

MA1 ၁၃ လက်၊ MA2 ၁ လက်၊ MA3 ၃ လက်၊ MA11 ၂ လက်၊ MA5 ၁ လက် စုစုပေါင်း လက်နက်ငယ် ၂၀ လက်၊ လက်ပစ်မိုင်း ၁၈ လုံး၊ EY သီး ၁၂ လုံး၊ ကျည် ၄၀၀၀ ကျော်နှင့် အခြား စစ်အသုံးအဆောင်ပစ္စည်းများကိုလည်း သိမ်းဆည်းရမိခဲ့ကြောင်း သိရသည်။

နတ်ရေကန်ဒေသ အနီးတစ်ဝိုက်အတွင်း တာဝန်ထမ်းဆောင်နေသော စစ်ကောင်စီ တပ်ဖွဲ့ဝင် များအနေဖြင့် တော်လှန်ရေးတပ်ဖွဲ့များနှင့် ချိတ်ဆက်ဆက်သွယ်ပြီး အမြန်ဆုံး အလင်းဝင် ပူးပေါင်းကြရန် CDF Asho က တိုက်တွန်းထားသည်။