အာရက္ခတပ်တော် AA ကို တိုက်ခိုက်မည်ဟု ကြွေးကြော်ထားသည့် RSO အပါအဝင် မွတ်ဆလင် လက်နက်ကိုင်အဖွဲ့များနှင့် အစ္စလာမ်မစ် ပူးပေါင်းဆောင်ရွက်ရေးအဖွဲ့ OIC အထူးကိုယ်စားလှယ်တို့ တွေ့ဆုံခဲ့ကြောင်း သိရသည်။

OIC အထူးကိုယ်စားလှယ် Ibrahim Khairat သည် ဘင်္ဂလားဒေ့ရှ်နိုင်ငံရှိ မွတ်ဆလင်ဒုက္ခသည်စခန်းများသို့ မကြာသေးခင်က သွားရောက်ခဲ့ပြီး မွတ်ဆလင်လက်နက်ကိုင်အဖွဲ့များမှ တာဝန်ရှိသူများဖြင့် တွေ့ဆုံခဲ့သည်ဟု မတ်လ ၂ ရက်နေ့က Dhaka Tribune က ဖော်ပြသည်။

RSO ခေါင်းဆောင်အချို့၊ RSO နှင့်ဆက်စပ်နေသော မွတ်ဆလင်လက်နက်ကိုင် တပ်ဖွဲ့ဝင်များနှင့် မွတ်ဆလင်အရေးတက်ကြွလှုပ်ရှားသူများတို့ဖြင့် တွေ့ဆုံခဲ့သည့်အကြောင်း OIC အထူးကိုယ်စားလှယ်က ဖေဖော်ဝါရီလ ၁၈ ရက်နေ့က ၎င်း၏ လူမှုကွန်ရက်တွင် ဖော်ပြခဲ့သည်။

OIC အထူးကိုယ်စားလှယ် ဖော်ပြခဲ့သော ဓါတ်ပုံတွင် RSO ၏ ခေါင်းဆောင်တစ်ဦးဖြစ်သော Dil Mohammed ပါဝင်နေကြောင်း တွေ့ရသည်ဟု Dhaka Tribune က ဆိုသည်။

Dil Mohammed သည် မြန်မာစစ်တပ်နှင့် အလွမ်းသင့်ပြီး ရခိုင်-ဘင်္ဂလားဒေ့ရှ်နယ်စပ်တွင် နာမည်ဆိုးဖြင့် ကျော်ကြားသော RSO ခေါင်းဆောင်တစ်ဦးဖြစ်သလို အာရက္ခတပ်တော် AA ကို တိုက်ခိုက်ရန် ဘင်္ဂလားဒေ့ရှ်က မွတ်ဆလင်ဒုက္ခသည်စခန်းတွင် မွတ်ဆလင်လူငယ်များအား စည်းရုံးနေသောသူ တစ်ဦးလည်းဖြစ်သည်။

RSO ဘက်ကမူ OIC အထူးကိုယ်စားလှယ် Ibrahim Khairat နှင့် လျှို့ဝှက်တွေ့ဆုံခဲ့သည်ကို ငြင်းဆိုထားသော်လည်း Ibrahim Khairat ၏ လူမှုကွန်ရက် ဓါတ်ပုံက အတည်ပြုနိုင်ကြောင်း Dhaka Tribune ပြောသည်။

OIC အထူးကိုယ်စားလှယ် Ibrahim Khairat ၏ ခရီးစဉ်ကို ဘင်္ဂလားဒေ့ရှ် အစိုးရဘက်က လွယ်ကူချောမွေ့စွာ စီစဉ်ပေးခဲ့ပြီး ယင်းအပေါ် ကျေးဇူးတင်ကြောင်းလည်း Arakan Rohingya Union (ARU) မှ အသိအမှတ်ပြုထားသည်။

မည်သည့်အတွက်ကြောင့် တွေ့ဆုံကြသည်ကို RSO နှင့် OIC နှစ်ဖက်စလုံးက တရားဝင်ထုတ်ပြန်ပေးခြင်း မရှိ၍ တွေ့ဆုံပွဲ အသေးစိတ်အကြောင်းအရင်းကို အသေးစိတ်မသိရကြောင်း Dhaka Tribune က ပြောသည်။

လက်ရှိတွင် ဘင်္ဂလားဒေ့ရှ် ဒုက္ခသည်စခန်းများထဲက မွတ်ဆလင်လက်နက်ကိုင်များမှာ Arakan Rohingya National Alliance (ARNA) ကို ဦးတည်နေပြီး လူငယ်အများအပြားကိုလည်း စစ်သားစုဆောင်းနေကြောင်း သိရသည်။

OIC အထူးကိုယ်စားလှယ်၏ တွေ့ဆုံပွဲတွင် ARSA က ခေါင်းဆောင်များလည်း တက်ရောက်ခဲ့ခြင်း ရှိမရှိကို မေးမြန်းရာတွင် ဖြေဆိုရန် ငြင်းဆန်ခဲ့ကြောင်း Dhaka Tribune က ဆိုသည်။

သို့သော်လည်း RSO, ARSA, ARA, AIM/ARIF တို့မှာ ချိတ်ဆက်ဆောင်ရွက်ကာ ပေါင်းစည်းထားကြပြီး အာရက္ခတပ်တော် AA ကို အတူတူတိုက်ခိုက်ရန် ပြင်ဆင်နေသည့်အကြောင်း ပြီးခဲ့သည့် လပိုင်းအတွင်းက ၎င်းတို့၏ လူမှုကွန်ရက်စာမျက်နှာများတွင် ပြောဆိုထားကြသည်။