နိုင်ငံအနှံ့တွင် အင်အား ထောင်သောင်းချီ အသုံးပြုပြီး စစ်ကောင်စီ၏ အာဏာသိမ်းမှုအား အဆုံးသတ်ရန် ထိုးစစ်ဆင်တိုက်ခိုက်သွားမည်ဟု အမျိုးသားညီညွတ်ရေးအစိုးရ NUG က ပြောသည်။
မတ်လ ၈ ရက်နေ့က ကျင်းပပြုလုပ်ခဲ့သည့် တပ်မှူးသင်တန်း အပတ်စဉ် (၁/၂၀၂၄) သင်တန်းဆင်းပွဲသို့ ပေးပို့သောသဝဏ်လွှာ NUG ကာကွယ်ရေးဝန်ကြီး ဦးရည်မွန်က အသိပေး ပြောဆိုလိုက်ခြင်းဖြစ်သည်။
မြို့သိမ်းတိုက်ပွဲ အတွေ့အကြုံများ ရယူခဲ့ပြီးသဖြင့် PDF၊ ပကဖနှင့် မဟာမိတ်တော်လှန်ရေးအဖွဲ့များ အားလုံးလက်တွဲကာ စစ်မျက်နှာအလိုက် ထောင်သောင်းချီအင်အားဖြင့် အထွေထွေထိုးစစ်ကြီး စစ်ဆင်နွှဲ၍ စစ်အာဏာသိမ်းမှု အဆုံးသတ်ကြရမည်ဟု ဦးရည်မွန်က ပြောသည်။
“တော်လှန်ရေး အစောပိုင်းကာလမှာ တဖက်က တပ်တည်ဆောက်ရင်း တဖက်က တနိုင်ငံလုံး အတိုင်းအတာနဲ့ စစ်ရေးလှုပ်ရှားနိုင်အောင် ပထမအဆင့် ကြိုးပမ်းခဲ့ကြရတယ်။ ဒုတိယအဆင့် အနေနဲ့ အင်အားစုစည်း၊ မဟာဗျူဟာ ထိုးစစ်ဆင်ရင်း မြို့သိမ်းစခန်းသိမ်းတိုက်ပွဲတွေ ဆင်နွှဲတဲ့ အတွေ့အကြုံ ရဲဘော်တို့ ရယူနိုင်ခဲ့ပြီဖြစ်တယ်။ ဒါဆိုရင် တတိယအဆင့်က ဘာဖြစ်မလဲ၊ PDF ပကဖနဲ့ မဟာ မိတ်တော်လှန်ရေးအဖွဲ့အားလုံး လက်တွဲပါဝင်ပြီး စစ်မျက်နှာအလိုက် ထောင်သောင်းချီအင်အားနဲ့ အထွေထွေထိုးစစ်ကြီးတရပ်ကို တနိုင်ငံလုံးအတိုင်းအတာနဲ့ ဆင်နွှဲ ကြဖို့ ဖြစ်လိမ့်မယ်။ ဒီထိုးစစ်ကြီးက စစ်အာဏာသိမ်းမှုကို အဆုံးသတ်ပေးလိမ့်မယ်လို့ ငါတို့ ယုံကြည်တယ်။ အဆုံးတနေ့မှာ ဆိုးယုတ်မှုမှန်သမျှ ကျဆုံးပြီး ကောင်းမြတ်ခြင်း အမှန်တရားက အောင်ပွဲခံရမှာ ဖြစ်တယ်။ ပြည်သူ့တော်လှန်ရေး မုချအောင်ရမယ်။” ဟု ဆိုသည်။
လက်နက်ကိုင်အင်အားစု အားလုံး အလံတော် တစ်ခုတည်းအောက်၌ စုစည်း၍ ပြည်သူ့တော်လှန်ရေးတစ်ရပ် ဆင်နွဲရန်နှင့် စနစ်ပြောင်းရေး ဦးတည်သော တော်လှန်ရေးဖြစ်သည့်အတွက် ဖက်ဒရယ် ဒီမိုကရေစီ နိုင်ငံရေးစနစ်နှင့် လျော်ညီသည့် ဖက်ဒရယ်ပြည်ထောင်စုတပ်မတော် တည်ထောင်သည့်အခါ ရှေ့ပြေး အမြုတေဖြစ်စေရန် ရည်ရွယ်ထားကြောင်း ဦးရည်မွန်က ပြောသည်။
“PDF/ပကဖ ရဲဘော်တွေ CoC နှစ်ရပ်နဲ့ တိုက်စွမ်းရည် အားကောင်းတဲ့ ရဲဘော်တွေဖြစ်ရေးဟာ ငါတို့ စဉ်ဆက်မပြတ် ဖော်ဆောင်ရမယ့် လုပ်ငန်းတာဝန်ဖြစ်တယ်။ အခုဆိုရင် ရဲဘော်တို့ဟာ ဒီတာဝန်ကို ထမ်းဆောင်ဖို့ အဆင်သင့်ဖြစ်ကြပြီလို့ နားလည်တယ်။ တပ်မှူးတွေရဲ့ ဦးဆောင်မှု၊ ကိုယ်ကျိုးစွန့် အနစ်နာခံမှုနဲ့ တပ်ကို ကောင်းသထက် ကောင်း၊ မာသထက် မာအောင် တည်ဆောက်ကြရမှာ ဖြစ်တယ်။” ဟု ဆိုသည်။
ယနေ့ တော်လှန်ရေး အခြေအနေရပ်ရပ်ကို ကြည့်ပါက တော်လှန်ရေးအောင်မြင်ရန်နှင့် တော်လှန် ရေးအောင်မြင်သည့်အခါတွင် ပြည်သူများ မျှော်မှန်းထားသော ဖက်ရယ်ဒီမိုကရေစီ ပြည်ထောင်စု ထူထောင်နိုင်ရန် PDF တပ်မတော်တွင် တာဝန်ရှိကြောင်း ပြောသည်။
“ဒီကနေ့ဆိုရင် ပြည်သူ့ကာကွယ်ရေးတပ်မတော်ရဲ့ သက်တမ်းဟာ ၄ နှစ်ပြည့်ဖို့ လပိုင်းသာ လိုတော့တယ်။ ဒီအချိန်မှာ PDF တပ်မတော်ကို ဦးဆောင်ပြီး အဆင့်ဆင့်သော တော်လှန်ရေးတာဝန်ကို ထမ်းဆောင်မယ့် တပ်မှူးကောင်းတွေ ငါတို့ တပ်မတော်မှာ ပေါ်ထွက်ခဲ့ပြီ ဖြစ်တယ်လို့ ယုံကြည်တယ်။ တပ်မှူးကောင်းမှ တပ်ကောင်းမယ်ဆိုတဲ့ ဆိုရိုးစကားလည်း ရှိတယ်။ တပ်မတော်တရပ် တည်ဆောက်ရာမှာ တပ်မှူးတွေရဲ့ အခန်းကဏ္ဍ ဘယ်လောက်ကြီးမားသလဲ ဆိုတာတော့ အထူးပြောဖို့ လိုမယ်မဟုတ်ဘူး” ဟု ဦးရည်မွန်က မိန့်ခွန်းတွင် ပြောဆိုထားသည်။
အဆိုပါ တပ်မှူးသင်တန်း အပတ်စဉ် ၁ ကို အမှတ် ၁ စစ်ဒေသတွင် ဖွင့်လှစ်ခဲ့ခြင်းဖြစ်ပြီး သင်တန်းကာလ ၃ လ ကြာမြင့်ခဲ့ကြောင်း၊ သင်တန်းအောင်မြင်ရေးအတွက် KIA တပ်မှ သင်တန်းဆရာ အရာရှိများနှင့် PDF စစ်ရုံးချုပ်မှ တာဝန်ရှိသူများက ပို့ချခဲ့ခြင်းဖြစ်ကြောင်း သိရသည်။
(ခေတ်သစ်မီဒီယာသည် Western News ၏ မိတ်ဖက်အဖွဲ့ဖြစ်သည်)
